Помощь небесных покровителей. Полный сборник молитв на каждый день года (лето). Июнь (Т. С. Олейникова, 2009)

Преподобного Дионисия, игумена Глушицкого (1437).

Преподобного Агапита Печерского, врача безмездного, в Ближних пещерах почивающего (XI).

Молитвы преподобному Дионисию Глушицкому

Тропарь преподобному Дионисию, игумену Глушицкому, глас 1

Божественною любовию от юности распаляемь, Дионисие преподобне, вся яже в мире красная возненавидев, Христа единаго возлюбил еси, и сего ради во внутреннюю пустыню вселился еси, со зверьми живый, весь Христови. Отонудуже и Всевидящее Око, твоя труды видев, даром чудес и по преставлении обогатил тя есть. Темже вопием ти: моли непрестанно о всех нас, честную память твою присно в песнех почитающих.

Кондак, глас 8

Все твое умное желание к Богу вперив, Тому невозвратно от души последовал еси, в пустыню вселився, и тамо ангельски пожив, многим путь был еси ко спасению, сего ради и Христос тебе прослави и даром чудес обогати. Темже вси вопием ти: радуйся, Дионисие преподобне, пустынный жителю.

Величание

Ублажаем тя, преподобне отче Дионисие, и чтим святую память твою, наставниче монахов и собеседниче Ангелов.

Молитвы преподобному Агапиту Печерскому

Тропарь преподобному Агапиту Печерскому, глас 5

Богоноснаго Антония ревнуя смиренномудрию, аки некиим врачевством зелием снедным исцелял еси болящия, преподобне Агапите, тем и врача неверна уверив, наставил еси на путь спасения. Уврачуй и наша болезни и молися Господеви о воспевающих тя.

Ин тропарь, глас 2

Велия веры исправления, в пещернем затворе, яко на воде упокоения, преподобне отче Агапите, радовался еси, огнем бо любве Божественныя распалаемь, бдением и молитвою безстрастия достигл еси, и явился еси равноангельный на земли, того молитвами, Христе Боже, спаси души наша.

Кондак, глас 6

Врач сый изряден, чудне, являя несумненную твою веру, обличая же армениново неверие и приводя его к благочестию, себе, близ смерти бывшу, испросил еси от Бога продолжение живота и, сим чудом того уверив, привел еси Христови. Емуже в веселии предстоя, молися о нас, преподобне.

Величание

Ублажаем тя, преподобне отче Агапите, и чтим святую память твою, наставниче монахов и собеседниче Ангелов.

Преподобному Агапиту Печерскому, врачу безмездному, молятся о помощи при болезненном состоянии, об исцелении от разных недугов и болезней.

Великомученика Иоанна Нового, Сочавского (1330–1340).

Обретение мощей праведной Иулиании, княгини Вяземской, Новоторжской (1819).

Молитвы великомученику Иоанну Новому, Сочавскому

Тропарь великомученику Иоанну Новому, Сочавскому, глас 4

Житие на земли добре окормляя, страдальче, милостынями, и частыми молитвами, и слезами, паки же ко страданию мужески устремився, персское обличил еси нечестие. Темже Церкве был еси утверждение и христиан похвало, Иоанне приснопамятне.

Кондак, глас тойже

Морскую плавая пучину куплею, от востока тщался еси к северу, но Богу призвавшу тя, якоже Матфей мытницу, ты же куплю оставль и Тому последовал еси кровию мучения, временными искупив непроходимая, и венец приял еси непобедимый.

Величание

Величаем тя, страстотерпче святый Иоанне, и чтим честная страдания твоя, яже за Христа претерпел еси.

Великомученику Иоанну Новому, Сочавскому, молятся о благоуспешной торговле.

О блаженная госпоже, преславная Христова мученице, Небесных Ангелов сожительнице, благоверная княгине Иулиание, добре за чистоту подвизавшаяся, ея же ради и Божественными дарами обогатившаяся, во временней жизни люте от злокозненнаго врага пострадавшая, утешение же некончаемое от Христа Бога получившая, благими делы и кротостию украсившаяся и кротких землю наследовавшая, благочестно в законе пожившая и вельми ныне чудесы просиявшая! Ты, яже чистоты ради твоея сердечныя, прияла в тя Свет Святаго Духа и была еси всех благих дел сокровище на земли и, сего ради благий конец мученичества улучивши, неизреченнаго света сподоблена еси в вечных кровех Небеснаго селения. Ты, яже со святыми соборы водворяешися и с мученик лики веселишися, помяни и нас, добродетельное твое житие и страдания твоя мученическая похваляющих и с духовною радостию почитающих твою память. Призри на ны, волнами житейскими обуреваемыя, да твоими молитвами, добре поживше, диавольских избежим сетей и с тобою вечных благ сподоблены будем. О всеблаженная страстотерпице, всех Владыце и Богу благая и верная рабо явившаяся! Днесь, собраннии в храме твоем, к мощем твоим припадающе, умиленно вопием и молим тя: моли с нами и о нас умоляемаго от своего благоутробия Бога, да милостивно услышит нас, просящих Его благостыню, и подаст нам вся, яже ко спасению и житию нужная прошения, и всем, на всяком месте, во всякой скорби и обстоянии требующим Его человеколюбия и помощи, великую Свою милость. Да благодатию Божиею и твоим теплым ходатайством здрави всегда душею и телом пребывающе, славим дивнаго во святых Своих Бога Израилева, не удаляющего помощи Своея от нас всегда, ныне и присно и во веки веков. Аминь.

Тропарь благоверной княгине Иулиании Вяземской, Новоторжской, глас 2

Благочестно в законе поживши и благими делы украсившися, яко крепкий адамант явилася еси, целомудренная святая благоверная княгине Иулиание: тленную бо славу и добротство телесное презревши, злокозненнаго врага победила еси и целомудрия ради мученическую смерть прияла еси. Сего ради от Христа Бога нетленным и вечным венцем венчавшися, ныне с лики мученик ликуеши, и нам велия чудеса, приходящим ко гробу твоему, обильно источаеши. Темже ти вопием: молися Христу Богу о всех нас, с верою и любовию страдания твоя почитающих.

Кондак, глас тойже

Воспоем днесь Благодетеля всех Бога, прославлынаго в России Иулианию богомудрую, да молитвами ея подаст душам нашим грехов оставление и велию милость.

Величание

Величаем тя, святая благоверная княгине Иулиание, и чтим святую память твою, ты бо молиши за нас Христа Бога нашего.

Перенесение мощей благоверного царевича Димитрия из Углича в Москву (1606).

Сретение в Вологде образа преподобного Димитрия Прилуцкого, Вологодского чудотворца (1503).

Югской иконы Божией Матери (1615).

Молитвы благоверному царевичу Димитрию Угличскому и Московскому, чудотворцу

Тропарь благоверному царевичу Димитрию Угличскому и Московскому, глас 4

Царскую диадиму обагрил еси кровию твоею, богомудре мучениче, за скиптр Крест в руку приим, явился еси победоносец и жертву непорочну Владыце принесл еси себе: яко бо агнец незлобив, от раба заколен еси. И ныне, радуяся, предстоиши Святей Троице, молися о державе сродников твоих богоугодней быти и сыновом российским спастися.

Ин тропарь, глас 2

Яко благочестиваго корене боголюбивый произыде плод, яко агня незлобиво, неповинно во младенстве заклан бысть от властолюбца вкупе и злаго раба. Тем, яко златыми крылы, душевною чистотою и младенческим незлобием к Небесней высоте возлетел еси, страстотерпче Димитрие. И ныне кровь твоя от земли тайно вопиет к Богу, яко Авеля праведнаго. Сего ради покланяемся верою ти, славяще прославлынаго тя Бога, Егоже моли стране нашей богоугодней быти и сыновом русским спастися.

Ин тропарь, глас 1

Всеоружеством Духа благодати вооружен был в необорим столп и утверждение отечеству своему показася, яко агнец незлобивый, от врага неправедно заклан был и в жертву непорочну Господеви принесеся. И ныне дар благодати от всех Подвигоположника прием, источаеши всем исцеление, достохвальне благоверный царевичу княже Димитрие. Слава Восприимшему тя от земных в Небесная, слава Действующему тобою всем исцеление.

Ин тропарь, глас 3

Днесь вельми хвалится царствующий град Москва, имея в себе праведныя твоя мощи, благоверне царевичу Димитрие, яко цвети благоуханнии, пребываеми во святем храме, просвещение подают душам и телом нашим. Тем радостно тя восхваляем, и честное пренесение мощей твоих верно почитаем, и молим тя: моли Христа Бога даровати нам велию милость.

Ин тропарь, глас 2

Яко благочестиваго царскаго корене боголюбивый произыде плод, яко агня незлобиво, неповинно во младенчестве заклан бысть от властолюбца, вкупе же и от злаго раба, тем яко златыми крилы душевною чистотою и младенческим незлобием к Небесней высоте возлетел еси, Димитрие, и ныне кровь твоя от земли тайно вопиет к Богу, яко Авеля праведнаго, и сего ради покланяемся верою твоих мощей раце, из неяже реки чудес изливаеши приходящим ти с верою и любовию целующим многоцелебныя твоя мощи, славящим прославльшаго тя Бога, Егоже моли, державный страстотерпче Димитрие, православным сыновом русским спастися.

Кондак, глас 8

Возсия днесь в славней памяти твоей верным веселие яко бо доброрасленный грезн прозябл еси и Христу красен плод принесл еси; темже и по убиении твоем соблюди тело твое нетленно, страдальчески обагренное кровию. Благородне святе Димитрие, соблюдай отечество твое и град твой невредим, тому бо еси утверждение.

Ин кондак, глас 8

Светило пресветлое явися днесь божественная память твоя; богодарованная ти чудеса, яко реки, от всяких многоразличных недуг подаеши исцеление с верою призывающим тя, созывая нас к похвалению прославляющаго тя Бога. Егоже моли, страстотерпче Димитрие, мир мирови даровати, от видимых и невидимых враг православныя люди невредимы сохранити, да зовем ти: радуйся, ты бо еси утверждение граду нашему.

Ин кондак, глас 4

Яко пресветлая звезда явился еси днесь в царствующем граде Москве, благоверне царевиче Димитрие, сияя праведными своими мощами. К нимже притекающе, исцеления дар приемлем и глаголем: радуйся, всекрасне душею, благородне Димитрие, яко приял еси от Бога велий сей дар и венец нетленный.

Величание

Величаем тя, святый благоверный царевиче Димитрие, и чтим святую память твою, ты бо молиши за нас Христа Бога нашего.

Благоверному царевичу Димитрию, Угличскому и Московскому, молятся о прозрении слепых очей.

О священная главо, предивный чудотворче, преподобие и богоносне отче наш Димитрие! Усердно припадающе к тебе, молимся: яви нам, смиренным и грешным, многомощное твое заступление. Се бо грех ради наших не имамы дерзновения ко Господу, просити Его даров, нам благопотребных, но тебе, молитвенника к Нему благоприятнаго, предлагаем и просим: испроси нам у благости Его вся, яже на пользу душам и телесем нашим: веру праву, надежду несомненну любовь нелицемерну, во искушениих мужество, в злостраданиих терпение, в молитвах постоянство, в благочестии преуспеяние, вожделенное здравие, земли плодоносие, воздуха благорастворение, дожди благовременны, житейских потреб довольство, мир во днех наших и благословение свыше на вся благая дела и начинания наша, и да не во зло обратим дары Его, но в славу имене Его святаго и в прославление твоего о нас ходатайства. Испроси, угодниче Христов, у Царя царствующих и Господа господствующих стране нашей Российстей тишину и благостроение. Не забуди, чудотворче святый, милостивно присещати град твой и обитель твою, и вся грады и веси страны нашея православныя, сохраняя и соблюдая их молитвами твоими от всякаго зла. Помяни всех, веру и любовь к тебе имущих, имя твое молитвенно призывающих и на поклонение мощам твоим святым приходящих и вся во благих прошения их милостиво исполни, осеняя их свыше святоотеческим твоим благословением. Ей, святче Божий! Не лиши и нас грешных твоего многомощнаго заступления, но сподоби нас кончину жития благую улучити и Царствие Небесное унаследити: да воспоем и прославим дивнаго во святых Своих Бога нашего, Отца и Сына и Святаго Духа, во веки веков. Аминь.

Тропарь преподобному Димитрию Прилуцкому, Вологодскому чудотворцу, ради сретения его образа в Вологде, глас 4

Возсия днесь, яко солнце, пречестный образ священнолепнаго твоего подобия, паче солнца лучами чудес твоих всех озаряя, тьму бесовскую без вести творя, егоже радостно сретаху, духовныя лики составльше, непрестанно вопием ти: Димитрие, отче наш, моли Спаса всех сохранити град твой и страну нашу, стаду твоему спасение подавая и велию милость.

Кондак, глас 8

Христа единаго в жизни сей во след идти возжелал еси и, Того любовию земная отринув, преминув Небесными, с лики Ангел водворяяся, неотступно предстоиши Богови, тем и ныне пресвятому твоему образу сретения праздник радостно сотворяюще, от недуг исцеление приемлем, благодарно вопиюще: радуйся, преподобне отче Димитрие, постников удобрение.

Величание

Ублажаем тя, преподобне отче Димитрие, и чтим святую память твою, наставниче монахов и собеседниче Ангелов.

Молитва ко Пресвятой Богородице пред Ее иконою «Югская»

К Тебе, Пречистей Божией Матери, аз окаянный припадая молюся: веси, Царице, яко непрестанно согрешаю и прогневляю Сына Твоего и Бога моего. И аще многажды каюся, ложь пред Богом обретаюся: каюся трепеща, да не како поразит мя Господь, и по часе мале паки таяжде творю. Ведущи сия, Владычице моя, Госпоже Богородице, молю, да помилуеши, да укрепиши мя, и благая творити да подаси ми. Ты веси, о Владычице моя Богородице, яко имам в совершенней ненависти злая моя дела и всею мыслию люблю закон Бога моего. Но не вем, Госпоже Пречистая, откуду яже ненавижду, тая творю, а благая преступаю. Не попущай убо, Пречистая, воли моей совершатися, неугодна бо есть, но да будет во мне воля Сына Твоего и Бога моего, да мя спасет, и вразумит, и подаст ми благодать Святаго Духа, да бых аз отселе престал сквернодействуя и прочее пожил бых в повелениих Сына Твоего, Господа нашего Иисуса Христа, Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков. Аминь.

Тропарь Божией Матери ради иконы Ее «Югская», глас 6

Днесь, яко солнце пресветлое, возсия нам на воздусе Всечестная икона Твоя, Владычице, лучами милости мир просвещающи, юже великая Россия, яко некий дар Божественный, свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих и спасет верою покланяющихся Его Божественному и Твоему Пречистому образу, Дево Неискусобрачная.

Кондак, глас 8

Притецем, людие, к Деве и Богородице Царице, благодаряще Христа Бога нашего, и, к Тоя чудотворней иконе умильно взирающе, припадем и возопием Ей: о Владычице Марие, присетивши страну сию Твоего честнаго образа явлением чудесно, спасай в мире и благовременстве страну нашу, и вся христианы, наследники показующи Небесныя жизни, Тебе бо, верно зовем: радуйся, Дево, миру спасение.

Величание

Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Пред иконой Пресвятой Богородицы «Югская» молятся об исцелении различных недугов и болезней.

Преподобного Мефодия, игумена Пешношского (1392).

Праведных Марфы и Марии, сестер праведного Лазаря (I).

Молитвы преподобному Мефодию, игумену Пешношскому

Тропарь преподобному Мефодию, игумену Пешношскому, глас 8

Божественною любовию от юности распаляемь, вся яже в мире красная возненавидев, Христа единаго возлюбил еси, и сего ради в пустыню вселився, в ней обитель сотворил еси, и собрав иноков множество, приял еси от Бога чудес дар, отче Мефодие, и был еси о Христе собеседник и спостник преподобному Сергию, с нимже у Христа Бога испроси православным христианом здравие и спасение, и душам нашим велию милость.

Кондак, глас 4

Послушания добрый рачитель быв, безплотныя враги слезными молитвами твоими крепко посрамил еси и явился еси Пресвятыя Троицы жилище, Юже зря, блаженне, ясно, Богомудре Мефодие преподобне, чудес дар от Нея приял еси. Темже исцеляеши с верою приходящих недуги, утоляеши скорби и молишися непрестанно о всех нас.

Величание

Ублажаем тя, преподобне отче Мефодие, и чтим святую память твою, наставниче монахов и собеседниче Ангелов.

Молитвы праведным Марфе и Марии, сестрам праведного Лазаря

Тропарь праведным Марфе и Марии, сестрам праведного Лазаря, глас 3

Праведнаго Лазаря Боголюбивыя сестры, Марфо и Марие преславныя, чистым сердцем Христа в житии вашем возлюбили есте, мироносиц вземше чин, и Его, яко Сына Божия, безбоязненно исповедали есте, сего ради ныне во обителех Отца Небеснаго со Ангелы и всеми святыми славно царствуете. Умолите, Егоже возлюбили есте, и нам, грешным, в вере и любви Христовой утвердитися и Царствия Небеснаго сподобитися.

Величание

Величаем вас, святии праведнии Марфо и Марие, и чтим святую память вашу, вы бо молите о нас Христа Бога нашего.

Благоверного князя Феодора Ярославича (брата святого Александра Невского), Новгородского (1233).

Обретение мощей преподобных Вассиана и Ионы Пертоминских, Соловецких чудотворцев (1599).

