Помощь небесных покровителей. Полный сборник молитв на каждый день года (зима). Декабрь (Т. С. Олейникова, 2009)

Праведного Филарета Милостивого (792).

О великий и пречудный праведниче Божий милостиве Филарете! Предстоя на небеси престолу Божию с лики Ангелов, призри милостивым оком на люди, просящия сильныя твоея помощи. Умоли благосердие Человеколюбца Бога, да не осудит нас по беззаконием нашим, но да сотворит с нами по милости Своей! Многим, в скудости и недостаточестве живущим ты при жизни усердно помогал еси, людей убогих изобильно питал еси. Испроси нам у Христа, Бога нашего, мирное и безмятежное житие, здравие душевное и телесное, земли благоплодие и во всем всякое изобилие и благоденствие, и да не во зло обратим благая, даруемыя нам от щедраго Бога, но во славу Его и в прославление твоего заступления. Моли Господа, да хранит во здравии, мире, тишине и нелицемерном послушании семьи наши, от старших до последних; да дарует чадом нашим смирение и кротость, любовь и житие благоговейное, святое и во всем верное заповедям Божиим. По христианстей же кончине да сподобит всех нас получити Небесное Царствие, идеже вси праведнии, купно с тобою, присно славят Отца и Сына и Святаго Духа. Аминь.

Тропарь праведному Филарету Милостивому, глас 4

Аврааму в вере подражая, Иову же в терпении последуя, отче Филарете, благая земли разделял еси неимущим и лишение сих терпел еси мужественне. Сего ради светлым тя венцем увенча Подвигоположник, Христос Бог наш, Егоже моли спастися душам нашим.

Ин тропарь, глас 8

В терпении твоем стяжал еси мзду свою, праведне, и в заповедех Господних совершенне пожил, нищих возлюбил и сих удоволил еси, но молися Христу Богу, блаженне, спастися душам нашим.

Ин тропарь, глас тойже

В терпении твоем стяжал еси мзду твою, отче преподобне, в молитвах непристанно терпевый, нищия возлюбивый и сия удовливый, но молися Христу Богу, Филарете милостиве блаженне, спастися душам нашим.

Кондак, глас 3

Истинно всеизрядная твоя купля зрится и мудрою быти судится всеми благомудрствующими: отдал бо еси дольняя и кратковременная, взыскуя Горних и вечных. Темже и достойно стяжал еси вечную славу, милостиве Филарете.

Ин кондак, глас 4

Добродетельми украшаяся и страхом Божием предивен во всех явися Царскаго града, нищим сокровище богатства раздав и нетленно благих богатство на Небесех прием. Темже всюду и везде, Филарете, чтущих тя поминай, славо праведным и похвало.

Ин кондак, глас 2

Богатство твое расточил еси убогим и Небесное богатство ныне восприял еси, Филарете всеблаженне, сего ради тя почитаем, совершающе память твою, добродетели о тезоимените.

Величание

Величаем тя, святый праведный Филарете, и чтим святую память твою, ты бо молиши за нас Христа Бога нашего.

Праведному Филарету Милостивому молятся, чтоб пристроить в замужество дочерей, о помощи на море от бури и потопления, о заступничестве вдовиц и сирот, о помощи в бедности и нужде, в плену у врагов, о выходе из плена и заточения.

Преподобного Афанасия, затворника Печерского, в Ближних пещерах почивающего (ок. 1176).

Тропарь преподобному Афанасию, затворнику Печерскому, в Ближних пещерах почивающему, глас 3

Блаженство плачущих получити желая, день и нощь непрестанно плакал еси, имея во уме час Судный, тем по кончине твоей обрел еси утешение на Небеси, преподобне Афанасие. Подаждь и нам плакатися зде грехов наших выну, яко да плача безконечнаго избывше, тамо приимем вечное утешение.

Кондак, глас 5

Яко безсмертия тезоименит, по умертвии своем востал еси жив, показуя же, яко зело люта есть смерть, плакался еси горько. Ныне обретши некончаемую радость, молися о нас, яко да плача вечнаго избудем.

Величание

Ублажаем тя, преподобне отче Афанасие, и чтим святую память твою, наставниче монахов и собеседниче Ангелов.

Предстателъством преподобного Афанасия, затворника Печерского, молящимся с верою у святых его мощей подается Господом истинное покаяние.

Преподобного Саввы Сторожевского, Звенигородского чудотворца, ученика преподобного Сергия Радонежского (1406).

Молитвы преподобному Савве Сторожевскому, Звенигородскому чудотворцу

Тропарь преподобному Савве Сторожевскому, Звенигородскому, глас 8

Пустыни явился еси доброе прозябение, преподобне: от юности бо изволил еси чистое житие, духовному твоему учителю последуя, и того учением ум к Небесным вперив, и стаду твоему премудр наставник показался еси, тем и Христос, яко пресветла тя светильника, чудесы обогати, Савво, отче наш, моли спастися душам нашим.

Ин тропарь, глас тойже

От юности Божественною распаляем ревностию, возлюбил еси чистое житие, презрев мира сего красная и суетная, последовал еси твоему Богомудрому учителю, преблаженному Сергию, в труде и бдении, в посте и подвизе: на Сторожи явлься безмолвия ради и стражи духовныя недремленным на Божественней стражи предстоянием стяжал еси ум, зряй к Богу, и демонския кознии обстояния прозираяй, озарение Пресвятаго Духа в себе восприем, яко звезда пресветлая еси верным. Темже и премудр и светозарен предстоятель и пастырь стаду твоему явился еси, светом твоим просвещай и всех, приходящих к тебе верою, отче наш Савво, и моли Христа Бога, да спасет души наша.

Кондак, глас тойже

Безмолвия ради и плоти распинання вселивыйся на горе Сторожи, явился еси, преподобне Савво, столп веры непоколебимый, от Пресвятаго Духа осиянный, обитель пречестная Троицы, и непрестанными молитвами, слезными воздыхании и подвигами благодати Божественныя сопричастник; темже и Христос в нетлении мощей твоих прослави тя, и даром чудес украси тя. Мы же радостно ти вопием: радуйся, Савво, великий чудотворче.

Ин кондак, глас 2

Господним желанием распалився, страсти плотския воздержанием оттряс, Божественнаго света незаходимое светило явился еси, чудес лучами всех просвещаеши, притекающих к раце мощей твоих, Савво, преподобне отче наш.

Величание

Ублажаем тя, преподобне отче Савво, и чтим святую память твою, наставниче монахов и собеседниче Ангелов.

Великомученицы Варвары (ок. 306).

Молитвы великомученице Варваре

Тропарь великомученице Варваре, глас 8

Варвару святую почтим: вражия бо сети сокруши и, яко птица, избавися от них, помощию и оружием креста, всечестная.

Ин тропарь, глас 4

Агнице всеблаженная Варваро, божественне озарившися светом Святыя Троицы трисолнечным и в купели утвердившися в побеждение лести отеческия, веру исповедала еси Христову. Тем, всечестная, свыше благодать тебе дарова Бог, исцеляти недуги и болезни вся: Егоже моли, великомученице, да спасет души наша.