Святый благоверный великий княже Феодоре! Ты от княжеския крове происшед в мир сей, княжескую славу навсегда имел еси наследовати, и вся красная мира сего быша в руку твоею, егда на земли сей обитал еси. Но ты, аще и в младых летех скончался еси, но исполнил еси лета долга и душевнаго сопостата, еще млад сый, победити в силах был еси. И чистоту в житии твоем соблюл еси, чесо ради крепкий во бранех Господь и причте тя, яко добраго воина, к Безплотному Своему воинству в Небесных обителех, Россию же защити рукою брата твоего, святаго благовернаго великаго князя Александра Невскаго. Сего ради молим тя, небесный воине Христов: даждь и нам познати, сколь ничтожно и преходяще все житейское и сколь близок всегда должен быти сердцу нашему Бог наш, да выну помышляем о Горнем, не о земном, да неусыпно ищем вечнаго Небеснаго отечества, да прославляем Бога жизнию и делами нашими и с мужеством отражаем стрелы похоти, греха и соблазнов. Ты из среды волнующагося душевных страстей моря к тихому пристанищу в краткое время безбедно достигл еси, и, аще устремляхуся мира сего волны, еже потопити невинную юность твою, но ничтоже успеша, ковчег бо тебе бысть чистота, кормило – Православная вера, котва – твердая на Бога надежда, ветрило – любовь к Богу и ближнему. Молим тя, угодниче Божий, усвой и нам эти свойства своя и добродетели, охлаждай похоти сердца нашего, помогай нам в борьбе со страстьми нашими, исходатайствуй нам у Господа решительное отвращение от пороков, постоянство в добродетели, терпение в бедствиих, великодушие в горестех, твердую на Бога надежду во всех обстоятельствех настоящия жизни, любовь к врагом, желание добра всем, любящим и ненавидящим нас. Ты, уверен быв, яко златотканныя ризы общему подлежат тлению, потщался еси в животе твоем из добродетелей исткати себе ризу нетления, в нейже ныне красуешися, внуши и нам, да отвращаемся от всех мирских удовольствий, от всякия плотския похоти, от всея земныя славы и от всякаго тленнаго сокровища, да презираем обольщение роскоши, и гнушаемся обаяния лести и порока, и да радуемся, егда терпим за Христа лишения, уничижения, гонения, презрения, клевету и озлобление. Горяху к тебе, святый княже, любовию российския сынове, видяще тя, от благочестиваго корене отрасль благочестивую, и великолепный брак тебе на земли готовляху сродницы и друзи твои, не ведуще Божия Промысла, яко Бог благоволил избрати, во еже тебе безбрачну служити на браце Сына Его Единороднаго, и ты, святый благоверный княже, предварив нас в Царстве благодати, привлецы и нас своею любовию в Царство Небесное, буди для нас орудием человеколюбия и благости Божией, отклоняй от нас истинная бедствия, утешай нас в горестех и печалех, укрепляй своим предстательством у Господа силы верныя на доброделание во славу имене Божия и в преспеяние Царства Христова, да процветают здравием к благоденствию и возрастают от силы в силу и от славы в славу вси народи земли Российския, да будут всегда одушевлени благочестием, правдою, мужеством, преданностию отечеству и всеми добродетельми, да и мы вместе с тобою удостоимся превозносити благость, любовь и милосердие Единаго, в Троице Святей славимаго Бога, Отца и Сына и Духа Святаго, ныне и присно и во веки веков. Аминь.

Тропарь благоверному князю Феодору Ярославичу, брату благоверного князя Александра Невского, Новгородскому, глас 8

От благочестиваго корене отрасль благочестивая прозябл еси, скончався в юности, лета долга твоими добродетельми исполнил еси, благоверный Феодоре, сего ради Владеющему временами молимся, да молитвами твоими подаст нам долготу лет и низпослет стране нашей велию и богатую милость.

Кондак, глас 4

В благочестии рожденна, в страсе Божии воспитана, в житии целомудрие стяжавшаго, по успении же нетлением телесе просиявшаго, благовернаго Феодора во святых почитая, смиренно молимся Тебе, Всесильный Владыко, да и во веки прославляеши святыми Твоими страны наша российския.

Величание

Величаем тя, благоверный Феодоре, и чтим святую память твою, ты бо молиши за нас Христа Бога нашего.

О преподобнии и всечестнии отцы Вассиане и Ионо, угодницы Христовы блаженнии и чудотворцы преславнии! Постничеством Богу первее угодивше и делы благочестно на земли подвизавшеся, яко светила светлая, по смерти в мире возсиявше, просвещающе верных чудес светлостию, вы заступницы теплии показастеся. Многих, в скорбех и бедах страждущих и погибнути имущих, здравы сохранисте, непослушавших же завещания вашего и маловерующих отмстительне наказасте, и прежде заблуждшей жене путевожди бысте, и ослепшему паки прозрение даровасте. Дерзостне же коснувшагося целебных мощей ваших напрасно отринусте и, разслаблением наказавше, помиловасте. К сим же и иная преславная соделасте, и бывшее оскудение во обители вашей сугубо исполнисте, соблюдающе ю. Молимся убо ныне вам, о преблаженнии отцы, услышите моление наше, не презрите нас в бедах и скорбех, призывающих вас верою, будите помощницы нам скории и покровители, сохраните же во благоденствии, мире и тишине отечество наше. К сим же и духовнаго о вас собрания не оставите до конца, посещающе я всегда, о преподобнии, изобилованием всяцем, и молитеся присно о нас ко Господу, да молитвами вашими грехов прощение получим, и Царствия Небеснаго сподобимся благодатию Его, яко Тому подобает всякая слава, честь и поклонение, ныне и присно и во веки веков. Аминь.

Тропарь преподобным Вассиану и Ионе Пертоминским, Соловецким, глас 8

Прежде отвержением мира, яко морскаго треволнения, избегосте, отцы преподобнии, послежде же изволением Божиим в водах морских кончину блаженную приясте и к неболезненному покою преставистеся от земли радующеся. Тем и по кончине от Христа Бога прославистеся чудесы обильно, теплии в бедах верным помощницы показастеся. И ныне на Небесех предстояще престолу Христову, Вассиане преблаженне и Ионо преславне, молитеся присно о душах наших.

Кондак, глас 2

Яко сокровище богатно, верным Божественная благодать из морских недр издаде мощи ваша, отцы преблаженнии, и в месте пусте целы и невредимы обретошася преславно, и тако вас ради ныне славится Бог, Емуже со дерзновением предстояще ныне на Небесех, Вассиане и Ионо досточуднии, молитеся непрестанно о всех нас.

Величание

Ублажаем вас, преподобнии отцы Вассиане и Ионо, и чтим святую память вашу, наставницы монахов и собеседницы Ангелов.

Преподобного Паисия Угличского (1504).

Преподобного Ионы Климецкого (Клименецкого), Олонецкого (1534).

О преподобне отче наш Паисие! Не забуди убо нас, чад своих, Богом дарованную ти паству, юже ты сам собрал еси. Без твоея бо помощи ничтоже можем благо сотворити, но, в дому пребывающе Пречистыя Богородицы, во ограде твоей, надеемся Богу угодити. Отче снятый, соблюди нас твоими молитвами и заступи нас от находящих зол, да, твоими молитвами соблюдаемы, Царствия Небеснаго сподобимся о Христе Иисусе, Господе нашем. Емуже слава со Отцем и Пресвятым, и Благим, и Животворящим Его Духом, ныне и присно и во веки веков. Аминь.

Тропарь преподобному Паисию Угличскому, глас 8

Христовы ради любве отечество и род оставил еси, и, ангельскому житию поревновав, в пустыню вселился еси, в нейже многотрудное житие явил еси и чудес дарования от Бога приял еси, Паисие преподобне, моли Христа Бога спастися душам нашим.

Ин тропарь, глас тойже

Христовы ради любве отечество и род оставил еси и, ангельскому житию поревновав, духовному отцу твоему, преподобному Макарию, подражатель быв, града Углеча достигл еси и близ того при водах в пустыню, Ангелом показанную, вселился еси, и обитель прекрасну Матери Божией воздвигл еси, и множество монахов собрал еси, имже и наставник ко спасению быв, и чудес дарования от Бога приял еси, Паисие преподобне, моли Христа Бога спастися душам нашим.

Ин тропарь, глас тойже

Слез твоих теченьми пустыни безплодное возделал еси и, иже из глубины воздыханьми, во сто трудов уплодоносил еси, и был еси светильник вселенней, сияя чудесы, Паисие, отче наш, моли Христа Бога спастися душам нашим.

Кондак, глас 2

Чистотою душевною божественно вооружився и непрестанныя молитвы, яко копие, имый, крепко ссекл еси бесовское ополчение, Паисие, отче наш, моли непрестанно о всех нас.

Ин кондак, глас 8

Украшен добродетельми, преподобне Паисие Богодухновенне, Церкве Христовы красота был еси, подвиги бо иноческими украси ю, блаженне. Темже молим тя: молися ко Господу сподобити нас от всякия брани борителя, вопиющих ти: радуйся, отче преблаженне.

Величание

Ублажаем тя, преподобне отче Паисие, и чтим святую память твою, наставниче монахов и собеседниче Ангелов.

О преподобне и богоносне отче наш Ионо! Ты куплю житейскую еще совершая и по водам езера Онега плавая, бурею на луду водную извержен был еси, и на брезех сих тихое пристанище от волнений житейских обрел еси. Темже и неленостно во трудех, молитвах и слезах Господа ради подвизался, куплю духовную добре совершил еси, и купец премудр Царствия Небеснаго явился еси, и ныне во дворех небесных веселишися, духом твоим неотступен от обители Клименицкия пребывая, идеже многотрудное твое тело почиет. Темже и плавающим по водам онежским путь указуеши и от потопления воднаго избавляеши, многажды чудесне призывающим тя являяся, и всем скорый помощник и теплый молитвенник бываеши. И ныне к раце мощей твоих смиренно припадающе, прилежно молим тя, угодниче Божий: призри на ны окаянныя и непотребныя, морем грехов потопляемыя, и бурею душетленных страстей волнуемыя, и с кораблем душетленным на луде злых обычаев сокрушаемыя. Буди о нас ходатай ко Господу, к Немуже дерзновение доброе стяжал еси: пролей к Нему теплую молитву твою, да утишит бурю страстей наших, и хладная сердца наша огнем божественныя любве Своея да согреет, и тако да сподобит нас теплое покаяние Ему приносити, останок же дней наших благоугодне пред Ним пожити, труды же и скорби жития сего терпеливно, безропотне и со благодарением понести: егда же приспеет страшный час исхода нашего от сего жития, да поможет нам грозная мытарства воздушная неудержанно миновати, ниже рыкающим мысленным львом души наша поглотити да попустит, но бездну грехов наших в мори милосердия Своего да погрузит, и ради Своея неизреченныя любве и милости к роду человеческому нас да помилует, причастники Своего Царствия соделав, и да сподобит тамо наслаждатися Его божественною любовию, купно с тобою и со всеми святыми, во веки веков. Аминь.

Тропарь преподобному Ионе Климецкому (Клименецкому), Олонецкому, глас 4

Ангельскому житию поревновав, блаженне Ионо, оставил еси отечество твое, Великий Новград, и, пришед в пределы Олонецкия и в пустыню вселився, в трудех, молитвах и слезах подвизался еси, и, яко мудрый купец, Царствие Небесное наследовал еси. Темже любовию вопием ти: моли Христа Бога, да спасет души наша.

Кондак, глас 2

Христовым стопам последователь быв, блаженне Ионо, радуяся, вселился еси в пустыню, Вышняго Промыслом наставляемь, и, не убоявся вражиих приражений, якоже столп непоколебим, уготовал еси себе в жилище Духу Пресвятому, мы же, память твою совершающе, вопием радостно: радуйся, яко озаряеши нас чудесы твоими, радуйся, яко оставил еси временная ради будущих благ, радуйся, яко возставляеши ленивых ко спасению. Моли убо Христа Бога, отче преподобне, да спасет души наша в День Судный.

Величание

Ублажаем тя, преподобне отче Ионо, и чтим святую память твою, наставниче монахов и собеседниче Ангелов.

Мученика Феодота Анкирского (303).

Собор Ивановских святых.

Тропарь священномученику Феодоту Анкирскому, глас 4

И нравом причастник, и престолом наместник апостолом быв, деяния обрел еси, богодухновенне, в видения восход, сего ради слово истины исправляя, и веры ради пострадал еси даже до крове, священномучениче Феодоте, моли Христа Бога спастися душам нашим.

Кондак, глас 4

Во святителех благочестно пожив и мучения путь прошед, идольския угасил еси жертвы и поборник быв твоему стаду, богомудре, темже тя почитающе тайно вопием ти: от бед избави ны присно твоими мольбами, отче наш Феодоте.

Величание

Величаем тя, священномучениче Феодоте, и чтим святую память твою, ты бо молиши за нас Христа Бога нашего.

Великомученика Феодора Стратилата (319).

Святителя Феодора, епископа Суздальского и Ростовского (1023).

Обретение мощей благоверных князей Василия и Константина Ярославских (XIII).

Ярославской (XIII) и Урюпинской (1821) икон Божией Матери.

О святый, славный и всехвальный великомучениче Феодоре Стратилате! Молим тя пред иконою твоею святою: моли с нами и о нас, рабех Божиих (имена), умоляемаго от Своего благосердия Бога, да милостивно услышит нас, благостыни у Него просящих, и вся наша ко спасению и житию нужная прошения да исполнит. Еще же молим тя, святый победоносче Феодоре Стратилате, разруши силы возстающих на ны врагов, видимых и невидимых. Умоли же Господа Бога, всея твари Создателя, избавити нас от вечнаго мучения, да всегда прославляем Отца и Сына и Святаго Духа и твое исповедуем предстательство, ныне и присно и во веки веков. Аминь.

Молитва ко Господу Богу святого великомученика Феодора Стратилата

Господи Боже всесильный, всех уповающих на милость Твою не оставляли, но защищали их! Буди мне милостив и соблюди мя от прелести вражия Твоим защищением, да не паду пред сопротивниками моими, и да не порадуется враг мой о мне. Предстани мне, Спасителю мой, в подвиге сем за имя Твое святое. Ты мя укрепи и утверди и подаждь силу стати мужественно за Тя до крове и положити душу мою по любви к Тебе, якоже и Ты, возлюбив нас, положил еси на Кресте душу Свою за нас. Аминь.

Тропарь великомученику Феодору Стратилату, глас 4

Воинствословием истинным, страстотерпче, Небеснаго Царя воевода предобрый был еси, Феодоре, оружиями бо веры ополчился еси мудренно, и победил еси демонов полки, и победоносный явился еси страдалец. Темже тя верою присно ублажаем.

Кондак, глас 2

Мужеством души в веру оболкийся, и глагол Божий, аки копие, в руку взем, врага победил еси, мучеников превелий Феодоре, с ними Христу Богу моляся не престай о всех нас.

Величание

Величаем тя, страстотерпче святый Феодоре, и чтим честная страдания твоя, яже за Христа претерпел еси.

Молитвы святителю Феодору, епископу Суздальскому и Ростовскому

О велицыи угодницы Христовы и чудотворцы, святителие Феодоре и Иоанне! Се мы, недостойнии и грешнии, скорбьми многими угнетаемии, к вам усердно прибегаем и со упованием крепким молимся: отцы благомилостивии и благопослушливии, милостивно услышите ныне глас наш молебный и потщитеся на помощь нашу, и яко при жизни вашей всем скорбящим и озлобленным помощницы и утешителие бысте, тако и ныне любовь вашу к нам явите, благодатным действом благоприятных молитв ваших претворяюще скорбь нашу в радость, печаль же на утешение: вся бо можете о укрепляющем вас Христе, Егоже вернии служители бысте: от Негоже приявше вся обетованная благая, ниспошлите и нам великую и богатую милость Господню, да воспоем и прославим дивнаго во святых Своих Бога, Отца и Сына и Святаго Духа, ныне и присно и во веки веков. Аминь.

Тропарь святителю Феодору, епископу Суздальскому, глас 8

В молитвах бдя, сердцем же о стаде твоем выну болезнуя, учением своим всех просветил еси, Феодоре премудре. Темже Христа Бога моли, в день памяти твоея даровати нам велию милость.

Ин тропарь, глас тойже

В молитве бдя, Горняя желая, дольняя возненавидел еси, и, сердцем болезнуя, выну о стаде своем печешися, учением бо своим всех просветил еси, Феодоре премудре, Христа Бога моли в памяти твоей даровати нам велию милость.

Кондак, глас 3

Яко велие солнце, возсия преславная память твоя, премудре Феодоре, в нейже подаваеши в бедах сущим спасение, притекающим к тебе усердно, благодатию, еюже облагодати тя Христос в жизни нескончаемой.

Величание

Величаем тя, святителю отче Феодоре, и чтим святую память твою, ты бо молиши за нас Христа Бога нашего.

Молитвы благоверным князьям Василию и Константину Ярославским

Тропарь благоверным князьям Василию и Константину Ярославским, глас 2

Ваше отечество хвалится обагрением кровей ваших, Церковь же Божия радуется, приемши телеса ваша, людие, песненный лик составлыне, духовною цевницею вопиют: ликуй, Василие, радуйся, Константине, Ярославлю слава и всей России радосте.

Ин тропарь, глас 8

Возвысившеся на добродетель, к желанию крайнему, и достигосте к Небесней высоте, благовернии велиции князи Василие и Константине, и безстрастным житием украсисте души своя, лощением же изрядно победисте бесовския полки и восприясте чистую совесть, в молитвах, яко безплотнии, пребысте, возсиясте в мире, аки солнце, преславнии, молите спастися душам нашим.

Кондак на преставление, глас 8

Яко цвети честнии различнии, в райстей пещи процветше невещественно, отечеству своему славу велию и сродникам похвалу и честь явльше, всеистиннии победницы, великий Василие и славный Константине, но убо не престайте молящеся о граде нашем и о всех рабех своих, избавити их от напастей, и бед, и всех лютых обхождений, вопиющих вам: радуйтеся, граду нашему Ярославлю великое утверждение.

Кондак на обретение мощей, глас 4

Днесь Церковь расширяет недра своя и приемлет многоцелебныя мощи ваша, добропобеднии страдальцы, Василие славне и Константине Богомудре, и, яко шипок благовонный, напояется пречудными ароматы, богатными чудодеянии от неистощимых сокровищ, от преславных мощей ваших, и радостно чад своих созывает вопити, людие: радуйся, двоице пречудная, отечеству своему стено необоримая.

Величание

Величаем вас, страстотерпцы Христовы, благовернии князи Василие и Константине, и чтим честная страдания ваша, вы бо молите за нас Христа Бога нашего.

Молитва ко Пресвятой Богородице пред Ее иконою «Урюпинская»

О Всемилостивая Госпоже, Дево Богошему и сокрушенно ныне предстоящих образу Твоему услыши глас. Вемы бо, о Содетеля нашего Мати, яко Ты еси предстательство христиан непостыдное и ходатайство ко Творцу непреложное. Вемы и сие, яко беззакония наша превзыдоша главы наша и яко бремя тяжкое отяготеша на нас, и уже несмы достойни видети высоту Небесную, ниже воззрети ко престолу славы Сына Твоего и Бога нашего, но достойни явихомся мук и вечнаго осуждения. Сего ради к Тебе припадаем, Тя просим умиленно, к Тебе со слезами взываем: вознеси к Нему Матернее Твое моление, да не отвержет нас грешных от лица Своего, но, яко Милостив, да простит нам согрешения наша вольная и невольная, на путь спасения нас наставляя и свыше силою ко творению заповедей Своих укрепляя. Да сохранит нас от соблазнов мира, от вожделений греховных, от козней диавольских и от нападения видимых врагов. Да благословит дела рук наших, подавая обители сей и всякому граду и стране обилие благ земных. Да сотворит нам дни благи и безмятежны, да оградит миром Церковь Свою Святую и разстоящаяся да соединит Той, яко Благ Господь, Долготерпелив и Многомилостив, от всея твари со Отцем и Святым Духом славимый во веки веков. Аминь.

Тропарь Божией Матери ради иконы Ее «Урюпинская», глас 3

Явилася еси на древе в Донской земли благодатная Твоя икона, Богородице, больныя исцеляти, заблуждшия обращати; темже умильно молимся Тебе: избави град наш от всякаго зла и спаси люди, к Тебе притекающия.

Кондак, глас 5

Всеблагая Чистая Богородице, к Тебе прибегаем, вернии, Тобою бо познахом милость Божию, чудную икону Твою, от неяже вси здравие и спасение приемлем.

Величание

Величаем Тя, Пресвятая Дево, и чтим образ Твой святый, от него же истекает благодатная помощь всем, с верою притекающим к нему.

Пред иконой Пресвятой Богородицы «Урюпинская» молятся об исцелении слепых, страдающих параличом, ревматизмом, головной болью, расслаблением, слабоумием, об одержимых сильной тоской.

О Пресвятая Дево, Мати Господа вышних сил, Небесе и земли Царице и града нашего Ярославля всемощная Заступнице! Приими хвалебное пение сие от нас недостойных раб Твоих и вознеси молитвы наша ко престолу Бога Сына Твоего, да милостив будет неправдам нашим и пробавит благость Свою чтущим Всечестное имя Твое и с верою и любовию покланяющимся чудотворному образу Твоему. Несмы бо достойни от Него помиловани быти, аще не Ты умилостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомненней и скорей Заступнице нашей, и Тебе, яко всемогущей Помощнице, сами себе и друг друга и всю жизнь нашу по Христе Бозе предаем, ныне и присно и во веки веков. Аминь.

Тропарь, глас 4

К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

Кондак, глас 6

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.

Величание

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Пред иконой Пресвятой Богородицы «Ярославская» молятся об исцелении телесных болезней.

Преподобного Кирилла, игумена Белоезерского (1427).

Праведного Алексия Московского (1923).

Молитвы преподобному Кириллу, игумену Болоезерскому

Тропарь преподобному Кириллу, игумену Белоезерскому, глас 1

Яко крин в пустыни давидски процвел еси, отче Кирилле, злострастия терние искореняя, и собрал еси в ней ученик множество, страхом Божиим и учением твоим наставляемых, ихже и до конца, яко чадолюбивый отец, не оставил еси, посещая, да вси вопием: слава Давшему ти крепость, слава венчавшему тя, слава Действующему тобою всем исцеления.

Кондак, глас 8

Яко преобидев тленная и долу влекущая мудрования, отче, к вышнему течению радостно устремился еси, и тамо со святыми Пресвятей Троице предстоя, моли от враг сохранитися стаду твоему, яко да святое твое успение празднующе, вопием: радуйся, преблаженне Кирилле, отче наш.

Величание

Ублажаем тя, преподобне отче Кирилле, и чтим святую память твою, наставниче монахов и собеседниче Ангелов.

Молитвы праведному Алексию Московскому

Тропарь праведному Алексию Московскому, глас 4

Помози в бедах, утеши в скорбех, пастырю добрый, отче Алексие. Подвигом бо старчества миру просиявый, веру и любовь Христову во мраце беззакония исповедал еси, болезнуя сердцем о всех притекающих к тебе. И ныне за ны Бога моли, любовию чтущия тя.

Кондак, глас 4

Велии труды любве и милосердия подъял еси, праведный старче Алексие, от святаго пастыря Кронштадтскаго благословение на помощь страждущим прияв, беды и скорби людския яко вериги на рамо свое возложи. Мы же ведуще тя молитвенника дерзновенна ко Господу, со умилением зовем ти: моли Христа Бога спастися дущам нашим.

Величание

Величаем тя, святый праведный отче Алексие, и чтим святую память твою, ты бо молиши за нас Христа Бога нашего.

Обретение мощей святителя Василия, епископа Рязанского (1609).

Блаженной Любови Рязанской (1921).

Святителя Иоанна, митрополита Тобольского (1715).

Собор Сибирских святых.

Собор Рязанских святых.

Молитвы святителю Василию, епископу Рязанскому

Тропарь святителю Василию, епископу Рязанскому, глас 4

Первее в Муроме святительством почтен был еси, из негоже неправедно изгоняемь, на мантию, яко на легкий корабль, взошел еси, на нейже паче естества, яко безплотен, по водам шествие творя, промышлением Вышняго и заступлением Богоматере управляеммь, богоспасаемаго града Рязани достигл еси и в нем, архиерейства престол восприим, богоданную паству рязанскую добре упасл еси, святителю отче наш Василие, моли Христа Бога спастися душам нашим.

Ин тропарь, глас 4

Правыя веры и чистаго жития крепкий хранителю, чудесно, речными волнами, на мантии твоей, с иконою Пречистыя, от неправой клеветы и нечистаго осуждения, из Мурома принесен был еси в страну Рязанскую, идеже утвердив престол своего архиерейства, добре упасл еси богоданную тебе паству, святителю отче наш Василие, моли Христа Бога спастися душам нашим.

Кондак, глас 8

Яко многосветлая звезда, от града Мурома возсиял еси, святителю Василие, по водам же дошед до града Рязани, Церковь Божию добре упасл еси, просвещая люди учением и житием твоим. Поминай и ныне чада твоя, молим тя, наставниче наш добрый, и за ны Христу Богу и Пречистей Его Матери молися, да благодарною душею зовем ти: радуйся, угодниче Христов и теплый к Богу о нас молитвенниче.

Величание

Величаем тя, святителю отче Василие, и чтим святую память твою, ты бо молиши за нас Христа Бога нашего.

О блаженная дево Любовь, угодница Христова! Услыши нас грешных, молящихся тебе. Приими молитву нашу и принеси ю к милостивому Человеколюбцу Богу, Емуже ты ныне в радостях святых и с лики Ангел предстоиши. Умоли Его благосердие, да сохранит град Свой сей (Рязань), в нем же добродетельно поживе, Богу угодила еси, от всех навет вражиих, да не осудит нас по беззакониям нашим, но да сотворит с нами по милости Своей, и испроси нам у Христа и Бога нашего мирное и безмятежное житие, здравие душевное и телесное, земли благоплодие и во всем всякое изобилие и благоденствие, и да не во зло обратим благая, даруемая нам от Всещедраго Бога, но во славу Его и в прославление твоего заступления, паки молим тя, блаженная мати наша Любовь, посещай нас, тебе молящихся, в нуждах наших, да тобою заступаеми, сподобимся ны, грешныя, в день судный одесную Сына Божия стати твоими святыми молитвами ко Спасу и Пресвятей Его Матери, Преблагословенней Владычице нашей Богородице, от всех родов ублажаемой, ныне и присно и во веки веков. Аминь.

Тропарь блаженной Любови Рязанской, глас 5

Любовью наречена была еси во Святом Крещении, любовь Христову познала еси, в житии дерзновение велие стяжала еси, темже к тебе усердно прибегаем из глубины сердец наших взывающи: молися убо ко Господу, Любовь блаженная, богомудрая, даровати мирови мир и душам нашим велию милость.

Кондак, глас 3

Святителем Христовым Николаем исцеленная и на служение Богу и людем имже благословенная, крест свой юродства с любовию до конца пронесшая. Святая блаженная Любовь, не остави нас, почитающих святую память твою, ныне предстоя в лике святых престолу Пресвятыя Троицы, молися о благоденствии отечества твоего и о спасении душ наших.

Величание

Ублажаем тя, святая блаженная мати Любовь, и чтим святую память твою, ты бо молиши за нас Христа Бога нашего.

О святителю Христов Иоанне, Божию престолу со святыми предстояй! Ты еси отец наш любвеобильный и молитвенник наш теплый. Умоли Господа Бога, да подаст нам коегождо потребно полезная: скорбящим утешение, немощным здравие, заблуждшия да наставит и обратит на путь покаяния, распри и раздоры умирит, неведущия Христа люди на путь спасения да обратит и всех нас единением духа и любве в Единей Святей Своей Церкви соединит, да сохранит нас от глада, града, труса, потопа, огня, меча, междоусобныя брани и напрасныя смерти, наипаче же от искушений, облежащих нас в жизни сей, да дарует нам мирное пожити зде житие и веру свою православную невредиму соблюсти. О святый угодниче Христов, архипастырю предобрый, молитвенниче наш неусыпный! От юности всего себе Богу посвятив, равноангельное житие стяжал еси, исполнен бе радости духовныя, яже озаряше светлость лика твоего и сердца верных утешаше, поистине бе светильник горяй и светяй, святолепно пожив, от Господа сподоблен бе дара прозрения, время кончины своея предуведа, моляся пред образом Пречистыя Богородицы, коленопреклоненне преставися; ныне проси Ю о нас, да будет нам Покровительница в сей многотрудней жизни и в час кончины нашея да умолит Всеблагаго Господа сподобитися нам в лице благоугодивших предстати престолу Его и восхвалити в Троице славимаго Бога, Отца и Сына и Святаго Духа, во веки веков. Аминь.

Тропарь святителю Иоанну, митрополиту Тобольскому, глас 8

Наставниче благочестия, сиротствующих питателю, скорбящих утешителю, недугующих врачу безмездный, душею страждущим скорый помощниче, теплый молитвенниче ко Господу, святителю отче Иоанне, моли Христа Бога спастися душам нашим.

Кондак, глас 2

Явился еси во тьме неведения пребывающим просветитель, вдов и сирот утешитель, дивный врач немощствующих, младенцев и отроков наставник, родителем же пресветлое радование, святителю отче Иоанне, моли Христа Бога, подати стране нашей в вере утверждение, воинам на враги победу и одоление, людем же своим велию милость.

Величание

Величаем тя, святителю отче Иоанне, и чтим святую память твою, ты бо молиши за нас Христа Бога нашего.

Преподобного Варнавы Ветлужского (1445).

Перенесение мощей преподобного Ефрема Новоторжского (1572).

Иконы Божией Матери, именуемой «Достойно есть» («Милующая») (X).

О всеблажнне отче преподобне Варнаво, теплый заступниче и помощниче с верою призывающим тя! Избави нас молитвами твоими ко Господу от всякаго обстояния бесовскаго. Изми нас, окаянных рабов твоих, о чудотворче Варнаво, от уст пагубнаго змия, ищущаго пожрети нас и свести во ад живых. Прости нас, отче, елико согрешихом ти, исторгни нас от греха и всякия напасти, приходящия грехов ради наших. Подаждь душам нашим утешение, всади в сердца наша страх Суда Божия, избави нас от врагов наших видимых и невидимых, тебе бо имамы тепла молитвенника и заступника, еже в бедах сущия и в грехи впадшия. Ты бо явися столп благочестия, воздержания правило, смиренномудрия образ, целомудрия наставник, убогим и сиротам заступник и хранитель прибегающим к тебе. Кто убо по достоинству может похвалити равноангельное твое житие и кто может изчести твоих трудов подвиги и слезы ко Господу? Воистинну яко солнца светлейши возсия твоя исправления, ревнитель бо бысть всем святым, преподобных и праведных учитель духовный и всем, призывающим тя, молитвенник ко Пресвятей Троице. Ты, яко мир оставил еси и яже в мире, и нас приведи ко Господу молитвами твоими, отче честнейший, да и мы сподобимся вечных благих, ихже наслаждаешися: Небесныя славы, желаемаго Иисуса Христа и сладчайшаго Владыки и Господа всех. Емуже подобает всякая слава, честь и поклонение, со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.

Тропарь преподобному Варнаве Ветлужскому, глас 1

Желанием духовным распалився и мятежи мирския отринув, к Богу любовию прилежно присовокупися. И Того вседушне взыскуя, во внутреннюю пустыню отшел еси, при водах вселися, идеже во слезах и трудех пребывая многолетное время, в терпениих мнозех житие ангельское проходил еси в наставлении Божественнаго Разума и множество монахов собрал еси, мудре, ихже посещая не остави, Варнаво преподобне, отче наш, Пресвятей Троице моляся от зол всяческих избавити и спасти души наша.

Кондак, глас 8

От юности, преподобне, плоть твою в постех и молитвах источил еси и, крест твой взем, усердно последовал еси Христу, темже и к Вышним течение радостно совершил еси, идеже со всеми святыми предстоиши. И ныне стадо твое посещай, поминая чтущих всесвятую память твою, да вси благодарственно вопием ти: радуйся, Богомудре Варнаво, наставниче пустынный.

Величание

Ублажаем тя, преподобне отче Варнаво, и чтим святую память твою, наставниче монахов и собеседниче Ангелов.

Молитвы преподобному Ефрему Новоторжскому

Тропарь преподобному Ефрему, архимандриту Новоторжскому, глас 1

Божественною свыше благодатию просветився, Богомудре, и по смерти яви тя светлость жития твоего, темже источаеши мирови благоухание, иже с верою притекающим к раце мощей твоих, Ефреме преподобне. Тем вопием ти: слава Давшему ти чудесем благодать, слава Прославльшему тя в чудесех, слава Действующему тобою всем исцеления.

Кондак, глас 8

Светозарную лучу похвалим, преподобне, твою честную раку, многосветлою свещею просвещает бо Господь церковь твою от цельбоноснаго гроба твоего и озаряет омраченная наша сердца. Якоже солнце незаходимое, отче, подобие образа твоего возсия нам, и град Торжек тобою благодать приемлет, обогащающу ти всех нас добротою чудес, содеянием благодати поющих ти: аллалуия.

Величание

Ублажаем тя, преподобне отче Ефреме, и чтим святую память твою, наставниче монахов и собеседниче Ангелов.

Молитвы ко Пресвятой Богородице пред Ее иконою «Достойно есть» («Милующая»)

Тропарь Божией Матери ради иконы Ее «Достойно есть» («Милующая»), глас 4

Притецем, вернии, со дерзновением к милующей Царице Богородице и умильно воззовем к Ней: низпосли на ны милости Твоя богатыя: Церковь нашу сохрани, люди во благоденствии соблюди, землю нашу избави от всякаго обстояния, мир даруй мирови и спасение душам нашим.

Ин тропарь, глас тойже

Отцев все Афонское множество, соберитеся, верно празднующе, днесь радующеся и светло восклицающе вси в веселии: Божия бо Мати ныне от Ангела преславно воспевается. Темже яко Богородицу присно Сию славим.

Кондак, глас 4

Празднует днесь весь Афон, яко песнь прият от Ангела чудно Тебе, Чистей Богоматери, Юже вся тварь чтит, славящи.

Ин кондак, глас 8

Архангельский глас вопием Ти, Всецарице: достойно есть, яко воистину, блажити Тя, Богородицу, Присноблаженную и Пренепорочную и Матерь Бога нашего.

Величание

Достойно есть величати Тя, Богородице, Честнейшую Херувим и Славнейшую без сравнения Серафим.

Пред иконой Пресвятой Богородицы «Милующая», или «Достойно есть», молятся при душевных и телесных болезнях, при окончании всякого дела, при эпидемиях, о счастии в браке, при несчастных случаях.

Преподобного Онуфрия Великого (IV).

Преподобного Петра Афонского (734).

Обретение мощей (1650) и второе прославление (1909) благоверной княгини Анны Кашинской.

Преподобного Арсения Коневского (1447).

Преподобных Вассиана и Ионы Пертоминских, Соловецких (1561).

Блаженного Иоанна, Христа ради юродивого, Московского чудотворца (ок. 1589; обретение мощей 1672).

Молитвы преподобному Онуфрию Великому, пустынножителю

Тропарь преподобному Онуфрию Великому, глас 1

Желанием духовным пустыни достигл еси, богомудре Онуфрие, и яко бесплотен, в ней многолетне подвизался еси трудолюбне, соревнуя пророком Илии и Крестителю, и, от руку ангельску Таин Божественных насладився, ныне во свете Святыя Троицы купно с ними веселишися, моли спастися нам, твою память почитающим.

Кондак, глас 3

Сиянием Духа Пресвятаго, богомудре, просвещься, оставил еси яже в житии молвы, пустыню же достиг, преподобне отче, возвеселил еси иже над всеми Бога и Зиждителя, сего ради прославляет тя Христос, блаженне, Великий Дарователь.

Величание

Ублажаем тя, преподобне отче Онуфрие, и чтим святую память твою, наставниче монахов и собеседниче Ангелов.

К святому преподобному Онуфрию прибегают с молитвою об избавлении от скоропостижной смерти и в безнадежных детских болезнях, а женщины – в трудных родах.

Преподобнии и богоноснии отцы наши Онуфрие и Петре, светила земная пресветлая, от темных мест пещерных по всей земли славно просиявшии, и сию многими светозарными подобонравнаго себе жития звездами онебесившии, и высоких добродетелей светлостьми и чудес божественных блистаньми люди удивившии! Се вы ныне, смертным западом плотски на время во гроб зашедше, душам со Христом, Солнцем Правды, пребываете, и суще праведницы, просвещаетеся яко солнце во Царствии Небеснем. Тамо убо молитвенная ваша к Богу Свету лучи о всей вселенней простирающе, не забывайте и ны, присныя ваша молитвенники, аще и в нощи страстей и скорбей пребывающия, свыше благодатными призирати осиянии: яко да во свете добродетельнаго вашего жития право ходяще, сподобимся зрети свет неприступныя славы Божия, хваляще Его купно с вами в нескончаемыя веки веков. Аминь.

Тропарь преподобному Петру Афонскому, глас 4

Мир оставил еси, Петре, Господа ради своего и крест восприим на рамо свое, на гору достигл еси Афонскую, якоже древле фесвитянин Илия. И в ней пребыв пощением, и молитвами, и бдением, Бога милостива творя и Пречистую Богородицу Молебницу предлагая, сего ради вопием ти: моли Христа Бога, да спасет души наша.

Кондак, глас 2

Удалив себе человеческаго сожительства, в пещерах каменных и разселинах пожил еси, желанием Божественным и любовию, Петре, Господа твоего, от Негоже венец приял еси: моли непрестанно спастися нам.