Кондак, глас 4

В Троице благочестно певаемому последовавши Богу, страстотерпице, идольская притупила еси чтилища; посреде же подвига страдальчествующи, Варваро, мучителей прещения не устрашилася еси, мужемудренная, велегласно поющи присно: Троицу чту, Едино Божество.

Величание

Величаем тя, страстотерпице Христова Варваро, и чтим честное страдание твое, еже за Христа претерпела еси.

Великомученице Варваре молятся, чтоб не умереть без исповеди и святого причащения, об избавлении от скоропостижной или внезапной смерти, у нее просят помощи и заступления за детей, об избавлении от тяжких недугов и болезней.

Преподобного Саввы Освященного, Иерусалимского (532).

Святителя Гурия, архиепископа Казанского (1563).

О предивный и всехвальный угодниче Божий, преподобне отче Савво! Днесь во святем храме твоем, благоговейно предстояще пред святою иконою твоею и радостно совершающе пресветлую память твою, ублажаем тя заступника нашего. Почитающе же твое велие дерзновение пред Господом, смиренно молим тя, преблаженне, приими милостивно от нас хвалебное пение сие, от любве и усердия тебе приносимое. И, яко имеяй велие дерзновение ко Господу, потщися Богоприятным твоим ходатайством испросити у Царя царствующих и Господа господствующих, яко да пробавит великия и богатыя милости Своя на нас грешных, да подаст нам дух правыя веры, дух ведения и любве, дух мира и радости о Дусе Святе, да избавит от бед и напастей, да низпослет вся полезная ко спасению душ наших. Всем же православным да дарует мир, тишину, безмятежие, усердие ко исполнению заповедей Его, изобилие плодов земных, и да избавит всю Российскую страну от глада, труса, потопа, огня, меча, нашествия иноплеменных и междоусобныя брани, смертоносныя язвы и от всякаго зла. Ей, угодниче Божий, не презри молений наших, но услыши нас, молящихся тебе, и под кровом заступления твоего сохрани нас (и обитель сию) ненаветны от врагов видимых и невидимых, да сподобимся скончати житие наше в покаянии и восприимем вечная благая во Царствии Христа Бога нашего, идеже восхвалим с тобою и всеми святыми достопокланяемое имя Пресвятыя Троицы, Отца и Сына и Святаго Духа, во веки веков. Аминь.

Тропарь преподобному Савве Освященному, Иерусалимскому, глас 8

Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Савво отче наш, моли Христа Бога спастися душам нашим.

Кондак, глас тойже

Яко от младенства Богу жертва непорочная принеслся еси добродетелию, Савво блаженне, садоделатель быв благочестия. Темже был еси преподобных удобрение, гражданин же пустынный достохвален. Темже зовем ти: радуйся, Савво пребогате.

Величание

Ублажаем тя, преподобне отче Савво, и чтим святую память твою, наставниче монахов и собеседниче Ангелов.

Молитвы святителю Гурию, архиепископу Казанскому

Тропарь святителю Гурию, архиепископу Казанскому, глас 4

Правило веры и образ целомудрия, учителя добрых дел и наставника спасения, даде тя Господь новопросвещенному граду Казани, в немже приобрел еси новыя от язык люди и привел еси я Христови. Сего ради в память твою радостно сошедшеся, честне празднуем святое твое успение, ты же, отче наш, святителю Христов Гурие, моли Христа Бога спастися душам нашим.

Ин тропарь, глас 4

От младости удаляяся земнаго мудрования и последовав скорбным путем Законоположителю своему Христу Богу. Темже и Он тя воздарова на земли нетлением, на Небесех же со угодившими Ему архиереи ликовствуеши, Гурие святителю, моли Христа Бога подати отечеству нашему на враги победу, и мир мирови, и душам нашим велию милость.

Кондак, глас 6

Истины основание и веры утверждение и в поучениих преизящнаго свемы тя благочестию споспешника, апостолом сопрестольника, страстотерпцем сопричастника, постником купноревнителя, похваляем тя, Гурие святителю, и велия таинника Божия благодати.

Ин кондак, глас 4

Чувственныя страсти победив, чистотою, яко солнце, восзиял еси, чисто житие до конца сохранив, и от неверия в веру многих ко Христу привел еси; Того ради от Бога нетлением почтен, чудесы твоими вся удивил еси. Молим убо тя, святителю Гурие, молитвами твоими от бед избави нас, да зовем ти: радуйся, отче предивный, граду Казани похвало и утверждение.

Величание

Величаем тя, святителю отче Гурие, и чтим святую память твою, ты бо молиши за нас Христа Бога нашего.

Святителю Гурию, архиепископу Казанскому, молятся об избавлении от головной боли и об исцелении глазных болезней.

Святителя Николая, архиепископа Мир Ликийских, чудотворца (ок. 345).

Молитвы святителю Николаю, архиепископу Мирликийскому

Тропарь святителю Николаю, архиепископу Мир Ликийских, глас 4

Приспе день светлаго торжества, град Барский радуется, и с ним вселенная вся ликовствует песньми и пеньми духовными; днесь бо священное торжество, в пренесение честных и многоцелебных мощей святителя и чудотворца Николая, солнце незаходимое возсия светозарными лучами и разгоняя тьму искушений же и бед от вопиющих верно: спасай нас, яко предстатель наш, великий Николае.

Ни тропарь, глас 4

Отечество свое, Миры Ликийския, не оставль духом, во премирный град Барский преславно телом пренесеся, архиерею Николае. И оттуду множество человеческое своим пришествием возвеселил еси и болящия исцелил еси. Темже тя молим, святителю Николае, моли Христа Бога, да спасет души наша.

Ин тропарь, глас 4

Правило веры и образ кротости, воздержания учителя яви тя стаду твоему, яже вещей истина; сего ради стяжал еси смирением высокая, нищетою богатая, отче священноначальниче Николае, моли Христа Бога спастися душам нашим.

Кондак, глас 3

В Мирех, святе, священнодействитель показался еси: Христово бо, преподобне, Евангелие исполнив, положил еси душу твою о людех твоих, и спасл еси неповинныя от смерти; сего ради освятился еси, яко великий таинник Божия благодати.

Ин кондак, глас 3

Взыде, яко звезда от востока до запада твоя мощи, святителю Николае, море же освятися шествием твоим, и град Барский приемлет тобою благодать: нас бо деля явился еси чудотворец изящный, предивный и милостивый.

Величание

Величаем тя, святителю отче Николае, и чтим святую память твою, ты бо молиши за нас Христа Бога нашего.

Святителю Николаю, архиепископу Мир Ликийских, чудотворцу, молятся об исцелении глазных болезней (он не только исцелял глазные болезни, но и возвращал зрение слепым), об исцелении от разных недугов и болезней, о покровительстве семейному очагу, о добрых отношениях в семье, о помощи в разных бедах, о благополучии в пути, когда потерялась дорога, за детей, от грусти и уныния, чтобы пристроить в замужество дочерей, на море от бури и потопления, о заступничестве вдов и сирот, о помощи в бедности и нужде, в плену у врагов (по молитве к нему Николай-угодник выводит из плена и заточения).

Преподобного Антония Сийского (1556).

Преподобного Нила Столобенского (1554).