Величание

Ублажаем тя, преподобне отче Петре, и чтим святую память твою, наставниче монахов и собеседниче Ангелов.

Преподобному Петру Афонскому молятся об освобождении из плена и заточения.

Молитвы благоверной великой княгине Анне Кашинской

Тропарь благоверной княгине Анне, в иночестве Евфросинии, Кашинской, Тверской, глас 3

Днесь восхваляем тя, преподобная благоверная великая княгине инокине Анно, яко лоза плодовита процвела посреде терния, во всех благочестивых великих княгинях, во инокинях же, аки крин процвете в винограде во граде Кашине добродетельми своими и всех удивила еси чудным своим житием, тем угодила еси Христу Богу, к Немуже взыде радующися и веселящися, и ныне пребываеши с лики преподобных жен, наслаждающихся райския красоты и веселия. Молим тя: моли о нас Человеколюбца Христа Бога нашего даровати нам мир и велию милость.

Ин тропарь, глас 4

Просветившися Божественною благодатию, преподобная, и правостию умною душу твою привязавши в любовь Христову, тленныя, и красныя, и временныя нивочтоже вменила еси. Крестным знамением на мысленныя враги мужески вооружившися, постническими подвиги, постом и молитвами углие страстей угасила еси, достославная Анно, и по смерти источаеши благодать притекающим к мощем твоим. И ныне, в Небеснем чертозе с мудрыми девами предстоящи Христу, моли о нас, почитающих святую память твою.

Ин тропарь, глас 3

Днесь восхваляем тя, преподобная мати, великая княгине инокине Анно: яко бо лоза плодовита посреде терния, процвела еси во граде Кашине твоими добродетельми, всех удивила еси чудным твоим житием, темже Христу угодила еси, и ныне, радующися и веселящися, пребываеши с лики преподобных жен, наслаждающися райския красоты и веселия. Молим убо тя: моли о нас Человеколюбца, Христа Бога нашего, даровати нам мир и велию милость.

Кондак, глас 4

Яко пресветлая звезда явилася еси в Российстей земли, во граде Кашине, преподобная мати Анно, во всех благочестивых и верных женах, аки крин, процвела еси чистым и непорочным твоим житием, во инокинях же совершенными твоими труды и подвиги и взошла еси к вышнему граду, радующися и веселящися, яко добре совершивши твое течение. И ныне честныя твоя мощи, аки бисерие драгое, явишася на исцеление всем приходящим с верою. Тем и вопием ти: радуйся, всекрасная душею, и моли Христа Бога о спасении душ наших.

Ин кондак, на обретение мощей, глас 8

Скоропослушную помощницу, вси, сущии в бедах, благочестно воспоем, Анну святую, днесь любовию сошедшеся во обретение честных мощей ея. Воспоем песнь Единому в Троице Богу, радующися, сподобльшему нас видети пречистое сокровище честных мощей ея: от мног бо лет сокровены быша, напоследок же нам явлены и источают многа и различна исцеления. Яко да молитвами ея к Богу от всяких находящих зол избавимся, радостною душею и веселием сердца благодарная воспоем, глаголюще: радуйся, утверждение граду нашему.

Величание

Ублажаем тя, преподобная мати, великая княгине Анно, и чтим святую память твою, наставнице инокиням и собеседниче Ангелом.

Молитвы преподобному Арсению Коневскому

Тропарь преподобному Арсению Коневскому, глас 1

Божественною любовию возгоревся, мирская же пристрастия от души отринув, тесным путем постничества вослед Христа невозвратным умом шествовал еси, Арсение преблаженне, от Негоже и мзду трудов твоих на небесех восприим, поминай нас, чтущих святую память твою и вопиющих: слава Давшему ти крепость, слава Венчавшему тя, слава Действующему тобою всем исцеления.

Ин тропарь, глас 4

Духом Божиим наставляем, возлюбил еси безмолвие, в немже евангельски подвизающуся, пречудный Афонский дар, Богоматере икона, даровася ти, преблаженне, и образ добродетелей быв стаду твоему, Арсение, отче наш, к горнему торжеству возшел еси, идеже со Ангелы ликовствуя, моли Христа Бога спастися душам нашим.

Кондак, глас 8

Трисиятельнаго Божества сиянием просветив сердце твое, преподобне, световиден весь явился еси добродетельми, яко и Гору Афонскую свет трудолюбия твоего озари, идеже святую икону Солнца истиннаго, Христа, и Его Пречистыя Матере в дар приим, на остров Нева езера пришед, обитель устроил еси, всеблаженне. Тем, верою и любовию к тебе притекающе, радостно вопием: радуйся, всесветлый светильник, Арсение отче наш.

Величание

Ублажаем тя, преподобне отче Арсение, и чтим святую память твою, наставниче монахов и собеседниче Ангелов.

О преподобнии и всечестнии отцы Вассиане и Ионо, угодницы Христовы блаженнии и чудотворцы преславнии! Постничеством Богу первее угодивше и делы благочестно на земли подвизавшеся, яко светила светлая, по смерти в мире возсиявше, просвещающе верных чудес светлостию, вы заступницы теплии показастеся. Многих, в скорбех и бедах страждущих и погибнути имущих, здравы сохранисте, непослушавших же завещания вашего и маловерующих отмстительне наказасте, и прежде заблуждшей жене путевожди бысте, и ослепшему паки прозрение даровасте. Дерзостне же коснувшагося целебных мощей ваших напрасно отринусте и, разслаблением наказавше, помиловасте. К сим же и иная преславная соделасте, и бывшее оскудение во обители вашей сугубо исполнисте, соблюдающе ю. Молимся убо ныне вам, о преблаженнии отцы, услышите моление наше, не презрите нас в бедах и скорбех, призывающих вас верою, будите помощницы нам скории и покровители, сохраните же во благоденствии, мире и тишине отечество наше. К сим же и духовнаго о вас собрания не оставите до конца, посещающе я всегда, о преподобнии, изобилованием всяцем, и молитеся присно о нас ко Господу, да молитвами вашими грехов прощение получим, и Царствия Небеснаго сподобимся благодатию Его, яко Тому подобает всякая слава, честь и поклонение, ныне и присно и во веки веков. Аминь.

Тропарь преподобным Вассиану и Ионе Пертоминским, Соловецким, глас 8

Прежде отвержением мира, яко морскаго треволнения, избегосте, отцы преподобнии, послежде же изволением Божиим в водах морских кончину блаженную приясте и к неболезненному покою преставистеся от земли радующеся. Тем и по кончине от Христа Бога прославистеся чудесы обильно, теплии в бедах верным помощницы показастеся. И ныне на Небесех предстояще престолу Христову, Вассиане преблаженне и Ионо преславне, молитеся присно о душах наших.

Кондак, глас 2

Яко сокровище богатно, верным Божественная благодать из морских недр издаде мощи ваша, отцы преблаженнии, и в месте пусте целы и невредимы обретошася преславно, и тако вас ради ныне славится Бог, Емуже со дерзновением предстояще ныне на Небесех, Вассиане и Ионо досточуднии, молитеся непрестанно о всех нас.

Величание

Ублажаем вас, преподобнии отцы Вассиане и Ионо, и чтим святую память вашу, наставницы монахов и собеседницы Ангелов.

Молитвы блаженному Иоанну, Христа ради юродивому, Московскому чудотворцу

Тропарь блаженному Иоанну, Христа ради юродивому, Московскому, глас 8

Иже Христа ради волею оставив твое отечество, град Вологду, и вся красная мира сего возненавидев, желанием духовным вселился еси во град Ростов, яко в пустыни скитаяся в нем, гладом и жаждею и безмерною тяготою плоть твою изнуряя и работая Господеви день и нощь, в посте и молитве пребывая в притворе церковнем, власы же главы твоея пеплом и смолою удручая, и, ревнуя Василию блаженному, пришел еси в царствующий град Москву и, в целомудрии и терпении течение добре скончав, преселился еси к вечным обителем, чудес лучи испущая, преблаженне Иоанне, отче наш, моли Христа Бога спастися душам нашим.

Ин тропарь, глас 4

Житие твое воздержанием и терпением, благоюроде Иоанне, украсил еси, и частыми молитвами и всенощным стоянием душу твою просветил еси, и обяза тело твое и власы, и кресты с веригами тяжкими, многа лета труждаяся до исхода души твоея, и прииде на твое преставление из Ростова града в царствующий град Москву, к Пресвятей Троице и Пречистей Божией Матери, и ту погребоша тя святителие, и ныне у гроба твоего точиши исцеления приходящим ти с верою. Моли Бога прилежно с праведным Василием о православных людех. Слава Давшему ти крепость, слава Венчавшему тя, слава Действующему тобою всем исцеления.

Ин тропарь, глас 1

Любве ради Христовы возненавидев мира сего вся прелестныя красоты, в мире живый, подвизася добре, яко Ангел на земли, вечныя ради жизни, и, от земных достоинств таковых душу воскресив духом, плоть же поработив и повинув во всем духу, Христови распяся и к Божественней высоте пресветло взятся благодатию, прииде в Небесный чертог, идеже ныне Пресвятей Троице со Ангелы предстоя, во свете неизреченныя радости веселишися, преблаженне Иоанне, тем благодарственно вопием ти: слава Избравшему тя в Руси, блаженне, устава изрядна, слава Укрепльшему тя в народе, слава молитвами твоими и нас Спасающему.

Кондак, глас 8

Святое и пренепорочное понесл еси самовольное мучение, яко вено пречестное, принесл еси тело твое к Пресвятей Троице и Пречистей Богородице и ту сотворил еси честное твое преставление. Терпением твоим и смирением ангельския лики удивил еси и диавола мучителя посрамил еси, от человек отгоняеши духи темныя, различная исцеления подавая. Радуйся, благоюроде Иоанне, с блаженным Василием, и печаль нашу на радость преложи, молися прилежно стране Российстей от междоусобныя брани и от безбожных язык избавитися. Радуйся, земли Российския удобрение и града нашего Москвы великое утверждение.

Ин кондак, глас тойже

Иже Христа ради наложивый на ся мудростию юродство, образом буйства зрим от человек, умныма же крылома горе возлетая, все тело твое веригами обязая, яко злато многоценное, соблюдеся в народе, очистив ум от страстей, веселием духовным прешел еси море мятежнаго сего жития, обретя светлость жизни вечныя. Молим тя, блаженне Иоанне, молися прилежно Христу Богу нашему сохранитися нам от всякаго навета и злых обстояний видимых и невидимых враг, да зовем ти: радуйся, многострадальне, яко да молитвами твоими направляеми, предстояще присно с тобою в Троице славимому Богу, поем Ему: Аллилуиа.

Величание

Ублажаем тя, святый праведный Иоанне, и чтим святую память твою, ты бо молиши за нас Христа Бога нашего.

Преподобных Андроника (1395), Саввы (XV), Александра (после 1427), Даниила и Андрея (XV), иконописцев Московских.

О преподобнии и Богоноснии отцы, пастырие и учителие и неленостнии наставницы наши! О земных небрегше, в землю кротких вселилися есте, из неяже израстили есте плоды добродетелей; тленныя таланты не сокровиществовавше, нетленныя таланты преумножили есте во сто крат и множае; человеческия славы текущия не искавше, воздали есте славу Богу и Спасу всех и сего ради прославляетеся ныне на Небесех в Церкви первородных. Молите Человеколюбца Спаса Христа, да просветит ны, помраченныя, покаянием, да освятит ны, грешныя, силою, наитием и действием благодати Святаго Духа, чрез достопокланяемыя иконы подаемою, да помилует ны, немощныя, молитвами вашими и предстательством Пренепорочныя Его Матере и сподобит узрети славу пречистаго лика Своего во Царствии Небеснем. Аминь.

Тропарь преподобным Андронику и Савве Московским, глас 2

Плоды добродетелей на земли принесши, преподобнии отцы, в Небесных чертозех ныне благоухаете, яко райстии цвети, и лицем к лицу зрите Пресвятую Троицу, Юже дерзновенно молите спастися душам нашим.

Ин тропарь, глас 8

От юности своея, преподобнии отцы Андрониче и Савво, в пустыни вселистеся Сергия великаго, того житию последующе, плоды смирения и послушания возрастили есте. Сего ради сподобившеся быти строители и первоначальники обетныя обители святителя Алексия, с нимже испросите у Христа Бога верным людем здравие и спасение и душам нашим велию милость.

Ин тропарь, глас 1

Безмолвие от юности возлюбив, на гору Маковец пришел еси, Андрониче блаженне, обитель общаго жития устроил еси в земнем граде Москве, во обители Небеснаго града ныне ликовствуеши, молися Христу Богу спастися душам нашим.

Кондак, глас 3

Вас молим, преподобнии отцы наши, телом почивающия на земли, духом же Божию престолу предстоящия: молитеся о граде Москве и о всех, почитающих честную память вашу.

Величание

Ублажаем вас, преподобнии отцы Андрониче, Савво, Александре, Данииле и Андрее, и чтим святую память вашу, наставницы монахов и собеседницы Ангелов.

Преподобного Мефодия Пешношского (1392).

Молитвы преподобному Мефодию, игумену Пешношскому

Тропарь преподобному Мефодию, игумену Пешношскому, глас 8

Божественною любовию от юности распаляемь, вся яже в мире красная возненавидев, Христа единаго возлюбил еси, и сего ради в пустыню вселився, в ней обитель сотворил еси, и собрав иноков множество, приял еси от Бога чудес дар, отче Мефодие, и был еси о Христе собеседник и спостник преподобному Сергию, с нимже у Христа Бога испроси православным христианом здравие и спасение, и душам нашим велию милость.

Кондак, глас 4

Послушания добрый рачитель быв, безплотныя враги слезными молитвами твоими крепко посрамил еси и явился еси Пресвятыя Троицы жилище, Юже зря, блаженне, ясно, Богомудре Мефодие преподобие, чудес дар от Нея приял еси. Темже исцеляеши с верою приходящих недуги, утоляеши скорби и молишися непрестанно о всех нас.

Величание

Ублажаем тя, преподобне отче Мефодие, и чтим святую память твою, наставниче монахов и собеседниче Ангелов.

Святителя Ионы, митрополита Московского и всея России, чудотворца (1461).

Мучеников Вита, Модеста и Крискентии питательницы (ок. 303).

Святителя Михаила, первого митрополита Киевского и всея Руси (992).

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Ионо! Предстоя у престола всех Царя и наслаждаяся света Единосущныя Троицы и херувимски со Ангелы возглашая песнь трисвятую, великое же и неизследованное дерзновение имея ко Всемилостивому Владыце, молися паствы Христовы спасти людей: благостояние святых церквей утверди, архиереи благолепием святительства украси; монашествующая к подвигам добраго течения укрепи; град сей и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани; старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немощствующия исцели и везде тепле призывающих тя и с верою притекающих к раце честных и многоцелебных мощей твоих, усердно припадающих и молящихся тебе, от всяких напастей и бед ходатайством твоим свободи, да зовем ти: о, богоизбранный пастырю, звездо всесветлая мысленныя тверди, тайнаго Сиона необоримый столпе, миродохновенный цвете райский, всезлатая уста слова, Московская похвало, всея России украшение! Моли о нас Всещедраго и Человеколюбиваго Христа, Бога нашего, да в день страшнаго Пришествия Его шуияго стояния избавит нас, и радости святых причастники сотворит со всеми святыми во веки. Аминь.

Тропарь святителю Ионе, митрополиту Московскому и всея России, чудотворцу, глас 3

От юности твоея весь сам себе Господеви возложив, в молитвах, и в трудех, и в постех образ быв добродетели, отонудуже видев Бог твое благое произволение, архиерея тя и пастыря Церкве Своей устрояет. Темже и по преставлении честное тело твое цело и нетленно соблюдеся, Ионо святителю, моли Христа Бога, да спасет души наша.

Ин тропарь, глас тойже

Ярем Господень измлада восприим, и Того стопам невозвратным желанием последовал еси, и освященнаго подвига достиже, святительства паству приим и чудес от Бога дары прият, с верою приходящим к раце мощей твоих подаеши различным недугом исцеление неоскудно, отче наш Ионо, святителю Христов, моли Христа Бога даровати нам велию милость.

Ин тропарь, глас тойже

Божественною благодатию просветився и по смерти показуя светлость жития твоего, источаеши мирови благоухания, притекающим к раце мощей твоих, и народи Московстии наставляеши ко свету богоразумия, Ионо, отче наш, моли Христа Бога даровати нам велию милость.

Кондак, глас 8

Яко от младенства Господеви поработив себе, мудре, постом и бдением тело твое удручая, темже сосуд чист и дом Духу Пресвятому явился еси, сего ради и Церкве Своей тебе архиерея и пастыря устрояет, юже добре упасл, ко Господу отходиши, Егоже возлюбил еси. Тем молим тя: поминай нас, верою чтущих святую память твою, да вси зовем ти: радуйся, отче Ионо, святителю всечестный.

Ин кондак, глас тойже

Желанием духовным постническое житие совершив и святительства паству приим, чистоты ради телесныя и тело твое Владыка Христос соблюде нетленно, и Петру чудотворцу наследника тя содела, и того нраву последовал еси, и учителя тя Христос Своему стаду дарова, идеже лежат целебныя мощи твоя, благоухают, яко от кадила благовонна, и подают исцеления немощным, верою приходящим, святителю Ионо, моли Христа Бога непрестанно о всех нас.

Величание

Величаем тя, святителю отче Ионо, и чтим святую память твою, ты бо молиши за нас Христа Бога нашего.

Святителю Ионе, митрополиту Московскому, чудотворцу, молятся об избавлении от зубной боли.

О святый мучениче Вите! С дванадесяти лет благодатию Святаго Духа свыше просвященный, познал истиннаго Бога и Ему в молитве и подвиге угождал. И дал тебе Господь дар чудотворения и светлый разум, так что и словом и делом ты многих ко Христу обратил и на правый путь наставил. Лютыя за веру Христову муки претерпев, отцем своим уловляем сокровищами многоценными и всеми обольщениями мира сего, ты ничем не соблазнился и от Христа не отрекся. Перед кончиною своею испросивший у Господа, всем почитающим память твою, сохранение от всех зол мира сего и успешное шествие в Царство Небесное.

О святый мучениче Вите, услышь нас, чтущих тебя и прибегающих к тебе, сохрани нас от бед, зол и скорбей, и помози нам сподобитися быть наследниками Царства Божия, еже по Бозе одно составляет предмет всех желаний во вселенной. И о больных и страждущих на земле предстательствуй, святый Вите, как при земной жизни своей ты целил различныя недуги, так и теперь не оставь болящих, а наипаче мучимых черною немочью. Исцели их, благосердо, и подай им всецелое врачевание, да не умрут они в безпамятстве, но в здравом теле и ясном уме превозмогут слабости и прославят Бога во веки веков. Аминь.

Святому мученику Виту молятся об избавлении от падучей болезни, называемой в народе «пляска святого Вита».

О святый великий и преславный архипастырю и отче наш Михаиле, страны Российския первопрестольниче и просветителю, всех же племен христианских благонадежный пред Богом ходатаю, тебе припадающе молимся: помози нам быти твоея к Богу любве подражателем, ею же в земнем животе твоем преисполнен был еси. Просвети умы и сердца наша светом божественнаго учения, научи нас тебе последовати верно и заповеди Господни усердно творити, да явимся чада твоя не именем токмо, но и всем житием тако познаемся. Молися, равноапостольне иерарше, о Церкви Российстей, о граде твоем и обители, в ней же нетленно мощи твоя почивают, и о всем отечестве нашем, призри милостивно на вся верныя твоя чтители, помощи твоея ищущия: буди всем в болезнех целитель, в скорбех и печалех утешитель, в бедах и нуждах помощник, в час же смертный заступник и покровитель, да твоею помощию сподобимся и мы грешнии спасение получити и Царствие Христово наследовати. Ей, святителю Христов, аще восхощеши, можеши помощи нам, да на помощь твою уповающе, прославим дивнаго во святых Своих Бога, Отца и Сына и Святаго Духа, ныне и присно, и во веки веков. Аминь.

Тропарь святителю Михаилу, первому митрополиту Киевскому, глас 4

Днесь пророчествие во апостолех Первозваннаго исполнися, се бо на сих горах возсия благодать и вера умножися: и, иже неверием обветшавшии, Божественною купелию отродишася, и быша людие обновления, царское священие, язык свят, Христово стадо, Емуже ты первый пастырь явился еси, яко первее Крещением послуживый. И ныне, предстоя Владыце Христу Богу, моли всем сыном российским спастися, имаши бо дерзновение, яко иерарх Божий и священнослужитель.

Кондак, глас 2

Моисей вторый России явился еси, отче, пренесый мысленный виноград от египетскаго идолослужения в землю, пророчествием предувиденную. Будет, рече, утверждение веры на земли, и на версех гор Киевских превознесется паче ливана плод, питающ мира всего, от негоже вкусивше, ублажаем тя, Михаиле, Божий иерарше.

Величание

Величаем тя, святителю отче Михаиле, и чтим святую память твою, ты бо молиши за нас Христа Бога нашего.

Святителя Тихона, епископа Амафунтского (425).

Преподобного Тихона Медынского, Калужского (1492).

Преподобного Тихона Луховского, Костромского чудотворца (1503).

Перенесение мощей святителя Феофана, Затворника Вышенского (2002).

О Трисолнечныя Троицы угодниче! О неистощимый источниче чудес! О небесныя доброты подобниче, святче Божий преблагий, избранниче Спасов, великий архиерею, преблаженне святителю Христов Тихоне, подсолнечную озаряяй и удивляяй чудесы твоими! Всегда предстоя Святей Троице и моление принося о всем мире, вся призывающия имя твое святое от всякаго недуга душевнаго и телеснаго исцели, испроси отпущение грехов их. Греховные мысли потреби, и всякую напасть и нашествие неприязненное диавола далече сотвори от молящихся тебе, и возстави ны от сна греховнаго, устрой ны, входящия и во святый храм твой, здравы душами и телесы, и добрыми делы славящия имя Пресвятыя Троицы, Отца и Сына и Святаго Духа, и твое молитвенное предстательство, всегда, ныне и присно и во веки веков. Аминь.

Тропарь святителю Тихону, епископу Амафунтскому, глас 4

Образ был еси воздержания, божественным духом вся просветив, правоверием течение совершив, зловерных обличил еси, отче наш святителю Тихоне, моли Христа Бога спастися душам нашим.

Кондак, глас 3

В постничестве, святе, боголюбезнем пребыв, Утешителеву силу с высоты приял еси идол низложити прелести, люди же спасти, демоны отгнати, недуги исцеляти. Сего ради почитаем тя яко Божия друга, Тихоне блаженне.

Ин кондак, глас 8

Иже Божественнаго Духа благодатию избран святитель явися и чудотворец показася предивен. Яко солнце, чудесы сияя, Тихоне, память твоя пресветлая. Темже зовем ти: радуйся, пресловущее миру светило.

Величание

Величаем тя, святителю отче Тихоне, и чтим святую память твою, ты бо молиши за нас Христа Бога нашего.

Святителю Тихону, епископу Амафунтскожу молятся о даровании плодородия.

О священная главо, великий чудотворче, преподобне отче наш Тихоне преблаженне и преславне, Духа Святаго исполненне, постников похвало, монашествующих славо, пустыни украсителю, теплый о нас грешных молитвенниче! Ныне со ангельскими воинствы предстояй у престола всех Царя славы Господа и наслаждаяся света Единосущныя Троицы и с горними силами воспевая трисвятую песнь, яко дерзновение имея, молися Всемилостивому Владыце, спасти вся верующия во имя Его: испроси мир и тишину святым церквам ниспослати, вере Православней укрепление, вся противныя языки, брани хотящия, видимыя враги низложити, грады наша утвердити, мир весь умирити. Моли милостиваго Бога, да, твоим благоприятным ходатайством, вся православная христианы избавит Он от глада, губительства, труса, потопа, огня, меча, от нашествия иноплеменник и междоусобныя брани, старыя да подкрепит, юныя да наставит, немудрыя да умудрит, болящия исцелит, плененныя и юзники свободит, сироты заступит, младенцы воспитает, и вся люди сохранит от всех бед и напастей и от нападения вражия, и смертоносныя язвы, и тлетворных ветр, и от всякаго зла. Днесь же с верою приходящих рабов твоих (имена их), со страхом и любовию припадающих ко святому гробу многоцелебных мощей твоих и образ подобия твоего любезно целующих, яко теплый наш заступниче, сохрани, и в скорбных обстояниих наших предстани, душевных и телесных страстей свободи: в день Страшнаго Суда шуияго стояния избави и с десными овцами молитвами твоими стати сподоби и слышати блаженный оный глас Владыки Христа Бога нашего: «Приидите, благословеннии Отца Моего, наследуйте уготованное вам Царство от сложения мира». Емуже подобает всякая слава, честь и поклонение со Безначальным Его Отцем, и со Пресвятым и Благим и Животворящим Его Духом, ныне и присно и во веки веков. Аминь.

Тропарь преподобному Тихону Медынскому, Калужскому, глас 4

Яко светильник пресветлый явился еси в Российстей земли, преподобне отче наш Тихоне, в пустыни вселився, в нейже преходя жестокое жительство, яко безплотен пожил еси; сего ради и чудес дарованием обогати тя Бог. Тем и мы, притекающе к раце мощей твоих, умильно глаголем: отче преподобне, моли Христа Бога спастися душам нашим.

Кондак, глас 8

Отечества удалився, преподобие, в пустыню вселился еси, идеже жестокое житие твое показал еси и многих добродетельми удивив, дарование чудес от Христа приял еси. Темже поминай нас, чтущих память твою, да зовем ти: радуйся, преподобне Тихоне, отче наш.

Величание

Ублажаем тя, преподобне отче Тихоне, и чтим святую память твою, наставниче монахов и собеседниче Ангелов.

Молитвы преподобному Тихону Луховскому и Костромскому

Тропарь преподобному Тихону Луховскому, Костромскому чудотворцу, глас 4

Желанием духовным в пустыню вселился еси, и тамо невозвратно шествовав Божественными стезями, достигл еси в Небесныя обители, и ныне со Ангелы предстоиши у престола всех Царя Христа Бога, Емуже прилежно молися помиловати обитель сию, град же и люди, верою празднующия пречестную память твою, Тихоне преподобне, отче наш.

Кондак, глас 8

Христовою любовию уязвився, преподобие, во след Его невозвратно шествовал еси, постом и воздержанием плотския страсти умертвил еси, бдением же и молитвами вселукаваго врага до конца низложил еси и слезами, яко елеем, свещу светлу себе уготовал еси; темже в Небесныя обители невозвратно вшел еси, идеже, радуяся, Господеви предстоиши, Емуже прилежно молися, молим тя, яко да милостив нам будет в день страшнаго Его Пришествия, и да не пребудем и мы вне чертога Христова, но да сподобит ны одесную Себе стати молитвами твоими, преподобне, да зовем ти: радуйся, Богомудре отче наш Тихоне.

Величание

Ублажаем тя, преподобне отче Тихоне, и чтим святую память твою, наставниче монахов и собеседниче Ангелов.

О святителю отче Феофане, архиерею преславный и предивный затворниче, Божий избранниче и Таин Христовых служителю, богомудрый учителю и апостольских словес изрядный изяснителю, отеческих добротолюбных сказаний списателю, христианскаго благочестия изящный проповедниче и жизни духовныя искусный наставниче, подвигов монашеских усердный ревнителю и всем людем благодати ходатаю! Ныне к тебе, на Небесех Богу предстоящему и о нас молящемуся, припадаем и сице взываем: испроси у Всещедраго Бога Церкви Российстей и стране нашей мир и благостояние, святителем Христовым – истины Божественныя достойное охранение, паствы доброе окормление, лжеучителей и еретиков изрядное посрамление, подвизающимся – смирение, страх Божий и чистоту душевную и телесную, учителем – боговедение и мудрость, учащимся – ревность и помощь Божию. И всем православным – утверждение на пути ко спасению, да вкупе с тобою прославим Божию Силу и Премудрость Господа нашего Иисуса Христа, со Безначальным Его Отцем, с Пресвятым, Благим и Животворящим Его Духом ныне и присно и во веки веков. Аминь.

Тропарь святителю Феофану, Затворнику Вышенскому, глас 8

Православия наставниче, благочестия учителю и чистоты, Вышенский подвижниче святителю Феофане богомудре, писаньми твоими Слово Божие изяснил еси и всем верным путь ко спасению указал еси, моли Христа Бога спастися душам нашим.

Кондак, глас 4

Богоявлению тезоименитый, святителю Феофане, учении твоими многия люди просветил еси, со Ангелы ныне предстоя престолу Святыя Троицы, моли непрестанно о всех нас.

Величание

Величаем тя, святителю отче Феофане, и чтим святую память твою, ты бо молиши за нас Христа Бога нашего.

Преподобных Никиты, Кирилла, Никифора, Климента и Исаака, братьев Алфановых, Новгородских (Соколъницких) (XIV).

Тропарь преподобным Никите, Кириллу, Никифору, Клименту и Исаакию Алфановым (Сокольницким), Новгородским, глас 1

Послушаша Господня гласа, добрии рачители бывше, благий Его ярем на ся вземше, усердно понесосте и постничества путь достигше, преподобнии отцы, святии чудотворцы, воини Небеснаго Царя Христа, Никито, Кирилле, Никифоре, Клименте и Исаакие. Сего ради от Вседержительныя десницы венцы неувядаемыми увязостеся, и Небесною славою одеястеся, и чудотворении обогатистеся, темже и о нас молити не престайте, да получим вечных благ, мы же сице взываем: слава Давшему вам к подвигу крепость, слава Венчавшему вас, слава Дающему вами всем исцеления.

Ин тропарь, глас 8

Светильницы светлии явлынеся, доброту земную мудренно оставиша, и всю добродетель извыкли есте, и обретоша безсмертие, постом и бдением и прочим воздержанием себе приношаху, и ныне со Ангелы на Небесех престолу Христову предстоите, молитеся Богу, мудрии, Никито, Кирилле, Никифоре, Клименте и Исаакие преподобнии, умирити мир и спасти души наша, поющих, и согрешающим оставление грехов даровати, чтущим святую память вашу.

Кондак, глас тойже

К Богу все свое умное желание вперисте и к Тому невозвратно от души последовали есте, ангельское житие на земли поживше, и многим бысте путь ко спасению, отсюдуже и Христос вас прослави и даром чудес обогати, темже вси, притекающе к мощам вашим, зовем: радуйтеся, преподобнии отцы Никито, Кирилле, Никифоре, Клименте и Исаакие, молитвенницы теплии о душах наших.

Ин кондак, глас тойже

Благодать приемше исцелением, простираете здравие сущим в болезнех, преподобнии отцы и чудотворцы славнии, Никито чудне, и Кирилле блаженне, и Никифоре пречестне, Клименте святе, и Исаакие преподобне, но молитвами вашими противных шатание разорите, и болезни наша исцелите, и грехов прощение испросите, да благодарне воззовем вам: радуйтеся, Великому Новуграду похвало и утверждение.

Величание

Ублажаем вас, преподобнии отцы Никито, Кирилле, Никифоре, Клименте и Исаакие, и чтим святую память вашу, наставницы монахов и собеседницы Ангелов.

Боголюбской иконы Божией Матери в Боголюбове, Владимирской области (1157).

Иконы Божией Матери, именуемой «Свято-Крестовская» (1995).

Молитвы ко Пресвятой Богородице пред Ее иконою «Боголюбская» («Боголюбивая»)

Тропарь Божией Матери ради иконы Ее «Боголюбская», глас 1

Боголюбивая Царице, Неискусомужная Дево, Богородице Марие! Моли за ны Тебе Возлюбившаго и Рождшегося от Тебе Сына Твоего, Христа Бога нашего, подати нам оставление прегрешений, мирови мир, земли плодов изобилие, пастырем святыню и всему человечу роду спасение. Грады наша и всю землю Российскую от нахождения иноплеменных заступи и от междоусобныя брани сохрани. О Мати, Боголюбивая Дево! О Царице всепетая! Ризою Своею покрый нас от всякаго зла, от видимых и невидимых враг защити и спаси души наша.

Ин тропарь, глас тойже

Всепетая и Всеславная Царице Богородице, Мати всея твари Содетеля, христианская Надеждо и Заступнице, печальных Утешение, ненадеющихся и отчаявшихся скорое Надеяние! Молим Тя, милостива буди нам, грешным, и не остави раб Своих, и не отрини моления верных, в скорбех и бедах пред честным образом Твоим избавления требующих. О Владычице, благая Помощнице! Ризою Твоею честною нас защити и от зол избави, молящи Сына Твоего, Христа Бога нашего, да спасет души наша, яко Милосерд.

Кондак, глас 3

Дева днесь предстоит Сыну, руце Свои к Нему простирающи, святый князь Андрей радуется, и с ним Российская страна торжествует, нас бо ради молит Богородица Превечнаго Бога.

Величание

Величаем Тя, Пресвятая Дево, и чтим образ Твой святый, егоже благоверный князь Андрей даде нам на враги в победу и всем верным во спасение.

Пред иконой Пресвятой Богородицы «Боголюбская» молятся об избавлении от эпидемии и чумы, от моровых поветрий, холеры.

Молитва ко Пресвятой Богородице пред Ее иконою «Свято-Крестовская»

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющимся пречистому и чудотворному образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и обремененных. Помози нам немощным, утоли скорби наша, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков. Аминь.

Тропарь Божией Матери ради иконы Ее «Свято-Крестовская», глас 1

Чрез святую Твою икону, явленную нам на Кавказе Тобою, о Владычице, люди града Святаго Креста от страшнаго агарянскаго нападения чудесно свободила еси, Благая Вратарнице! Пленение, скорбь и узы в радость и свободу пременила еси, Скоропослушнице наша. Молим Тя, Матерь Божия, и на будущее время защищай всех нас, на Кавказе живущих чад Твоих, от нашествия агарянскаго, непрестанно молящеся у Креста Сына Твоего, Всенепорочная.

Кондак, глас 8

Якоже дивным видением многими стоящую Тя на воздусе у Креста Сына Твоего, Богородице, молящуюся о людех града Святаго Креста, в страшней беде сущих, агарянскаго пленения свободила еси, Благая Вратарнице, сице и на будущее время православных людей Кавказа защищай от нападающих на грады и веси наша, от недуга, неверия, глада и вражды избавляй, непрестанно молящеся о нас у Креста Сына Твоего, да зовем Ти: радуйся, Святокрестовская Божия Мати, всего Кавказа защито и ограждение.

Величание

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Пред иконой Пресвятой Богородицы «Свято-Крестовская» молятся об избавлении от опасностей, междоусобной брани, нападения врагов, об освобождении из плена и заточения.

Преподобного Паисия Великого (V).

Святителя Иоанна, архиепископа Шанхайского и Сан-Францисского, чудотворца (1966).

Преподобного Варлаама Пинежского, Важского, Шенкурского (1462).

Молитва преподобному Паисию Великому

Страстей победителя, душам помощника, о всех молебника, всем спасения ходатая и наставника, из глубины сердца вздыхая, усердно и пламенно молим тя, Паисие преподобне! Внемли и помози нам, не отринь и не презри нас, но абие услыши в смирении сердца притекающих к тебе. Ты, преподобне, к спасению ближних прилежно стремился и многих грешников к свету спасения привел еси. Подвиги чрезмерные успокоением считал по себе, пречудне, и, любовью ко Господу всегда горя, явления Христа Спаса сподобился еси, и Ему, за людей Умершему, любовию подражая, и об отрекшихся от Христа молился еси. Услыши нас, Паисие прехвальне, ибо недостойны есмы молитися о даровании нам великой милости Господней, понеже грешны есмы, и уста оскверненныя и сердца отягченныя имеем, и под бременем прегрешений страждем, и не достигнет молитва наша до Господа. Сего ради помолися за нас мольбою твоею крепкою и Богоприятною, святый Паисие, да избавлены будут скончавшиеся без покаяния сродники, ближние и знаемые наши от муки вечныя, и молитву твою во благоволении приимет Спас наш и милосердие Свое вместо добрых дел их даст им, свободит их, веруем, от страданий и вселит в селениях праведных, и нас в покаянии скончатися удостоит, да прославим вкупе Всесвятое и Великолепое имя Отца и Сына и Святаго Духа, во веки веков. Аминь.