Молитвы преподобному Антонию Сийскому

Тропарь преподобному Антонию Сийскому, глас 1

Желанием духовным распалився и мятежи мирския отринув, ко Единому Богу любовию прилепился еси, и Того вседушне взыскуя, во внутреннюю пустыню отшел еси, при водах вселився, идеже во слезах и трудех пребывая многолетное время, в терпении мнозем житие ангельское проходил еси, в наставлении Божественнаго Разума, и множество монахов собрал еси, мудрее, ихже посещая, не остави, Антоние, преподобне отче наш, Пресвятей Троице моляся, от зол всяческих избавити и спасти души наша.

Ин тропарь, глас 6

Иже воистину на земли тя ангела и на Небеси человека Божия почтим, сию жизнь суетную оставль, яко воистину преудобрен воин Христа Бога, на страсти душепагубныя подвизався в жизни сей суетней бдением и пощением, во всем быв образ своим учеником. Темже бо в тя вселися Пресвятый Дух, Егоже действием светло украшен, но яко имея дерзновение ко Святей Троице, поминай святую обитель сию и стадо свое, еже собрал еси, и не забуди, якоже обещася, посещай чад своих, Антоние преподобне, отче наш.

Кондак, глас 8

От юности, преподобне, плоть твою в постех и молитвах источил еси и крест твой взем, Христу последовал еси, темже и к вышним течение радостно совершил еси, идеже со всеми святыми Святей Троице предстоиши. И ныне стадо твое посещая, поминай чтущих пресвятую память твою, да вси благодарне вопием ти: радуйся, богомудре Антоние, наставниче пустынный.

Ин кондак, глас 3

Христа единаго вожделев, и к Тому любовию уязвився, и Тому неотложным путем последовал еси. Всякое житейское наслаждение возненавидев, темже, яко второе солнце, чудесы сияя, и сего ради тя даром обогати Владыка, поминай нас, чтущих пресветлую память твою, да зовем ти: радуйся, Антоние преподобне отче наш.

Величание

Ублажаем тя, преподобне отче Антоние, и чтим святую память твою, наставниче монахов и собеседниче Ангелов.

Молитвы преподобному Нилу Столобенскому

Тропарь преподобному Нилу Столобенскому, глас 4

Яко светильник всесветел явился еси во острове Селигера езера, преподобне отче Ниле: ты бо Крест Христов от юности своея на раму взем, усердно Тому последовал еси, чистотою Богови приближився, отонудуже и чудес дарованием обогатился еси. Тем и мы, притекающих к раце мощей твоих, умильно глаголем: отче преподобне, моли Христа Бога спастися душам нашим.

Кондак, глас 8

Отечества, преподобне, удалився, в пустыню вселился еси, и на остров Селигера езера возшед, жестоко житие показал еси, и многих добродетельми удивив, дарования чудес от Христа приял еси. Поминай нас, чтущих память твою, да зовем ти: радуйся, Ниле отче наш.

Величание

Ублажаем тя, преподобне отче Ниле, и чтим святую память твою, наставниче монахов и собеседниче Ангелов.

Преподобного Кирилла Челмогорского (Челменского) и Каргополъского, чудотворца, просветителя чуди (1367).

О блаженная и пречестная и благодати Святаго Духа исполненная главо, сосуде избранный Святыя Троицы, преподобне отче наш Кирилле, услыши нас, грешных, предстоящих ныне пред тобою и умильно молящих тя: помолися о нас, рабех твоих, ко Всемилостивому Владыце Иисусу Христу Богу нашему и Его рождшей Матери, Владычице нашей Богородице и Приснодеве Марии, еже отпустити нам согрешения наша, яже содеяхом. Вемы бо, отче наш, аще плотию и в персти почиваеши, но духом зде с нами неотступно и невидимо пребываеши, назирая нас и назидая по твоему неложному обещанию, сохраняеши от всяких обстояний. И якоже много дерзновение стяжавый ко Господу постническими твоими подвиги, умоли Его святыми твоими молитвами подати миру мир, Церкви Его Святей – единомыслие, стране – на враги победу, служащим же ти – друг ко другу любовь и согласие и всем людем, притекающим к тебе с верою, испроси у Господа к пользе душевней и телесней милость, мир, благословение, во еже избавитися нам всем в День Судный страшный, шуия части спастися, стати же одесную со избранными Его к наследию Царствия Небеснаго, яко Тому подобает всякая слава, честь и поклонение со Безначальным Его Отцем и Пресвятым и Благим и Животворящим Его Духом ныне, и присно, и во веки веков. Аминь.

Тропарь преподобному Кириллу Челмогорскому, просветителю чуди, глас 4

Днесь возсия нам пресветлая память твоя, славне, яко солнце светозарное, лучами благодати озаряющи весь мир и тьму нощи злых духов и от нас отгоняющи. Днесь Небесныя силы святых ангел, и мирский народ, и души праведных мысленно торжествуют, радующеся; днесь и мы, грешнии, припадающе молимся: отче преподобне Кирилле, Христа Бога моли непрестанно спасти обитель твою, град и люди, иже любезно тебе почитающия.

Кондак, глас 8

От юности, преподобне, вся оставль житейская, красная же и лепотная и в пустыню вселився, усердно последовал еси Звавшему тебе, преблаженне, в трудех же и постех, отче, тело свое изнурил еси, отонудуже тя пастыря Своим овцам добре устрояет всебогатый Господь, Кирилле чудодейственниче, моли Христа Бога о приходящих с верою и просящих своих прегрешений оставления даровати, чтущим любовию святую память твою.

Величание

Ублажаем тя, преподобне отче Кирилле, и чтим святую память твою, наставниче монахов и собеседниче Ангелов.

Зачатие праведной Анною Пресвятой Богородицы.

Иконы Божией Матери, именуемой «Нечаянная Радость».

Молитвы святым праведным Богоотцам Иоакиму и Анне, родителям Пресвятой Богородицы

Тропарь Богоотцам Иоакиму и Анне, глас 2

Праведных Твоих Иоакима и Анны, Господи, память празднующе, теми молим Тя, спаси души наша.

Ин тропарь, глас 1

Иже в законней благодати праведни бывше, Младенца Богоданнаго породиша нам, Иоаким и Анна. Темже днесь светло торжествует, весело празднующи, Божественная Церковь честную вашу память, славящи Бога, воздвигшаго рог спасения нам в дому Давидове.

Кондак, глас 2

Радуется ныне Анна, неплодства разрешившися соуз, и питает Пречистую, созывающи вся воспети, Даровавшаго от чрева ея человеком Едину Матерь и неискусомужную.

Величание

Величаем вас, святии праведнии Иоакиме и Анно, и чтим святую память вашу, вы бо молите за нас Христа Бога нашего.

Праведным Иоакиму и Анне молятся о разрешении от бесчадия и неплодства, о покровительстве посевам и о плодородии.

Молитвы ко Пресвятой Богородице пред Ее иконою «Нечаянная Радость»

Тропарь Божией Матери ради иконы Ее, именуемой «Нечаянная Радость», глас 4

Днесь, вернии людие, духовно торжествуем, прославляющее Заступницу усердную рода христианскаго, и, притекающе к пречистому Ея образу, взываем сице: о Премилостивая Владычице Богородице, подаждь нам нечаянную радость, обремененным грехи и скорбьми многими, и избави нас от всякаго зла, молящи Сына Твоего, Христа Бога нашего, спасти души наша.