О священная главо, преподобне отче, преблаженне авво Паисие! Не забуди убогих твоих до конца, но поминай нас всегда во святых твоих и благоприятных молитвах к Богу! Помяни стадо твое, еже сам у пасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю; не премолчи за ны ко Господу, и не презри нас, верою и любовию чтущих тя. Поминай нас недостойных у престола Вседержителя, и не престай моляся о нас ко Христу Богу, ибо дана тебе бысть благодать за ны молитися. Не мним 6о тя суща мертва: аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствами, со Безплотными лики, с Небесными Силами, у престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов, воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Богу нашему Иисусу Христу; Ему же подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

Тропарь преподобному Паисию Великому, глас 2

Божественною любовию от юности распаляем, преподобне, вся красная, яже в мире, возненавиде, Христа единаго возлюбил еси, сего ради в пустыню вселися, идеже сподобися Божественнаго посещения, Егоже неудобь зрети и ангельскима очима, паде, поклонися, Великий же Дародатель, яко Человеколюбец, рече к тебе: не ужасайся, возлюбленный Мой, дела твоя угодна Мне, се даю тебе дар: о коем-либо грешнице помолишися, отпустятся ему греси. Ты же в чистоте сердца твоего возгореся, прием воду и прикоснуся Неприкосновенному, умы нозе Его и, воду пив, даром чудес обогатися, болящия исцеляти, бесы от человек отгоняти и грешники от муки молитвою своею избавляти. О, преподобне отче Паисие, молю тя, да умолиши и о мне, якоже тебе Бог обетова, ибо от сих грешник первый аз есмь, да даст ми Господь время покаяния и простит мое согрешение, яко Благий и Человеколюбец, да со всеми и аз воспою Ему: Аллилуиа.

Ин тропарь, глас 1

Пустынный житель, и во плоти Ангел, и чудотворец явился еси, богоносне отче наш Паисие, постом, бдением, молитвою небесныя дарования приим, исцеляеши недужныя и души верою приходящих ти. Слава Давшему тебе крепость, слава Венчавшему тя, слава Действующему тобою всем исцеления.

Кондак, глас 2

Житейских молв оставль, безмолвное житие возлюбил еси, Крестителю подобяся всеми образы, с нимже тя почитаем, отче отцев Паисие.

Ин кондак, глас 8

От млада званию Господа твоего последовал еси усердно, блаженне, вся, яже в мире красная, Его ради оставив. Крест твой на рамена взем, вселился еси в пустыню, и, тамо ангельски пожив, тело твое постом и молитвами изнурил еси, и многим путь был еси ко спасению, вся возводя к Божественней высоте, Паисие преподобне, отцев и постников твердое основание.

Величание

Ублажаем тя, преподобне отче Паисие, и чтим святую память твою, наставниче монахов и собеседниче Ангелов.

Преподобному Паисию Великому молятся, чтоб не умереть без исповеди и Святого Причащения, а также об избавлении от муки умерших без покаяния.

О преподобне отче, великий заступниче наш, скорый услышателю молящихся тебе, угодниче Божий и чудотворче Варлааме! Не забуди, обещался еси, посещати чад твоих: аще бо телом и отшел еси от нас, но духом присно с нами пребываеши. Молим убо тя, о преподобне отче: избави нас от огня и меча, от нашествия иноплеменных и междоусобныя брани, от тлетворных ветр и от внезапныя смерти и от всех прилог бесовских, находящих на ны. Услыши ны грешныя, и приими сию молитву и моление наше к тебе, яко кадило благовонное и яко жертву благоприятную, юже мы недостойнии принесохом, и неисцельныя душ наших раны исцели: и якоже древле монаха твоея обители Никиту, от духов нечистых зле мучима, вскоре уврачевал еси, тако и нас, узами вражиими содержимых, молитвами твоими разреши. Исторгни нас из глубины прегрешений, и на путь покаяния настави, и от сети диаволи разреши милостивным твоим посещением, от видимых же и невидимых враг предстательством твоим нас избави: и помози нам ныне в жизни сей, и во исходе душ наших, и в будущем веце, и во веки веков. Аминь.

Тропарь преподобному Варлааму Пинежскому, Важскому, Шенкурскому, глас 3

Иже к добродетелем прилежанием взыграния плоти обуздал еси, благими нравы душу свою украсив, от земных Христу превозведе ум свой, тем от Него исцелением струя независтна явися, притекающим верою к тебе и любезно зовущим: Варлааме отче наш, моли Христа Бога, да спасет души наша.

Кондак, глас 8

Яко звезда светозарная, от Великаго Новаграда пришед, в чужих, яко в западных странах, зайде, от восток чудес, яко солнце, возсия, темже, иже во тьме и сени смертней, в недузех лежащии, свет исцеления от тебе приемлюще, с нами, чады твоими, непрестанно вопиют ти: радуйся, Богомудре Варлааме отче наш.

Величание

Ублажаем тя, преподобне отче Варлааме, и чтим святую память твою, наставниче монахов и собеседниче Ангелов.

Молитвы святителю Иоанну, архиепископу Шанхайскому и Сан-Францисскому, чудотворцу

Тропарь святителю Иоанну, архиепископу Шанхайскому и Сан-Францисскому, чудотворцу, глас 5

Попечение твое о пастве в странствии ея, се прообраз и молитв твоих, за мир весь присно возносимых, тако веруем, познав любовь твою, святителю и чудотворче Иоанне. Весь от Бога освящен священнодействием пречистых Таин, имиже присно укрепляемь, поспешал еси ко страждущим, целителю отраднейший, поспеши и ныне в помощь нам, всем сердцем чтущим тя.

Ин тропарь, глас 1

Святительства дар преумножил еси, Слова проповеданием апостолом поревновав, бдением же постом и молитвою с преподобными вменился еси, клевету и поношения с кротостию приемля. Сего ради Христос тя прослави чудесы, ихже обильно изливаеши на всех с верою притекающих к тебе: и ныне спасай нас молитвами твоими, Иоанне досточудне, святителю Христов.

Кондак, глас 4

Христу Пастыреначальнику последовав, во святителех изряднейший явился еси, спасл бо еси овцы своя от губительства безбожных, пристанище мирное тем учредив, и попечение непрестанное о пастве имея, врачевал еси их недуги душевныя же и телесныя, и ныне о нас к твоим честным мощем припадающих, моли Христа Бога, отче Иоанне, в мире спастися душам нашим.

Величание

Величаем тя, святителю отче Иоанне, и чтим святую память твою, ты бо молиши за нас Христа Бога нашего.

Перенесение мощей святителя Гурия, архиепископа Казанского (1630).

Перенесение мощей и одежд апостолов Луки, Андрея, Фомы и Иоанна Богослова, пророка Елисея и мученика Лазаря (ок. 956–970).

«Моденской» («Косинской») иконы Божией Матери.

Молитвы святителю Гурию, архиепископу Казанскому

Тропарь святителю Гурию, архиепископу Казанскому, глас 4

Правило веры и образ целомудрия, учителя добрых дел и наставника спасения, даде тя Господь новопросвещенному граду Казани, в немже приобрел еси новыя от язык люди и привел еси я Христови. Сего ради в память твою радостно сошедшеся, честне празднуем святое твое успение, ты же, отче наш, святителю Христов Гурие, моли Христа Бога спастися душам нашим.

Ин тропарь, глас тойже

От младости удалялся земнаго мудрования и последовав скорбным путем Законоположителю своему Христу Богу. Темже и Он тя воздарова на земли нетлением, на Небесех же со угодившими Ему архиереи ликовствуеши, Гурие святителю, моли Христа Бога подати отечеству нашему на враги победу, и мир мирови, и душам нашим велию милость.

Ин тропарь, глас 4

Яко крин благовонный, мироточивыя твоя мощи от вертограда церкве Спасовы в вертоград церкве Богородичны честные принесошася, святителю Гурие, якоже бо дар честен, тя даровав Христос Пречистей Матери Своей, и исполнися храм Ея святый благоухания твоего и возрадовася архиерейский престол, приемый тя, первоседателя своего. Возвеселися же собор верных со святителем и священноначальники о преславном цельбоносных твоих мощей пренесении, еже мы, радостно празднующе, молим тя, угодниче Божий: моли Христа Бога подати душам нашим мир и велию милость.

Ин тропарь, глас 3

Добродетельнаго и благороднаго ради твоего жития, извел тя есть Прещедрый Бог на первопрестольство богоспасаемаго царства Казани и просветил есть учением твоим бесерменьстии языцы. И многия, святителю Гурие, во избранное Христово стадо привел еси, и нищелюбием богоугодно пожил еси, и по преставлении твоем много лет сокровенное твое тело от недр земных на удивление явися, и благоуханнаго мира гроб наполнися приходящим с верою, взимающим миро от раки честных мощей твоих, всем источаеши исцеления, святителю Христов Гурие, моли Христа Бога спастися душам нашим.

Кондак, глас 6

Истины основание и веры утверждение и в поучениих преизящнаго свемы тя благочестию споспешника, апостолом сопрестольника, страстотерпцем сопричастника, постником купноревнителя, похваляем тя, Гурие святителю, и велия таинника Божия благодати.

Ин кондак, глас 4

Чувственныя страсти победив, чистотою, яко солнце, восзиял еси, чисто житие до конца сохранив, и от неверия в веру многих ко Христу привел еси; Того ради от Бога нетлением почтен, чудесы твоими вся удивил еси. Молим убо тя, святителю Гурие, молитвами твоими от бед избави нас, да зовем ти: радуйся, отче предивный, граду Казани похвало и утверждение.

Величание

Величаем тя, святителю отче Гурие, и чтим святую память твою, ты бо молиши за нас Христа Бога нашего.

Святителю Гурию Казанскому молятся об избавлении от головной боли и об исцелении глазных болезней.

Молитвы апостолу и евангелисту Луке

Тропарь апостолу и евангелисту Луке, глас 5

Апостольских деяний сказателя и Евангелия Христова светла списателя, Луку препетаго, славна суща Христове Церкви, песньми священными святаго апостола похвалим, яко врача суща, человеческие немощи, естества недуги и язи душ исцеляюща и молящася непрестанно за души наша.

Кондак, глас 2

Истиннаго благочестия проповедника и таин неизреченных ритора, звезду церковную, Луку Божественнаго восхвалим: Слово бо его избра, с Павлом мудрым языков учителя, Един ведый сердечная.

Величание

Величаем тя, апостоле Христов и Евангелисте Луко, и чтим болезни и труды твоя, имиже трудился еси во благовестии Христове.

Апостолу и евангелисту Луке молятся при изучении иконописания и об исцелении глазных болезней.

Первозванне апостоле Бога и Спаса нашего Иисуса Христа, Церкве последователю верховный, всехвальне Андрее! Славим и величаем апостольския труды твоя, сладце поминаем твое благословенное к нам пришествие, ублажаем честная страдания твоя, яже за Христа претерпел еси, лобызаем священныя мощи твоя, чтим святую память твою и веруем, яко жив Господь, жива же и душа твоя, и с Ним во веки на Небеси пребываеши, идеже и нас любовию твоею не оставляеши, якоже возлюбил еси отцы наша, егда Духом Святым прозрел еси земли нашея ко Христу обращение. Веруем же, яко и молиши о нас Бога, зря во свете Его вся нужды наша. Тако сию веру нашу во храме твоем исповедуем, и Господа и Бога и Спаса нашего Иисуса Христа молим, да молитвами твоими подаст нам вся потребная ко спасению нас грешных: да якоже ты абие по гласу Господа, оставль мрежи твоя, неуклонно Тому последовал еси, сице и кийждо от нас не своих си да ищет, но еже к созиданию ближняго, и о горнем звании да помышляет.

Имуще же тя предстателя и молитвенника о нас, уповаем, яко молитва твоя много может пред Господем и Спасителем нашим Иисусом Христом, Емуже подобает всякая слава, честь и поклонение, со Отцем и Святым Духом, во веки веков. Аминь.

Тропарь апостолу Андрею Первозванному, глас 4

Яко апостолов первозванный и верховнаго сущий брат, Владыце всех, Андрее, молися, мир вселенней даровати и душам нашим велию милость.

Кондак, глас 2

Мужества тезоименитаго богоглагольника и Церкве возследователя верховнаго, Петрова сродника восхвалим: зане якоже древле сему, и ныне нам воззва – приидите, обретохом Желаемаго.

Величание

Величаем тя, апостоле Христов Андрее, и чтим болезни и труды твоя, имиже трудился еси во благовестии Христове.

Апостолу Андрею Первозванному молятся о хороших женихах.

Молитвы апостолу Фоме

Тропарь апостолу Фоме, глас 2

Ученик Христов быв, Божественнаго собора апостольскаго сопричастник, неверствием бо Христово Воскресение известив, и Того пречистую страсть осязанием уверив, Фомо всехвальне, и ныне нам проси мира и велия милости.

Кондак, глас 4

Премудрости благодати исполнен, Христов апостол и служитель истинный, в покаянии вопияше Тебе: Ты мой еси Бог же и Господь.

Величание

Величаем тя, апостоле Христов Фомо, и чтим болезни и труды твоя, имиже трудился еси во благовестии Христове.

Апостолу Фоме молятся, когда неверие беспокоит душу.

Молитвы апостолу и евангелисту Иоанну Богослову

Тропарь апостолу и евангелисту Иоанну Богослову, глас 2

Апостоле, Христу Богу возлюбленне, ускори избавити люди безответныя, приемлет тя припадающа, иже падша на перси приемый: Егоже моли, Богослове, и належащую мглу языков разгнати, прося нам мира и велия милости.

Кондак, глас 2

Величия твоя, девственниче, кто повесть? Точиши бо чудеса и изливаеши исцеления, и молишися о душах наших, яко Богослов и друг Христов.

Величание

Величаем тя, апостоле Христов и евангелисте Иоанне Богослове, и чтим болезни и труды твоя, имиже трудился еси во благовестии Христове.

Святому апостолу и евангелисту Иоанну Богослову молятся о добрых отношениях в семье, о совете и любви между мужем и женой, при изучении иконописания, об успехах в рыболовстве.

Молитвы ко Пресвятой Богородице пред Ее иконою «Косинская» или «Моденская»

Тропарь Божией Матери ради иконы Ее «Косинская» или «Моденская», глас 3

Радуйся, всего мира Заступнице! Спасения нашего Ходатаице! Ты источила еси нам радость и благословение принесением чудотворныя Твоея иконы. О Дево Всенепорочная! О Царице Всепетая! Хвалебную песнь воспеваем Ти, раби Твои, покланяемся с любовию и молим Тя: Владычице, Мати Христа Бога нашего! Молися прилежно Сыну Твоему подати нам грехов оставление, миру умирение и душам нашим спасение.

Кондак, глас 6

Не имамы иныя помощи, не имамы иныя надежды, разве Тебе, Владычице: Ты нам помози, на Тебе надеемся и Тобою хвалимся: Твои бо есмы раби, да не постыдимся.

Величание

Величаем Тя, Богоизбранная Отроковице, и чтим образ Твой святый, имже точиши исцеления всем, с верою притекающим.

Пред иконой Пресвятой Богородицы «Косинская-Моденская» молятся об исцелении болезней рук и ног, холеры, головных болей, в желании иметь детей.

Мученика Иулиана Египетского и иже с ним (313).

Преподобноисповедника Георгия Даниловского (1932).

Тропарь мученику Иулиану Египетскому и иже с ним, глас 1

Светлыя постничества подвиги, радуяся, понесл еси, Иулиане Богоблаженне, с преподобною Василиссою, и страдания добльственно претерпел еси с честными твоими сострадальцы, с нимиже моли Христа Бога спастися душам нашим.

Кондак, глас 8

Иже в преподобных и мученицех преславнаго Иулиана и сподвижников его любовию память почитаем днесь, яко прославивших Господа Божественными делы и прославленных Господом Божественными чудесы, ихже песньми увенчаим, зовуще: радуйтеся, воини Христовы непобедимии.

Величание

Величаем тя, страстотерпче святый Иулиане с честными твоими сострадальцы, и чтим честная страдания ваша, яже за Христа претерпели есте.

О преславный угодниче Божий, преподобне отче Георгие, Даниловы обители похвало и украшение! Ты от юности своея монашеское житие возжелал еси, в немже подвизався, любовь Христову стяжал еси, и был еси пастырь добрый притекающим к тебе: последи же изгнания и многи скорби претерпев, Небесное Царство наследовал еси. И ныне призри на нас, чад твоих, молящихся тебе, и управи души наша ко спасению; обитель же нашу святую миром и благочестием укрепи, да чистым житием благоугодим Богу, Емуже всякая слава подобает, честь и поклонение, во веки. Аминь.

Тропарь, глас 2

Издетска монашескую жизнь возжелал еси, преподобне отче Георгие, в нейже любовь Христову стяжав, пастырь добрый многим людем был еси, последи же и изгнание претерпев, венцем исповедничества украсился еси. И ныне, предстоя престолу Святыя Троицы, непрестанно моли спасти и просветити души наша.

Кондак, глас 4

Евангельским словом вооружився, всяку скорбь жития сего тленнаго и непостояннаго претерпел еси, утешая чад твоих любовию, яже во Христе Иисусе, преподобне Георгие, Даниловская похвало, моли Христа Бога спасти и нас, чтущих тя.

Величание

Ублажаем тя, преподобне отче Георгие, и чтим святую память твою, наставниче монахов и собеседниче Ангелов.

Священномученика Евсевия, епископа Сажосатского (380).

Обретение мощей праведного Феодора Томского (1995).

Тропарь священномученику Евсевию, епископу Самосатскому, глас 4

И нравом причастник, и престолом наместник апостолом быв, деяния обрел еси, богодухновенне, в видения восход, сего ради слово истины исправляя, и веры ради пострадал еси даже до крове, священномучениче (имярек), моли Христа Бога спастися душам нашим.

Кондак, глас тойже

Благочестно во святительстве пожив и мучения путь прошед, идольския угасил еси жертвы, святителю Евсевие, но яко имеяй дерзновение ко Христу Богу, моли спастися душам нашим.

Величание

Величаем тя, священномучениче Евсевие, и чтим святую память твою, ты бо молиши за нас Христа Бога нашего.

О праведне отче наш Феодоре! Приими сию похвальную песнь, тебе с любовию и верою приносимую, и милостивно приклонися с Небесных высот, яко отец чадолюбивый, ходатайствуй верою и любовию тя почитающим грехов прощение, жития исправление, кончину христианскую мирну и ненаветну от духов злобы. И предстани тогда, о отче, прогоняя страх смертный от верных твоих рабов и чтителей твоея священнейшия памяти, безбедно творя разлучение души от тела и лютых мытарств прехождение сильным твоим ко Господу молением и предстательством, благодатию, щедротами и человеколюбием Господа и Бога и Спаса нашего Иисуса Христа и Его Пресвятейшия Матери, и твоим милостивным о нас ходатайством. Надеемся вся сия прощения получити и в день Страшного Суда десного стояния получити со всеми угодившими Богу. Аминь.

Тропарь праведному Феодору Томскому, глас 4

Жизни светския, праведне Феодоре, удалився, в землю сибирскую вольно приити изволив, чудесы и знаменьми Божиими народ Томский удивил еси, и по смерти своей веру чтущих тя укрепляеши. Поминай нас, чтущих память твою, отче наш, Феодоре!

Величание

Величаем тя, святый праведный Феодоре, и чтим святую память твою, ты бо молиши за нас Христа Бога нашего.

Владимирской иконы Божией Матери (празднество установлено в память спасения Москвы от нашествия хана Ахмата в 1480 году).

Собор Владимирских святых.

Мученицы Агриппины (253–260).

Праведного Артемия Верколъского (1545).

Преподобного Иосифа Заоникиевского, Вологодского чудотворца (1612).

Второе перенесение мощей святителя Германа, архиепископа Казанского (1714).

Псково-Печерской, именуемой «Умиление» (1524), Владимирской-Красногорской икон Божией Матери.

Иконы Божией Матери «Древо государства Российского» (XVII).

Молитвы ко Пресвятой Богородице пред Ее иконою Владимирская

Тропарь Божией Матери ради иконы Ее «Владимирская», глас 4

Днесь светло красуется славнейший град Москва, яко зарю солнечную восприимши, Владычице, чудотворную Твою икону, к нейже ныне мы притекающе и молящеся Тебе, взываем сице: о Пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих и спасет души наша, яко Милосерд.

Кондак, глас 8

Взбранной Воеводе победительная, яко избавльшеся от злых пришествием Твоего честнаго образа, Владычице Богородице, светло сотворяем празднество сретения Твоего и обычно зовем Ти: радуйся, Невесто Неневестная.

Ин кондак, глас тойже

К Взбранней Воеводе и Заступнице, Деве и Богородице, в чистей совести, верою утвердившеся, русстии народи, невозвратно надежду имуще, притецем, к чудотворному Ея и пречистому образу, и возопием Ей: радуйся, Невесто Неневестная.

Величание

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Предиконой Пресвятой Богородицы «Владимирская» молятся об избавлении от нашествия иноплеменных, о наставлении в православной вере, о сохранении от ересей и расколов, об умирении враждующих, о сохранении России.

О Небеснаго Иерусалима граждане, вси святии, подвиги веры и благочестия и многими чудесы во Владимирстей земли просиявшии! Воззрите на нас милостивно и к земли приверженных возведите к высоте Небесней. Вы горе на Небеси пребываете, мы же на земли низу, удалени суще от вас нетолико местом, елико грехми и беззаконии нашими, но к вам, яко нам сродным, прибегаем и взываем: наставите нас ходити путем вашим, вразумите и руководствуйте нами, многогрешными. Свойственно бо вам есть, святии, милосердие и человеколюбие: на земли живуще, не о своем токмо спасении бысть вам попечение, но и о всех, к вам приходящих. Наставления бо ваша быша трость книжника скорописца, на сердцах христоименитых людей глаголы жизни начертавающаго. Не телесныя токмо врачевали есте болезни, но паче душевных врачи изящнейшии явилися есте, и все житие ваше бысть зерцало всякия добродетели. Предстояще днесь престолу Света неприступнаго, в нем зрите вся наша нужды и прошения. Вы вкупе со святыми Ангелы, о едином грешнице кающемся радующимися, водворяетеся и дерзновение многое к Человеколюбцу Богу имате, не престаните убо, о нас вопиюще ко Господу, испросите предстательством вашим у Всемилостиваго Отца нашего Небеснаго мир Церкви Его Святей, под знамением Креста воинствующей, согласие в вере и единомудрие, суемудрия же и расколов истребление, в делех благих утверждение и благословение, больным исцеление, печальным утешение, обиженным заступление, бедствующим помощь, не посрамите нас, с верою и любовию к вам притекающим. Аще бо и недостойни есмы толикаго достославнаго лика ходатаев, но вы, подражатели человеколюбия Божия бывше, сотворите нас достойны чрез обращение от злых дел ко благому житию. Вся Богом просвещенная Россия, преславными чудесы вашими исполненная и милостьми облагодетельствованная, исповедует вас быти своих покровителей и заступников. Явите нам древния милости ваша, имиже отцем нашим во благое вспомоществовали есте, и не отрините нас, чад их, стопами их к вам, святии, шествующих. Веруем, яко духом нам соприсутствуете, паче же и нетленными мощми вашими с нами есте. Сия бо, яко сокровище безценное, вручи нам Иже чудес Бог. Предстояще им, вам, яко живым сущим, припадаем и молимся: приимите моления наша и вознесите я на жертвенник милосердия Божия, да приимем вами благодать и благовременную в нуждах наших помощь. Паству же вашу духовную не престаните управляти жезлом духовныя мудрости: подвизающимся помозите, разслабленныя возставите, споспешите нам иго Христово нести во благодушии и терпении, и всех нас управите в мире и покаянии скончати житие наше и преселитися со упованием во блаженная недра Авраамова, идеже вы радостно по трудех и подвизех ныне почиваете, прославляюще со всеми святыми Бога, в Троице славимаго, Отца и Сына и Святаго Утешителя Духа, ныне и присно и во веки веков. Аминь.

Тропарь Собору Владимирских святых, глас 4

Днесь светло красуется Пресвятыя Богородицы избранный град и с ним вси концы земли Владимирския торжествуют, память совершающе богопрославленнаго великаго лика святых, в подвизех православныя веры издревле во уделе сем Богу угодивших, и к ним с любовию вопиют: о предивнии Христу Богу молитвенницы, венцы пресветлыми от Него увенчанныя, мир и благоденствие отечеству вашему испросите и душам нашим велию милость.

Кондак, глас тойже

Яко звезды пресветлыя Церкве Российския, исповеданием православныя веры в той возсиявшии, вси святии земли Владимирския, Богомудрии святителие и благовернии князи, преподобнии отцы и матери, страстотерпцы и праведнии, Христу Богу усердно молитеся, грехов оставление даровати, любовию чтущих святую память вашу.

Величание

Величаем вас, вси святии в земли Владимирской просиявшии, и чтим святую память вашу, вы бо молите за нас Христа Бога нашего.

Молитва мученице Агриппине

О святая мученице Агриппино!

С юных лет посвятив себя Богу, ты украсила свою душу девством и чистотою и из любви к жениху твоему Христу претерпела страшныя муки. И по преставлении своем получила дар от Господа и врачевала всякия болезни, а наипаче проказу. Услышь же, благостная и дивная мученице Агриппино, моление прокаженных, с верою сердца обращающих к тебе, и ныне, как некогда, помоги этим несчастным, поспешая избавить их от лютаго недуга. Исцели их немощных, всеми людьми презираемых, отчуждаемых и гонимых, избавь их от скорбей и мучений, и от неисцельной болезни исцели их, да по выздоровлении возблагодарят и прославят они Промыслителя Бога в радости спасения своего. Аминь.

Тропарь мученице Агриппине, глас 4

Агница Твоя, Иисусе, Агриппина, зовет велиим гласом: Тебе, Женише мой, люблю, и Тебе ищущи страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою; но яко жертву непорочную приими мя, с любовию пожершуюся Тебе. Тоя молитвами, яко Милостив, спаси души наша.

Кондак, глас тойже

Светлых подвиг твоих светоносный наста день, воньже почитающи сих Божественная Церковь вся созывает весело вопити тебе: радуйся, дево и мученице, Агриппино всечестная.

Величание

Величаем тя, страстотерпице Христова Агриппино, и чтим честное страдание твое, еже за Христа претерпела еси.

Мученице Агриппине молятся об исцелении от проказы.

Молитвы праведному Артемию, Веркольскому чудотворцу

Тропарь праведному Артемию Веркольскому, глас 2

Вышняго повелением, тученосным облаком, небо помрачившим и молниям блистающим, грому же возшумевшему с прещением, испустил еси душу твою в руце Господеви, премудре Артемие, и ныне предстоиши престолу Владыки всех, иже верою и любовию приходящим к тебе, подая исцеление всем неотложно и моляся Христу Богу спастися душам нашим.

Кондак, глас 8

Возсия днесь пресветлая память премудраго Артемия; богоданная благодать, яко реки, изливает от целебных мощей его дивная исцеления, имиже от многоразличных недуг избавляемся, с верою приемлюще я и взывающе: радуйся, Артемие богомудре.

Величание

Величаем тя, страстотерпче Христов Артемие, и чтим святую память твою, ты бо молиши за нас Христа Бога нашего.

Святому праведному Артемию, Веркольскому чудотворцу, молятся об исцелении от лихорадки и об избавлении от разных недугов (в болезненном состоянии вообще).

О великий угодниче, преславный чудотворче, Иосифе преблаженне, душею на Небеси престолу Божию предстояй и Троичныя Славы наслаждаяйся, телом же на земли в Божественнем храме почиваяй и от Него данною ти свыше благодатию различная источаяй чудеса! Призри милостивым оком на предстоящия ти люди, и яко стяжавый дерзновение у Господа, испроси стране нашей благостояние, воздуха благорастворение, земли плодоносие, нам же всем, с верою к тебе прибегающим и всесвятую память твою благочестно почитающим, от всяких бед душевных и телесных избавление: яко да твоими молитвами наставляеми, путь маловременнаго жития нашего на земли безбедно совершим, и нескончаемый покой на Небеси улучивше, прославим с тобою купно всех благих Подателя, Единаго в Троице славимаго Бога, Отца и Сына и Святаго Духа, ныне и присно и во веки веков. Аминь.

Тропарь преподобному Иосифу Заоникиевскому, Вологодскому чудотворцу, глас 4

Исперва житие твое, преподобне, хитростию благоюродства от человека утаено, на Небесех пред Ангелы явлено, и аще на земли тмою очес претыкаяся хождаше, но мысленными крилы на высоту возшед. Присносущным Светом облистаем, во отечествии наследова, и земных мнящихся красных храмов не требовав, но в Небеснех селех пресветлыя обители стяжал еси, ни ризами мягкими одеялся, но паче власяницу возлюбил еси, и сего ради паче всех имений земных Небесная сокровища приобрел еси и на земли плотен сый с безплотными совокупляяся, Небесной Царице служа и Той приносимых ангельских песней насладився, ихже многия люди желая насладитися не могут. Сего ради Всевышний Творец образ Свой и Рождшия Его Богоматери с высоты воздуха на руце твоя, яко на Херувимская носила, дарова тебе. От Негоже Присносущным Светом очи твои уясни, и, яко росоточащий облак, молитвами твоими весь мир милованный напои. И ныне в последняя времена святую персть твою, яко Едемский источник, во исцеление недугов устрои, Егоже моли, наставниче наш, чудоносче Иосифе, даровати нам мир и велию милость.

Ин тропарь, глас 5

Смиренномудрием наказание благодушно приемля, иже от Небес неизреченный дар прияти сподобися, и в плоти сый, преподобне, безплотен в служении своем к Богоматери трудолюбне подвизася, бдении, пощении, слезами и молитвами, имиже и пустыню многожительну устроил еси, благоухищренным же юродством человеческия славы избежа. Сего ради Всевышний Мздовоздаятель в конец века сего сугубо тя прослави, и гроб твой святый точением чудес обогатися, Егоже моли, преподобне отче наш Иосифе, даровати нам отпущение грехов и велию милость.

Кондак, глас 8

От юности Бога возлюбив и простынею безгласие стяжал еси, преподобне. Сего ради и с Небес сладкий Свет очию получил еси и росоточащии милости пресветлый образ Богоматери с высоты воздуха чрез святых безмездников во обятие приял еси, и Ей богоугодно послужил еси, и обитель составил еси, власяными веригами тело свое удручил еси, от негоже каплями кровными диавола потопил еси. Сего ради и в последняя времена гроб твой от Владыки нашего Христа точением чудес обогатися, тем и мы, чада твоя, любовию притекающе к тебе, умильно глаголем: радуйся, наставниче нашего спасения; радуйся, исцелений подателю; радуйся, отче наш Иосифе, монахов удобрение.

Ин кондак, глас тойже

Вышних благ желаяй, преобидел еси долу влекущая мудрования, ибо трудолюбивое свое тело острым власяным плетением стерл еси, и бысть благоугоден служитель Богоматери, страждущим в недузех являяся, скоро помогаеши, и с верою притекающим к тебе, неоскудное здравие подаеши. Сего ради зовем ти: разреши наша болезни душевныя и телесныя, еже к Богу молитвами твоими, началообразный смирению наставниче, отче наш Богомудре Иосифе, монахов удобрение.

Величание

Ублажаем тя, преподобне отче Иосифе, и чтим святую память твою, наставниче монахов и собеседниче Ангелов.

Молитва святителю Герману, архиепископу Казанскому и Свияжскому, Свияжского Богородицкого Успенского монастыря священноархимандриту

Тропарь святителю Герману, архиепископу Казанскому, глас 4

От юности иго Христово усердно восприим, бденными подвиги поста и молитвы прославился еси. Отонудуже призывающу тя Богу на служение Церкви в новопросвещеннем царстве Казанстем, вкупе со святителем Гурием воззван был еси, идеже яко первоначальник созданной тобою во граде Свияжске обители и достойный первосвятителю преемник явился еси. Духом предстоя престолу Владычню, молися, святителю Германе, со святителем Гурием православней пастве во благочестии преспевати, тме иноверия светом веры разгнатися.

Ин тропарь, глас тойже

Яко великим пастырем единонравна и учителем вселенныя единомысленна, Церкве Божия служителя усердна, и строителя таин Христовых благоговейна, стекшеся благовернии людие Свияжския обители Богомудраго основателя и Казанския новопросвещенныя паствы святителя Германа песньми и пении восхвалим, глаголюще: не престай присещати молитвами твоими на всю паству твою, в вере и благочестии блюди невредимо.

Кондак, глас тойже

Доблестями преподобия и правды, врученное тебе словесное стадо озаряя, и на злачных слова Христова пажитях питая, на правый путь заповедей Господних силою духа твоего наставлял еси е. Темже и ныне осеняемой цельбоносными чудотворении твоими, в святую память, зовем тебе: не престай, святителю, предстательствовати пред Пастыреначальником о стаде твоем, яко паствы твоея утверждение и сущим по тебе святителем удобрение.

Величание

Величаем тя, святителю отче Германе, и чтим святую память твою, ты бо молиши за нас Христа Бога нашего.

О Преблагословенная Дево Богородице! Мати всех страждущих и болезнующих сердцем! Страны нашея и града Защитнице! Обители Псково-Печерския красото и славо! Призри на нас, смиренных, обремененных грехми многими, отягченных скорбьми и печалями, и с сокрушением и слезами взирающих на пречистый лик Твой, в чудотворней иконе явленный. Сохрани от всякаго зла святую обитель сию, юже преподобный Корнилий со старцы Марком и Ионою Тебе вручи и всех в вере и надежде подвизающихся в ней. Спаси и град сей, и вся люди, правоверно живущия и к Тебе прибегающия, от нашествия иноплеменных, от всякаго страха и труса, от мора и глада, от злых человек и всяческой скорби. Приникни к нам милосердием Твоим, яко ликом Твоим Божественным любезно приникла еси к ланите Богомладенца. Согрей нас дыханием Твоея любве и никогдаже отступай от нас, ни в сей жизни, ни в будущей, да чающе Твою всесильную Материнскую помощь, сподобимся безбедно дойти вечныя жизни и прославлять Небеснаго Отца и Сына и Святаго Духа в Троице славимаго Бога, во веки веков. Аминь.

Тропарь Божией Матери ради иконы Ее «Умиление» Псково-Печерской, глас 4

Днесь светло красуется обитель сия, яко зарю солнечную восприимши, Владычице, чудотворную Твою икону, к нейже мы ныне притекающе и молящеся Тебе, взываем сице: о Пречудная Владычице Богородице! Молися из Тебе воплощенному Христу Богу нашему, да избавит обитель сию и вся грады и страны христианския невредимы от всех навет вражиих и спасет души наша, яко Милосерд.

Кондак, глас 6

Не имамы иныя помощи, не имамы иныя надежды, разве Тебе, Владычице: Ты нам помози, на Тебе надеемся, и Тобою хвалимся: Твои бо есмы раби, да не постыдимся.

Величание

Величаем Тя, Пресвятая Дево, Мати Христа Бога нашего, и чтим чудотворный образ Твой, имже спасла нас от руки вражия.

Пред иконой Пресвятой Богородицы «Умиление» Псково-Печерская молятся о защите от иноплеменных, и от междоусобной брани, и об исцелении от беснования.

Пресвятая Владычице моя Богородице! Святыми Твоими и всесильными мольбами отжени от мене, смиреннаго и окаяннаго раба Твоего, уныние, забвение, неразумие, нерадение, и вся скверная, лукавая и хульная помышления от окаяннаго моего сердца и от помраченнаго ума моего, и погаси пламень страстей моих, яко нищ есмь и окаянен. И избави мя от многих и лютых воспоминаний и предприятий и от всех действ злых свободи мя. Яко благословенна еси от всех родов, и славится пречестное имя Твое во веки веков. Аминь.

Величание

Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Пред иконой Пресвятой Богородицы «Древо государства Российского» молятся об избавлении от бед и о защите страны от врагов, о сохранении Российской державы и о мире в стране.

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющимся пречистому и чудотворному образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и обремененных. Помози нам, немощным, утоли скорби наша, настави на путь правый нас, заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на Страшнем Суде Сына Твоего явися нам милосердая предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков. Аминь.

Тропарь Божией Матери ради иконы Ее «Владимирская-Красногорская», глас 2

Радуйся, святая горо Красная, небеси пободная, слава бо Божия на тебе возсия. Взыграйте, горы и холми, веселием, яко на сей горе икона Божия Матере, честнаго Ея умиления, прославися. Ликуйте, человецы, и веселитеся, яко нам даровася богатство неотемлемое, исцелений сокровище, гласы, якоже трубы, возшумите, прославляюще Ея чудеса преславныя. И Ты, Чистая, радуйся, яко с Тобою Господь.

Кондак, глас 3

На горе святей видяще Твою святую икону, Богородице, Мати Дево, поем Твоего светообразнаго лика изображение, покланяемся Твоей святей иконе, почитаем оную, и славим тоя преславная чудеса, и сице зовем Тебе: радуйся, Невесто Неневестная.