Кондак, глас 6

Не имамы иныя помощи, не имамы иныя надежды, разве Тебе, Владычице! Ты нам помози, на Тебе надеемся, и Тобою хвалимся, Твои бо есмы раби, да не постыдимся.

Величание

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Пред иконой Пресвятой Богородицы «Нечаянная Радость» молятся об обращении заблуждших, о здравии и благополучии детей, об исцелении глухоты и болезней ушей, о возвращении отпавших от веры Православной в Церковь.

Святителя Иоасафа, епископа Белгородского, чудотворца (1754).

Молитвы святителю Иоасафу, епископу Белгородскому

Тропарь святителю Иоасафу, епископу Белгородскому, глас 3

Святителю Христу Богу возлюбленне, правило веры и образ милосердия людем был еси, бдением же, постом и молитвою, яко светильник пресветлый, просиял еси, и прославлен от Бога явился еси, телом убо в нетлении почивая, духом же престолу Божию предстоя, чудеса преславно источаеши. Моли Христа Бога, да утвердит Отечество наше в Православии и благочестии и спасет души наша.

Ин тропарь, глас 2

Молитвенниче издетства преизрядный, Богоизбранный святителю Христов Иоасафе, правило веры и образ милосердия благочестным житием всем являеши, и с верою к тебе притекающим обильно исцеления источаеши. Моли Христа Бога, да утвердит в державе Российстей правоверие, мир и благочестие и спасет души наша.

Кондак, глас 8

Многоразличныя подвиги жития твоего кто исповесть? Многообразныя милости Божия тобою явленныя кто исчислит? Дерзновение же твое у Пречистыя Богородицы и Всещедраго Бога добре ведуще, во умилении сердечнем зовем ти: не лиши и нас твоея помощи и заступления, святителю Христов и чудотворче Иоасафе.

Величание

Величаем тя, святителю отче Иоасафе, и чтим святую память твою, ты бо молиши за нас Христа Бога нашего.

Святителю Иоасафу, епископу Белгородскому, молятся о помощи в строительных работах.

Преподобного Кукши, исповедника (1964).

Преподобного Никона Сухого, Печерского, в Ближних пещерах почивающего (XII)

Иконы Божией Матери Порт-Артурская, именуемой «Торжество Пресвятой Богородицы» (1904).

О преподобне и богоносне отче наш Кукшо, обители Успения Божией Матери похвало, богоспасаемаго града Одессы неувядаемый цвете, кроткий пастырю Христов и великий за нас молитвенниче. Усердно к тебе прибегаем и с сокрушенным сердцем просим: не отыми покров твой от обители нашея, в нейже подвигом добрым подвизался еси. Буди помощник благий всем благочестно живущим и добре труждаюшимся в ней. О добрый наш пастырю и богомудрый наставниче, преподобие отче Кукшо, призри милостивно на предстоящия люди, умиленно молящиеся и просящие от тебе помощи и заступления.

Помяни всех, веру и любовь к тебе имущих, имя твое молитвенно призывающих и на поклонение мощем твоим святым приходящих, и вся во благих прошения их милостивно исполни, осеняя их святоотеческим твоим благословением. Избави, святый отче, от всякаго навета вражия Церковь нашу святую, град сей, обитель и землю нашу, и не остави заступлением твоим нас немощных, грехами и скорбями многими обремененных.

Озари, преблаженне, ум наш светом лица Божия, укрепи благодатию Господней жизнь нашу, да в законе Христове утвердившеся, неленостно по пути заповедей святых потечем. Осени твоим благословением нас, и всех в скорбех сущих, болезньми душевными и телесными одержимых, исцеление, утешение и избавление даруя. Над всеми же сими испроси нам свыше дух кротости и смиренномудрия, дух терпения и покаяния, отступившим от Православныя веры и погибельными ересьми и расколами ослепленным вразумление, во тьме неверия блуждающим светом истиннаго богопознания просвещение, раздоров и нестроений утоление.

Умоли Господа Бога и Пресвятую Богородицу даровати нам тихое и безгрешное житие.

Поминай нас недостойных у престола Вседержителя, и испроси мирную христианскую кончину, и сподоби нас помощию твоею спасение вечное улучити и Царствие Небесное унаследовати, да славословим велия щедроты и неизреченныя милости Отца и Сына и Святаго Духа, в Троице поклоняемаго Бога, и твое отеческое заступление во веки веков. Аминь.

Тропарь, глас 4

От юности мир суемудренный и лукавый оставил еси. Божественною свыше просветився благодатию, преподобне, многим терпением во временней жизни подвиг совершил еси, темже источаеши чудес благодать всем с верою приходящим к раце мощей твоих, Кукшо, преблаженне отче наш.

Кондак, глас 8

Подвижника благочестия искусна, новаго исповедника веры отеческия преподобнаго Кукшу верно вси ублажим, яко пастыря истиннаго, старца благостнаго, иноков наставника, утешителя малодушных, целителя недужных, и по кончине показующаго светлость жития своего. И днесь в память его притекше, радостно возопием: яко имея дерзновение к Богу, многообразных нас избави обстояний, да зовем ти: радуйся, утверждение людем православным.

Величание

Ублажаем тя, преподобне отче Кукшо, и чтим святую память твою, наставниче монахов и собеседниче Ангелов.

Тропарь преподобному Никону Сухому, Печерскому, в Ближних пещерах почивающему, глас 8

Бога Благаго возлюбив, иноческое приял еси житие и, добре в нем подвизався, пленен был еси половцы, имиже много мучим, крепкодушне Никоне, благодатию Христовою свободился еси от них невидимо, и ныне во Свете пребывая непреступнем, моли спастися нам, твою память почитающим.

Кондак, глас 6

Первомученику подобяся, о мучителе твоем молился еси и, избавив того от смерти, привел еси ко Христу, преподобномучениче Никоне славне, темже, с первострадальцем зря Христа одесную Отца, молися о нас, да не пребудем вне чертога Христова.

Величание

Ублажаем тя, преподобне отче Никоне, и чтим святую память твою, наставниче монахов и собеседниче Ангелов.

О Пресвятая Госпоже Дево Богородице, превышшая Херувимов и Серафимов и святейшая всех святых! Припадая к святей иконе Твоей, смиренно молимся: вонми гласу моления нашего, виждь скорби, виждь беды наша, и яко любвеобильная Мати, потщися на помощь нам безпомощным, умоли Сына Твоего и Бога нашего: да не предаст земли нашея на поругание варваров, да не погубит нас за беззакония наша, но явит человеколюбно нам милость Свою. Испроси нам, Владычице, у благости Его телесное здравие и душевное спасение, мирное житие и земли плодоносие, воздуха благорастворение и благословение свыше на вся благая дела и начинания наша, и якоже древле милостивно явила нам икону Твою Порт-Артурскую, яко защитницу земли Дальнероссийския, но за неверие и неблагоговение к святыням церковным язычниками плененную, тако и ныне припадаем ко вновь обретенному Твоему образу и приносим наше усердное молитвословие.

О Царице Всепетая! Простри ко Господу богоноснеи руце Твои, имиже Богомладенца Иисуса Христа носила еси и умоли Его избавити нас от всякаго зла. Яви, Владычице, милость Твою нам: болящия исцели, скорбящия утеши, бедствующим помози и сподоби нас благочестно житие земное совершити, христианскую кончину получити и Царствие Небесное наследити Матерним Твоим ходатайством к Рождшемуся от Тебе Христу Богу нашему, Емуже со Безначальным Его Отцем и Пресвятым Духом подобает всякая слава, честь и поклонение, ныне и присно и во веки веков. Аминь.

Тропарь Божией Матери ради иконы Ее Порт-Артурской «Торжество Пресвятой Богородицы», глас 4

Днесь торжествует град Владивосток, и с ним сликовствуют вси пределы земли Дальнероссийския, сретая вновь обретенную икону Твою, Богомати, Порт-Артурскою нареченную, в благословение и знамение торжества христолюбивому воинству Дальней России дарованную, на ню же взирающе, вси зовем: Русь Святая, храни веру Православную, в ней же твое утверждение.

Ин тропарь, глас 2

Пречистому образу Твоему покланяемся, Благая, просяще прощения прегрешений наших, у Креста бо предстояла еси, на негоже Сын Твой благоволил плотию взыти, да избавит яже создал от работы вражия, темже благодарственно вопием Ти, Пречистая: радуйся, Воеводо Взбранная!

Кондак, глас 4

Избранней от всех родов Заступнице нашей и Царице, покровом Твоея благости покрывающей пределы земли Дальнероссийския, благодарственная пения приносим Ти раби Твои, Богородице. Ты Всемилостивая Владычице, от всяких нас бед спаси и вечных мук свободи.

Величание

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Пред иконой Пресвятой Богородицы Порт-Артурская «Торжество Пресвятой Богородицы» молятся о флоте, о России, о торжестве Православия, об избавлении от нападения врагов на Россию. Она является покровительницей земли Дальнероссийской.

Святителя Спиридона, епископа Тримифунтского (Тримифийского), чудотворца (ок. 348).

Преподобного Ферапонта Монзенского, Галичского (1597).

Молитвы святителю Спиридону, епископу Тримифунтскому, чудотворцу

Тропарь святителю Спиридону, епископу Тримифунтскому, глас 4

Правило веры и образ кротости, воздержания учителя яви тя стаду твоему, яже вещей истина; сего ради стяжал еси смирением высокая, нищетою богатая, святителю отче Спиридоне, моли Христа Бога спастися душам нашим.

Ин тропарь, глас 4

Собора Перваго показался еси поборник и чудотворец, богоносе Спиридоне, отче наш. Темже мертву ты во гробе возгласив, и змию в злато претворил еси: и внегда пети тебе святыя молитвы, ангелы, сослужащия тебе, имел еси, священнейший. Слава Давшему тебе крепость, слава Венчавшему тя, слава Действующему тобою всем исцеления.

Кондак, глас 2

Любовию Христовою уязвився, священнейший, ум вперив зарею Духа, детельным видением твоим деяние обрел еси, богоприятне, жертвенник божественный быв, прося всем божественнаго сияния.

Величание

Величаем тя, святителю отче Спиридоне, и чтим святую память твою, ты бо молиши за нас Христа Бога нашего.

Святителю Спиридону, епископу Тримифунтскому, молятся об исцелении от различных недугов и болезней, о помощи при голоде.

О преподобне отче, великий заступниче, скорый услышателю, угодниче Божий и чудотворче Ферапонте! Не забуди ны, якоже обещался еси, посещай чада твоя; аще бо и отшел еси от нас телом, но духом присно с нами пребываеши. Молим убо тя, о преподобне отче: избави ны от огня и меча, от нашествия иноплеменных и междоусобныя брани, от тлетворных ветров и от внезапныя смерти, и от всех прилог вражиих, находящих на ны. Услыши ны грешныя, приими молитву и моление наше, еже к тебе, яко кадило благовонное и яко жертву благоприятную, приносим. Умерщвленныя злыми делы, словесы и помышленьми души наша, преподобие отче, оживи и возстави. И якоже многи приходящия к цельбоносному твоему гробу с верою, всякими скорбьми и болезньми люте страждущия исцелил еси, тако и нас исцели от недугов душевных и телесных. Исторгни нас из глубины согрешений и на путь покаяния настави, милостивым твоим предстательством от видимых и невидимых враг избавляя. Помози нам в житии сем и во исходе душ наших и в будущей жизни, во веки веков. Аминь.

Тропарь преподобному Ферапонту Монзенскому и Галичскому, глас 8

Любовию Христовою, богомудре, просветився, и добродетельми сожительствовал еси Василию Блаженному, и, всякое наслаждение плотское возненавидев, в пустыню вселился еси, в ней же вельми подвизался еси, в жизни сей временней плоть умерщвляя свою в пениих, и во бдениих, и в пощениих. Темже и Христос даром чудес обогати тя, но поминай убо нас, чтущих пресветлую память твою, преподобне отче Ферапонте, и моли Христа Бога спастися душам нашим.

Кондак, глас 8

Возложив себе Богу от юности, преподобне, Того паче всех возлюбив, и Тому от всея души любовию последовал еси, тленная и красная мира нивочтоже вменив, в пустыню вселився, в ней же добре подвизался еси противу невидимых врагов козней и, яко светозарное солнце, в концех Галическия земли возсиял еси, отонудуже, веселяся, пришел еси к Небесным обителем, и ныне со ангелы Владычню престолу предстоя, поминай нас, чтущих память твою, да зовем ти: радуйся, Ферапонте, отче наш.

Величание

Ублажаем тя, преподобне отче Ферапонте, и чтим святую память твою, наставниче монахов и собеседниче Ангелов.

Преподобному Ферапонту Монзенскому молятся об исцелении от глазной болезни.

Преподобного Аркадия Новоторжского, Вяземского (XI).

Преподобного Германа Аляскинского, равноапостола Алеутского (1837).

Мученики Евстратий, Авксентий, Евгений, Мардарий и Орест.

О преподобне и богоносне отче наш Аркадие! Услыши нас, молящихся тебе, и буди нам помощник в скорбех наших, и избави нас от напастей, за множество прегрешений находящих на ны: умоли, угодниче Христов, Всеблагаго Бога даровати нам оставление всех от юности нашея до настоящего дне и часа делом, словом, помышлением и всеми чувствы содеянных нами согрешений, исходатайствуй нам невозбранный вход в Небесное Царствие, да прославляем непрестанно славимую от ангел Всесвятую Троицу, Отца и Сына и Святаго Духа, и твое милостивное предстателство, в безконечныя веки. Аминь.

Тропарь преподобному Аркадию Новоторжскому, Вяземскому, глас 4

От духовнаго наставника, преподобнаго Ефрема, наставляем, послушания добрый рачителю, отче Аркадие, от мирскаго мятежа удалился еси, и инок быв изрядный, добрым подвигом ревнуяй, от Христа Бога венец славы Небесныя приял еси, и ныне вкупе с преподобным отцем Ефремом у престола Вышняго предстоя, о нас молися, избавитися нам от всех бед и скорбей и спастися душам нашим.