Величание

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Пред иконой Пресвятой Богородицы Владимирская-Красногорская «Умиление» молятся об исцелении болезней, избавлении от пожара.

Рождество честного славного Пророка, Предтечи и Крестителя Господня Иоанна.

Преподобного Антония Дымского (ок. 1224).

Праведных отроков Иакова и Иоанна Менюжских (1566–1569).

Молитвы честному славному Пророку, Предтече и Крестителю Господню Иоанну

Тропарь Предтече и Крестителю Господню Иоанну, глас 4

Пророче и Предтече пришествия Христова, достойно восхвалити тя недоумеем мы, любовию чтущия тя: неплодство бо рождшия и отчее безгласие разрешися славным и честным твоим рождеством, и воплощение Сына Божия мирови проповедуется.

Кондак, глас 3

Прежде неплоды днесь Христова Предтечу раждает, и Той есть исполнение всякаго пророчества, Егоже бо пророцы проповедаша, на Сего во Иордане руку положив, явися Божия Слова пророк, проповедник вкупе и Предтеча.

Величание

Величаем тя, Предтече Спасов Иоанне, и чтим еже от неплодове преславное рождество твое.

О пастырю добрый, учителю и наставниче наш и святыя обители Дымския начальниче, преподобный отче Антоние! Молим тя усердно: ты, яко имея дерзновение ко Владыце Христу и ко Пречистей Его Матери, буди о нас, недостойных, иже с верою притекающих к тебе, ходатай и молитвенник теплый, заступая нас от всяких бед и напастей, да твоими молитвами и предстательством пребудем невредимы от врагов наших видимых и невидимых. Моли милосердие Его, еже спасти нас от прегрешений наших, имиже весть судьбами. Моли благость Его, еже милостивно подавати нам и всему миру потребная. Молися Дающему всем мир ниспослати мир Церквам, собирая расточенныя во едино, сохранити страну нашу в мире и тишине и всякому верному в доме и на пути и повсюду дни благи и безмятежны даровати, умирити жизнь нашу, помиловати нас, предстоящих зде и за благословною виною отшедших отец и братий наших, и весь мир и спасти души наша, да выну славим, хвалим, поем и величаем Пречестное и Великолепое имя Отца и Сына и Святаго Духа ныне и присно и во веки веков. Аминь.

Тропарь преподобному Антонию Дымскому, глас 4

Добродетелей ревнителю, пустынный житель, подвижниче веры Христа Бога нашего, лощением и труды умертвивый плотская вожделения, тезоимените великому Антонию, егоже житию поревновал еси и во егоже имя Божественный храм воздвигл еси. Купно с ним, преподобне Антоние, моли Спасителя всех, да и нас сотворит победители плотских похотей и храмы Духа Святаго, по велицей Его милости.

Кондак, глас 6

Сверстник и подражатель преподобному Варлааму, послушание к нему истинное стяжав, достоин явился ему преемник, упасши до времене стадо его, добродетелем же его поревновав, в туюжде меру возраста достигл еси, безмолвие пустынное возлюбив, и угоден Господеви показался еси, первоначальник быв пустыни при езере Дымском, тем ти вопием: с преподобным Варлаамом, отче Антоние, моли о нас Бога, да даст нам такожде угодити Ему, якоже и ты, образе послушания и безмолвия тихий рачителю.

Величание

Ублажаем тя, преподобне отче Антоние, и чтим святую память твою, наставниче монахов и собеседниче Ангелов.

О святии праведнии отроцы Иоанне и Иакове, приснии о предстоящих во храме сем молитвенницы! Вы, от купели Святаго Крещения Богом избрани бывше, венцем страдальческим от Христа украшени бысте; о Нем бо дивную кончину во младенчестве прияли есте. Молим убо вас, о святии: якоже некогда звероловцем, заблуждшим в чащи древес, путь правый указали есте и иноку болящему исцеление даровали есте, тако и ны, ранами страстей болезненно одержимыя, от всякаго зла избавите. Внемлите же горькому воплю отец и матерей, немощныя младенцы своя к честней раце мощей ваших повергающих, ускорите на помощь, облегчите скорби сердец их, недуги же телесныя, вкупе и душевныя уврачуйте, и будите стена тверда и помощь крепка всем просящим вашего заступления. Храм же ваш святый от всякаго злаго обстояния сохраните; обитателем веси сея ходатайством вашим мир от Господа Славы низпослите, изобилие же плодов земных и во трудех наших благопоспешество нам подавайте, по кончине же Небесное Царствие получити вся помощь вашу призывающия сподобите, идеже вси праведнии вкупе с вами хвалят Пречестное и Великолепое имя Отца и Сына и Святаго Духа во веки веков. Аминь.

Тропарь праведным отрокам Иакову и Иоанну Менюжским, Новгородским, глас 1

Болезньми святых праведных отроков Иакова и Иоанна, имиже о Тебе пострадаша, умолен буди, Господи, и вся наша болезни исцели, Человеколюбче, молимся.

Благоверного князя Петра, в иночестве Давида, и княгини Февронии, в иночестве Евфросинии, Муромских чудотворцев (1228).

Молитвы благоверному князю Петру, в иночестве Давиду, и княгине Февронии, в иночестве Евфросинии, Муромским чудотворцам

Тропарь благоверному князю Петру, в иночестве Давиду, и княгине Февронии, в иночестве Евфросинии, Муромским чудотворцам, глас 8

Яко благочестиваго корене пречестная отрасль был еси, добре во благочестии пожив, блаженне Петре, тако и с супружницею твоею, премудрою Феврониею, в мире Богу угодивше и преподобных житию сподобистеся. С нимиже молитеся Господеви сохранити без вреда отечество ваше, да вас непрестанно почитаем.

Кондак, глас 8

Мира сего княжение и славу временну помышляя, сего ради благочестно в мире пожил еси, Петре, купне с супружницею твоею премудрою Феврониею, милостынею и молитвами Богу угодивше. Темже, и по смерти неразлучно во гробе лежаще, исцеление невидимо подаваете, и ныне Христу молитеся сохранити град же и люди, иже вас славящих.

Величание

Ублажаем вас, святии чудотворцы Петре и Февроние, и чтим святую память вашу, вы бо молите за нас Христа Бога нашего.

Благоверному князю Петру, в иночестве Давиду, и княгине Февронии, в иночестве Евфросинии, Муромским чудотворцам молятся о благословении вступающим в брак.

Тихвинской иконы Божией Матери (1383).

Обретение мощейпреподобного Тихона Луховского, Костромского (1569).

Молитвы ко Пресвятой Богородице пред Ее иконою «Тихвинская»

Тропарь Божией Матери ради иконы Ее «Тихвинская», глас 4

Днесь, яко солнце пресветлое, возсия нам на воздусе всечестная икона Твоя, Владычице, лучами милости мир просвещающи, юже великая Россия, яко некий дар Божественный, свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих, и спасет верою покланяющихся Его Божественному и Твоему пречистому образу, Дево Неискусобрачная.

Кондак, глас 8

Притецем, людие, к Деве Богородице Царице, благодаряще Христа Бога, и к Тоя чудотворней иконе, умильно взирающе, припадем, и возопием Ей: о Владычице Марие! Присетивше страну сию Твоего честнаго образа явлением чудесно, спасай в мире и благовременстве вся христианы, наследники показующи небесныя жизни. Тебе бо верно зовем: радуйся, Дево, мира спасение.

Величание

Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Пред иконою Пресвятой Богородицы «Тихвинская» молятся о прозрении слепых и исцелении глазных болезней, бесноватых, при болезнях детей, расслаблении суставов, при параличе, падучей болезни, от нашествия иноплеменных. Тихвинская икона Божией Матери является покровительницей младенцев.

Молитвы преподобному Тихону Луховскому и Костромскому

Тропарь преподобному Тихону Луховскому, Костромскому чудотворцу, глас 4

Желанием духовным в пустыню вселился еси, и тамо невозвратно шествовав Божественными стезями, достигл еси в Небесныя обители, и ныне со Ангелы предстоиши у престола всех Царя Христа Бога, Емуже прилежно молися помиловати обитель сию, град же и люди, верою празднующия пречестную память твою, Тихоне преподобне, отче наш.

Кондак, глас 8

Христовою любовию уязвився, преподобне, во след Его невозвратно шествовал еси, постом и воздержанием плотския страсти умертвил еси, бдением же и молитвами вселукаваго врага до конца низложил еси и слезами, яко елеем, свещу светлу себе уготовал еси; темже в Небесныя обители невозвратно вшел еси, идеже, радуяся, Господеви предстоиши, Емуже прилежно молися, молим тя, яко да милостив нам будет в день страшнаго Его Пришествия, и да не пребудем и мы вне чертога Христова, но да сподобит ны одесную Себе стати молитвами твоими, преподобне, да зовем ти: радуйся, Богомудре отче наш Тихоне.

Величание

Ублажаем тя, преподобне отче Тихоне, и чтим святую память твою, наставниче монахов и собеседниче Ангелов.

Преподобного Сампсона странноприимца (ок.530).

Обретение мощей преподобного Амвросия Оптинского (1998).

Праздник о великой победе, Богом дарованной императору Петру Великому над шведским королем Карлом XII и воинством его под Полтавою, в лето от воплощения Господня 1709, месяца июня в 27-й день.

Молитвы преподобному Сампсону Странноприимцу

Тропарь преподобному Сампсону странноприимцу, глас 8

В терпении твоем стяжал еси мзду твою, отче преподобне, в молитвах непрестанно терпевый, нищия возлюбивый и сия удовливый, но молися Христу Богу, Сампсоне милостиве блаженне, спастися душам нашим.

Кондак, глас 8

Яко врача всеизрядна и молитвенника благоприятна, к раце твоей божественней притекающе, Самсоне богомудре преподобне, сошедшеся любовию, псалмы и песньми, радующеся, Христа прославляем, таковую тебе благодать подавающа исцелений.

Величание

Ублажаем тя, преподобне отче Сампсоне, и чтим святую память твою, ты бо молиши за нас Христа Бога нашего.

Преподобному Сампсону Странноприимцу молятся об исцелении от разных болезней.

Молитвы преподобному Амвросию Оптинскому

Тропарь преподобному Амвросию Оптинскому, глас 5

Яко к целебному источнику, притекаем к тебе, Амвросие отче наш, ты бо на путь спасения нас верно наставляеши, молитвами от бед и напастей охраняеши, в телесных и душевных скорбех утешаеши, паче же смирению, терпению и любви научаеши, моли Человеколюбца Христа и Заступницу усердную спастися душам нашим.

Кондак, глас 2

Завет Пастыреначальника исполнив, старчества благодать наследовал еси, болезнуя сердцем о всех, с верою притекающих к тебе; темже и мы, чада твоя, с любовию вопием ти: отче святый Амвросие, моли Христа Бога спастися душам нашим.

Величание

Ублажаем тя, преподобне Амвросие, и чтим святую память твою, наставниче монахов и собеседниче Ангелов.

Тропарь Господу Богу ради праздника победы, дарованной русским войскам над шведами под Полтавою, глас 8

Препрославлен еси, Господи Боже наш, даровавый крепость на враги отечеству нашему, якоже Давиду на прегордаго Голиафа, осенил еси над главою его в день брани, препоясал еси немощныя силою свыше, и теми всю дерзость вражию низложил еси, Многомилостиве, слава Тебе.

Кондак, глас 2

В Вышних живый и на смиренныя призираяй, Иже не дал еси вепрю, от дубравы озобати, и уединенному дивому поясти винограда Твоего, утверди, Боже, еже соделал еси в нас, призри с Небесе и виждь, и посети виноград сей, и соверши его, егоже насади десница Твоя.

Величание

Величаем Тя, Триипостасный Боже, вознесенную гордость смирившаго и на Тя уповающим победу даровавшаго.

Преподобных Сергия и Германа, Валаамских чудотворцев (ок. 1358).

Перенесение мощей мучеников бессребреников и чудотворцев Кира и Иоанна (412).

Преподобного Ксенофонта Робейского (1262).

Иконы Божией Матери, именуемой «Троеручица» (VIII).

Молитвы преподобным Сергию и Герману, Валаамским чудотворцам

Тропарь преподобным Сергию и Герману Валаамским, глас 4

Евангелия Христова истиннии послушницы явистеся, преподобнии, мир и вся яже в нем, яко не сущая, преобидевше любве ради Христовы, и в морский остров вселистеся, и трудолюбно в нем противу козней невидимых врагов подвизастеся, постом, бдением же и всенощным стоянием плоти своя духу мудре повинули есте; сего ради от Вседержительныя десницы достойныя венцы прияли есте. И ныне Пресвятей Троице предстояще, молитеся, всеблаженнии отцы Сергие и Германе, сохранитися в мире отечеству нашему и спастися душам нашим.

Ин тропарь, глас 1

От мирския молвы бегающе, безмолвия и благочестия рачители, в тихое пристанище Валаама от востока приидосте, и в нем евангельски Христу добродетельми последовавше, на верх совершенства востекли есте. И ныне в торжестве премирном богозрением наслаждающеся, преблаженнии отцы Сергие и Германе, Человеколюбца Бога молите, еже спасти всех нас, благочестно вас почитающих.

Кондак, глас 4

От мирскаго жития изшедше, отвержением же мира Христу последовасте, и достигосте великаго Нева езера, и в нем на острове Валааме вселынеся, равноангельским житием пожили есте; отонудуже, веселящеся, прешли есте к Небесным чертогам. И ныне со Ангелы Владычню престолу предстояще, поминайте нас, чад своих, яже собрали есте, Богомудрии, да радостно от души вопием: радуйтеся, Сергие и Германе, отцы преблаженнии.

Величание

Ублажаем вас, преподобнии отцы Сергие и Германе, и чтим святую память вашу, наставницы монахов и собеседницы Ангелов.

О святые чудотворцы и врачи безмездные Кире и Иоанне, прибегаем к вам, от болезней наших страдая люто. Во дни жизни вашея проповедовали вы, яко недуг души тяжелее всех недугов тела и, егда душа грехами болезнует, часто и тело в болезнь впадает. Знаем мы, что болезнями от грехов очищаемся; умолите же, святые чудотворцы, Господа, да дарует Он прощение согрешений нам, слабым и безпомощным, в болезнях изможденным, да не погибнем, впавши в уныние. Ускорите на помощь нам и исцелите болезни наши, и мы в здравии, покаянии дни наши проведя, в мире окончим жизнь нашу и в день Судный с чистым сердцем предстанем пред очами Судии вселенной, Сердцеведца Бога, Егоже поем и славим во веки веков. Аминь.

Тропарь мученикам бессребреникам и чудотворцам Киру и Иоанну, глас 5

Чудеса святых Твоих мученик, стену необориму нам даровавый, Христе Боже, тех молитвами советы языков разори, яко един Благ и Человеколюбец.

Ин тропарь, глас тойже

Святии славнии Кире и Иоанне, безсребреницы, мученицы и чудотворцы, милосердием своим, яко стеною необоримою, нас оградите от всех бед и от врагов видимых и невидимых сохраните непрестанною вашею молитвою ко Господу.

Ин тропарь, глас тойже

Премудрии вселенней врачеве, Кире и Иоанне, от Бога приясте власть целите недуги душевныя, вкупе же и телесныя, и ныне молитеся сохранити град и люди от одержащих зол и спасти молитвами вашими души наша.

Ин тропарь, глас тойже

Троичная благодать всельшися в честная сердца ваша, преблаженнии Кире и Иоанне, на духи нечистыя страшни прогонителие явистеся. И не точию явленным, но и тайным недугом врачеве бысте, темже, дерзновение имуще к Человеколюбцу Богу, непрестанною молитвою душевныя наша страсти исцелите.

Кондак, глас 3

От Божественныя благодати дар чудес приемше, святии, чудодействуете непрестанно, вся наша страсти рукодейством секуще невидимо, Кире Богомудре со Иоанном славным: вы бо Божественнии врачеве есте.

Ин кондак, глас 6

Великое врачевство вселенней, супряжение Христово возлюбленное, светильники сияющия, зарю исцелений, воспоем, вернии, велегласно, внутрь церкве им вопиюще: Кире и Иоанне, податели чудесем, врачеве недужным, освящаете вся страны.

Величание

Величаем вас, чудотворцы славнии Кире и Иоанне, и чтим честная страдания ваша, яже за Христа претерпели есте.

Ино величание

Величаем вас, чудотворцы славнии, Кире и Иоанне, и чтим святую память вашу, наставницы заблуждшим, исцелители болящим и собеседницы Ангелом.

Мученикам бессребреникам и чудотворцам Киру и Иоанну молятся об избавлении от оспы, чревных болезней, нарывов и струпьев, от различных недугов и болезней, в болезненном состоянии вообще.

О преславне чудотворче, преподобне отче Ксенофонте, данною ти свыше благодатию различная источаяй чудеса! Призри милостивно на предстоящия честней твоей раце люди и просящия сильныя твоея помощи, да твоими молитвами наставляеми, маловременное житие совершим богоугодне и ненаветно от козней лукаваго диавола; и во исходе душ наших помози нам многогрешным избавитися от воздушных мытарств и вечнаго мучения, и да улучим твоим ходатайством небесная благая, верным уготованная, и прославим вкупе с тобою всех благих Подателя, Единаго Всесильнаго в Троице Святей прославляемаго Бога, Отца и Сына и Святаго Духа, и твое милостивное предстательство, ныне и присно и во веки веков. Аминь.

Тропарь преподобному Ксенофонту Робейскому, глас 4

Пустыни явился еси доброе прозябение, отче преподобне, от юности бо чистое житие изволил еси, духовному учителю последуя, и, того учением ум твой к Небесным вперив, в пустыню вселился еси, и в ней обитель создал еси, и стаду твоему премудр наставник показался еси, Великому же Новуграду похвала и утверждение, темже и Христос, яко пресветла светильника, чудесы обогати и прослави тя. Ксенофонте, отче наш, моли Христа Бога спастися душам нашим.

Кондак, глас 2

Чистотою душевною божественно вооружився, и непрестанныя молитвы, яко копие, вручив крепко, пробол еси бесовская ополчения, Ксенофонте, отче наш, моли непрестанно о всех нас.

Величание

Ублажаем тя, преподобне отче Ксенофонте, и чтим святую память твою, наставниче монахов и собеседниче Ангелов.

Молитвы ко Пресвятой Богородице пред Ее иконою «Троеручица»