Кондак, глас 2

К глубинам Божественнаго Разума вперив ум свой, в Небесныя обители востекл еси и равноангельное житие, отче Аркадие, на земли пожил еси, и во всем повинулся еси духовному своему настоятелю и наставнику, преподобному отцу Ефрему, и ныне, вкупе предстояще у престола Владыки Христа, молися непрестанно о всех нас.

Величание

Ублажаем тя, преподобне отче Аркадие, и чтим святую память твою, наставниче монахов и собеседниче Ангелов.

О предивный угодниче Божий, преподобне отче наш Германе, ты подвигом добрым подвизался еси во стране сей, среди суровыя природы, явил еси себе в малом верно во служении твоем Богу, по глаголу Его: о малем был еси верен, над многими поставлю тя. И ныне, егда исполнися слово сие Господне на тебе постави тя Господь над всею Церковию Американскою, яко Небеснаго покровителя, все мы взываем ти теплою молитвою: молися за Церковь нашу святую, да сохранит ю Господь в чистоте и Православии, да явит ю украшение страны нашея, да оградит ю от темных сил вражиих, да изженет супостаты и да дарует всем чистоту веры и благочестие. Всем же нам испроси дух мира и любве, духа кротости и смирения, гордыни отгнание, от самопревозношения ограждение, болящим помощь и исцеление, скорбящим утешение, алчущим правды духовныя пищу Небесную. Да, уличивше желаемая, обрящем праведное воздаяние в день страшнаго суда и со всеми святыми воспоем и прославим Живоначальную Троицу, Отца Непостижимаго, Истиннаго и Единароднаго Сына и Святаго Утешителя Духа, во веки. Аминь.

Тропарь преподобному Герману Аляскинскому, равноапостолу Алеутскому, глас 1

Лозу Православия принесл еси в Америку из России благочестивыя и, удобрив корень постническими трудами и напоив обильне молитвенными слезами, плоды принесл еси – виноград возлюбленный, Германе, преблаженне отче наш. Темже и Бог тя прослави, яко апостола преподобнаго, нетлением мощей и благодатию чудес, от нихже почерпывающе благодеяния, восхваляем тя: слава Давшему ти крепость, слава Венчавшему тя, слава Даровавшему тя Америце светило Православия.

Ин тропарь, глас 3

Преподобне отче наш Германе, первый светильниче, в земли нашей просиявый, приносим вси тебе похвалы сия, ты же, яко имеяй дерзновение ко Господу, буди заступник нам, и утешитель, и Церкви нашея покровитель дивный, да вси со умилением зовем ти: радуйся, отче наш Германе, Аляски и всея Америки преславный чудотворче.

Кондак, глас 8

Взбранному Воеводе своинствовався, в брань вступил еси на духа злобы в поле преподобия и апостольства. И, пожав победы обоюдныя, воздвизаеши нас вопити тебе: радуйся, святе Германе, апостоле преподобный.

Ин кондак, глас тойже

Валаама пострижник, честный возлюбленник Божией Матери бывый, ревнитель подвигов древних подвижник новый, молитву, яко копие и щит, приемый, страшен демоном и тьме язычестей ставый, Германе преподобне, моли Христа Бога спасти души наша.

Величание

Величаем тя, святый равноапостольный Германе, и чтим святую память твою, ты бо молиши за нас Христа Бога нашего.

Молитва святым мученикам Евстратию, Авксентию, Евгению, Мардарию и Оресту

Святые страстотерпцы пяточисленные, теплые молитвенники о душах наших, видя наши беды и напасти, скорби, нужды и злоключения, помогите нам, славные страдальцы, с верою и любовию почитающим вас. Аминь.

Тропарь, глас 4

Мученик всечестных светлость, пяточисленных страстотерпцев воспоем, славу земных презревших, солнца светлаго Евстратия, премудраго витию со страдальцы, на огнь и муки дерзнувших за всех Царя Христа и от Престола Того славы почестьми венцев обдаренных. Тех молитвами, Христе Боже, спаси души наша.

Кондак, глас 8

Светильницы светлии явльшеся, божественнии мученицы, тварь всю светлостию чудес озаряете, недуги разрешающе, и глубокую тьму всегда отгоняюще, Христу Богу молящеся непрестанно о всех нас.

Ин кондак, глас 3

Витийствуя пред беззаконнующими божественная, биения претерпел еси мужественнейшим сердцем, облистал еси богознаменьми, пречудне, угасил еси возвышенный прелести пламень, сего ради тя чествуем, всеблаженне мучениче Христов Евстратие.

Ин кондак, глас 2

Светильник явился еси светлейший во тьме неведения седящим, страстотерпче: верою бо, яко копием, обожився, врагов шатания не убоялся еси, Евстратие, риторов сый благоязычнейший.

Величание

Величаем вас, страстотерпцы святии Евстратие, Авксентие, Евгение, Мардарие и Оресте, и чтим честная страдания ваша, яже за Христа претерпели есте.

Святым мученикам Евстратию, Авксентию, Евгению, Мардарию и Оресту молятся о помощи при бедности и нужде.

Мучеников Фирса, Левкия и Каллиника и иже с нижи (249–251).

Тропарь мученикам Фирсу, Левкию, Каллинику и иже с ними, глас 4

Мученицы Твои, Господи, Фирс, Левкий, Каллиник, во страданиих своих венцы прияша нетленныя от Тебе, Бога нашего, имуще бо крепость Твою, мучителей низложиша, сокрушиша и демонов немощныя дерзости. Тех молитвами спаси души наша.

Кондак, глас 2

Благочестия веры поборницы, злочестиваго мучителя оплевавше, обличисте зверообразное его кровопролитие, и победисте того яростное противление, Христовою помощию укрепляеми, Фирсе и Левкие, с пострадавшими, о нас молитеся.

Величание

Величаем вас, страстотерпцы святии Фирсе, Левкие и Каллиниче со пострадавшими, и чтим честная страдания ваша, яже за Христа претерпели есте.

Святителя Стефана исповедника, архиепископа Сурожского (VIII).

Преподобного Трифона Печенгского, Кольского (1583).

О священная главо, крепкий наш молитвенниче и заступниче, святителю отче Стефане, услыши нас, с верою и любовию призывающих тя. Поминай нас у престола Вседержителева и не престай молитися за нас. Испроси предстательством твоим у всемилостивейшаго Спаса нашего: мир Церкви Его, пастырем Божиим ревность и силу, православней стране нашей мир и спасение. Умоли Небеснаго Отца всем подати коемуждо благопотребен дар: веру истинную, надежду твердую, любовь неоскудную, градов наших утверждение, от нашествия иноплеменников сохранение, юным благое в вере возрастание, старым и немощным утешение и укрепление, болящим исцеление, сирым и вдовицам милость и заступление, бедствующим помощь. Не посрами нас во уповании нашем, споспешествуй, яко отец чадолюбивый, и нам понести благое иго Христово во благодушии и терпении и всех нас управи в мире и покаянии непостыдно живот свой скончати и Царствия Божия наследницы быти, идеже ты ныне водворяешися со ангелы и всеми святыми, выну хваля Бога в Троице славимаго, Отца и Сына и Святаго Духа. Аминь.

Тропарь святителю Стефану исповеднику, архиепископу Сурожскому, глас 4

Яко святитель со безплотными единожитель быв, священномучениче Стефане, восприем бо Крест, яко оружие, и став крепко сопротив иконоукорителя и духоборцев, не покланяющихся Пречистому Образу Христа Бога нашего, и отсекл еси всяку ересь лукавых. Того ради прием мучения венец, избавил еси град твой Сурож от всякия неприязни. И ныне молим тя, святе, да избавиши нас от всяких злых искушений, и бед, и вечныя муки.

Кондак, глас 3

Вышняго силою, священне, укрепився, царева низложил еси иконоборная шатания. Днесь Сурожу и нам верным предлежат слава и богатство, святыя твоя мощи, ихже свыше дароносят ангельстии чинове, песньми и пением славословят тя, великий священный Стефане.

Величание

Величаем тя, святителю отче Стефане, и чтим святую память твою, ты бо молиши за нас Христа Бога нашего.

О Всесвятыя Троицы угдниче, о блаженнейший и равноапостольный пастырю, преподобне отче наш Трифоне! Не забуди твоея паствы, поминай во святых твоих и богоприятных молитвах, приносимых в Троице славимому Богу, стадо твое, еже сам, по благовестию от ангела, пришествием твоим собрал и упасл еси. Понеже в сродстве твоего мирского жилища, слышав во святей церкви на утрени поющих: «Пустынным живот сокровен есть, Божественным рачением воскриляющимся»: и от того восперився Божественною любовию, оставль дом и сродство и пришед в край северныя страны, просветил еси святым крещением неведущия Творца, всех Бога, Лопарский народ, за еже, во утверждении Христианския веры, многа изгнания и злоключения подял еси: и близ реки Печенги в пустыню вселився, братию из многих градов и весей собрав, велию обитель воздвигл еси, и при отшествии к небесным селением, о посещении твоея обители пророчествия дар от Бога восприял еси, и по смерти на мори и на суше многа чудеса и цельбы с верою просящим сотворил еси и ныне твориши. Темже молим тя, не забуди присещати чад твоих: моли за ны, преподобне отче, приходящия к тебе с верою, и за вся христианы, яко имеяй дерзновение к безсмертному Царю Христу всех Богу: не премолчи за ны ко Господу и не презри нас, верою и любовию чтущих тя и поминающих святую память твою. Аще бо ты и преставился еси от нас телом, но и по смерти, живый духом, всегда чудодействуеши. Молитвами твоими сохраняй нас от стрел и козней вражиих, и всякия прелести бесовския, и от враг видимых и невидимых. Пастырю наш добрый! Аще мощи твоя в раце незримы нам суть, обаче, понеже всегда в Троице славимому Богу, при престоле Его непостижимаго величествия неотступно в молитвах предстоиши, усердно к тебе прибегаем и просим: умоли и испроси нам время к покаянию, да в час исхода души прейдем от земных к небесным, мытарств же воздушных и вечныя муки избавимся, и Небесному Царствию наследницы будем со всеми от века угодившими. О всеблаженне и преподобне отче наш Трифоне! Не презри и ныне нас, притекающих к тебе, яко да, молитвами твоими и помощию спасаеми, славу и благодарение, хвалу и поклонение за вся в Троице Единому Богу, всех Создателю, возсылаем, Отцу и Сыну и Святому Духу, ныне и присно и во веки веков. Аминь.

Тропарь преподобному Трифону Печенгскому, Кольскому, глас 8

Пути вводящаго в жизнь наставник и учитель был еси; первее бо, преподобне отче наш Трифоне, пришел еси в часть Норвегския земли, и в последних концех северныя страны языки просветил еси, породив водою и Духом Святым, и священная твоя чада в безплодней пустыни, яко древа масличная, насадил еси, велию обитель Святыя и Живоначальныя, Единосущныя и Нераздельныя Троицы создал еси и монахов множество собрал. Тем, яко апостолом и пустынножителем равночестна чтуще тя, прилежно припадающе, вопием: моли всех Бога за область твою, и за вся люди, почитающия память твою.

Кондак, глас тойже

Все твое умное желание к Богу вперив, и Того званию невозвратно от души последовал еси, в пустыню конечную вселився, и тамо ангельски и равноапостольне пожив, многим путь был еси ко спасению. Сего ради и Христос тя прослави, и даром чудес обогати, ибо великих царей Иоанна и Феодора Российских чудесы удивил еси. Темже вси вопием ти: радуйся, исповедниче Христа Бога нашего, радуйся, граду твоему непоколебимое утверждение, Трифоне отче наш.

Величание

Ублажаем тя, преподобне отче Трифоне, и чтим святую память твою, наставниче монахов и собеседниче Ангелов.

Преподобной Софии Суздальской (Суждалъской), в миру великой княгини Соломонии Сабуровой (1542).

Тропарь преподобной Софии Суздальской, глас 4

Вышняго красотою явственно украшаяся, постнически бо труды подвизася преподобная София и бысть наследница Небесному Царствию, и вниде в Небесный Чертог насладитися Христовы красоты, Егоже моли спастися граду Суждалю от поганых нахождения и междоусобныя брани и подаждь душам нашим велию милость.

Кондак, глас 1

Нощи страстныя избегши, богомудрая Софие преподобная, к Незаходимому же Солнцу, Христу, пришедши, умертвила еси плотское мудрование постом же, воздержанием и молитвами, показася равна ангелом, на земли бо поживе и духи нечистыя от человек отгнала еси, и различная исцеления подаваеши, от многих бед и зол избавляеши, Софие преподобная, моли спастися душам нашим.

Величание

Ублажаем тя, преподобная мати Софие, и чтим святую память твою, ты бо молиши за нас Христа Бога нашего.

Пророка Даниила и трех отроков: Анании, Азарии и Мисаила (600 г. до P.Х.).

Тропарь пророку Даниилу и трем отрокам, глас 2

Велия веры исправления, во источнице пламене, яко на воде упокоения, святии трие отроцы радовахуся, и пророк Даниил львом пастырь, яко овцам, являшеся. Тех молитвами Христе Боже, спаси души наша.

Кондак пророку Даниилу, глас 3

Просветившееся Духом чистое твое сердце, пророчества бысть светлейшаго приятелище, зриши бо, яко настоящая, далече сущая, львы укротил еси, ввержен в ров; сего ради тя почитаем, пророче блаженне, Данииле славне.

Кондак трем отрокам, глас 6

Рукописаннаго образа не почетше, но Неописанным Существом защитившеся, треблаженнии, в подвизе огня прославистеся, среде же пламене нестерпимаго стояще, Бога призвасте: ускори, о Щедрый, и потщися, яко Милостив, в помощь нашу, яко можеши хотяй.

Величание пророку Даниилу

Величаем тя, пророче Божий Данииле, и чтим святую память твою, ты бо молиши за нас Христа Бога нашего.

Величание трем отрокам

Величаем вас, святии трие отроцы Анание, Азарие и Мисаиле, и чтим святую память вашу, вы бо молите за нас Христа Бога нашего.

Прославление праведного Симеона Верхотурского (1694).

Преподобного Севастиана Пошехонского, Сохотского (ок. 1500).

О святый и праведный Симеоне, чистою душею твоею в небесных обителех в лице святых водворяяйся, на земли же телом твоим нетленно почиваяй! По данной ти благодати от Господа молитися о нас, милостивно призри на нас многогрешных, аще и недостойне, обаче с верою и упованием ко святым и цельбоносным мощем твоим притекающих, и испроси нам от Бога прощение согрешений наших, в няже впадаем множицею во вся дни жития нашего, и якоже прежде овым убо от очныя зельныя болезни ни мало зрети могущим исцеление очес, овым же близ смерти бывшим от лютых недугов врачевание, и иным иная многая преславная благодеяния даровал еси: сице избави и нас от недугов душевных и телесных и от всякия скорби и печали, и вся благая к настоящему житию нашему и к вечному спасению благопотребная нам от Господа испроси, да тако твоим предстательством и молитвами стяжавше вся нам полезная, аще и недостойнии, благодарне восхваляюще тя, прославим Бога, дивнаго во святых Своих, Отца и Сына и Святаго Духа, и ныне и присно и во веки веков. Аминь.

Тропарь праведному Симеону Верхотурскому на перенесение мощей, глас 4

Днесь радуется славная страна Сибирь, обретши святыя твоя мощи внутрь себе. Архиереи, священницы и весь сонм людский, духовне веселящеся, вопием ти: о богомудре Симеоне! Избави нас, к тебе прибегающих, от всех бед, просяще податися всем по коегождо прошению и избавитися стране сей и граду от огненнаго запаления и поганскаго нашествия и междоусобныя брани и от всякаго зла. Чтуще же ныне честных и многоцелебных мощей твоих пренесение, новый целебниче, вси мы вопием: слава Давшему тобою всем исцеление!

Ин тропарь на прославление, глас тойже

Мирскаго мятежа бегая, все желание обратил еси к Богу, да в видения восход обрящеши горе, и тако не уклонився в лукавствия сердца, но очистив душу и тело, приял еси благодать точити цельбы верным и неверным, притекающим к раце мощей твоих, Симеоне праведне. Темже, по данному ти дару, испроси у Христа Бога исцеление нам болящим душевными страстьми и моли спасти души наша.

Кондак на перенесение мощей, глас 4

Наста днесь всечестная память новаго целебника праведнаго Симеона, созывает же люди в пречестный храм святаго Божия архиерея Николая, идеже радостно сошедшеся благочестивых множества, весело празднуют пренесение честных и многоцелебных мощей твоих праздник. Ты бо явился еси граду нашему и всей Сибири врачевство безмездное, подавая исцеление с верою приходящим к тебе, Симеоне всеблаженне! Но яко имеяй дерзновение ко Владыце Христу, Того моли спасти град и люди, молящияся тебе, паче же ходатай буди ко Господу во дни нашествия печали рабом твоим, да зовем ти: радуйся, Сибирстей стране похвало и утверждение граду нашему.

Ин кондак на прославление, глас 2

Мира суетнаго отверглся еси, да блага вечныя жизни наследиши, возлюбив незлобие и чистоту души и тела. Снискал еси, еже возлюбил, свидетельствуют бо о сем гроб и нетление мощей твоих, и благодать чудотворения наипаче. Точиши бо цельбы всем притекающим к тебе и непросвещенным, Симеоне блаженне, чудотворче предивный.

Величание

Величаем тя, святый праведный Симеоне, и чтим святую память твою, ты бо молиши за нас Христа Бога нашего.

Праведному Симеону Верхотурскому молятся об исцелении болей ног (он сам, пеший, совершил свой путь из России в Сибирь, чувствуя изнеможение в своих ногах), об исцелении болезней глаз.

О святый преподобне отче, преблаженне Севастиане, первейший пустыни сея просветителю, и иноческаго в ней жития законоположителю, и сея обители основателю! Ты убо телом человек был еси, житием же яко ангел явился еси: уста бо твоя, якоже серафимская, Бога день и нощь хваленьми прославляху, пресветлое же житие твое бысть чистоты и целомудрия зерцало. Се аз раб недостойный дерзаю припадати к честным и цельбоносным мощем твоим: не отрини мене, с верою и любовию тебе покланяющагося и тебе, угодниче Христов Севастиане, сице молящагося: буди ми учитель и просветитель, душевныя страсти утишая, и телесныя болезни исцеляя, и на путь спасения наставляя. О преблаженне отче Севастиане! Милостив буди скорбней и грешней души моей, и представи ю ко Господу спасену, под кров твой притекающую, да твоим, отче, ходатайством сохранен буду от враг видимых и невидимых, и восхвалю Бога, в Троице Святей прославляемаго, Отца и Сына и Святаго Духа, ныне и присно и во веки веков. Аминь.

Тропарь преподобному Севастиану Сохотскому, Пошехонскому, глас 4

Удалився мира и водворився в пустыни, добрым подвигом подвизася, злостраданием, и вниманием, и молитвами, отнюдуже и по смерти источаеши исцеления, Севастиане отче наш, моли Христа Бога спастися душам нашим.

Кондак, глас 3

Сиянием Духа Пресвятаго, мудре Севастиане, просвещся, оставил еси яже в житии молвы, пустыню же достигл, преподобне отче, возвеселил еси иже над всеми Бога и Зиждителя. Сего ради прославляет тя Христос, блаженне, Великий Дародатель.

Величание

Ублажаем тя, преподобне отче Севастиане, и чтим святую память твою, наставниче монахов и собеседниче Ангелов.

Мученика Вонифатия (290).

Святителя Вонифатия Милостивного, епископа Ферентийского (VI).

Преподобного Илии Муромца, Печерского, в Ближних пещерах почивающего (около 1188).

Молитвы мученику Вонифатию

Спаси, Господи, и помилуй рабов Твоих (имярек) словесами божественнаго Евангелия Твоего, читаемыми о спасении рабов Твоих сих (имярек). Попали, Господи, терние всех согрешений их, вольных и невольных, и да вселится в них благодать Твоя, просвещающая, опаляющая, очищающая сего человека. Во имя Отца и Сына и Святаго Духа. Аминь.

Тропарь мученику Вонифатию, глас 4

К сословию послан мучеников, мученик был еси истинен, пострадав за Христа крепчайше, всехвальне, мощми же возвратился еси верою пославшей тя, Вонифатие блаженне, моли Христа Бога прияти нам грехов прощение.

Кондак, глас тойже

Священие непорочное самовольне Тебе привел еси, иже от Девы тебе ради родитися Хотящему, святе венченосче, премудре Вонифатие.

Ин кондак, глас тойже

Изыде к приятию страстотерпческих мощей и страждущих законне веры ради зря, показал еси мужески крепость свою, устремився на страсти исповеданием во Христа, Иже прием почесть победы твоего страдания, Вонифатие, присно моли за ны.

Величание

Величаем тя, страстотерпче святый Вонифатие, и чтим честная страдания твоя, яже за Христа претерпел еси.

Мученику Вонифатию молятся об избавлении от страсти пьянства и запоя.

О всесвятый Вонифатие, милостивый рабе милосерднаго Владыки! Услыши прибегающих к тебе, одержимых пагубным пристрастием к винопитию и, яко в своей земней жизни ты никогда не отказывал в помощи просящим тебе, тако и ныне избави сих несчастных (имена): некогда, богомудре отче, град побил твой виноградник, ты же, воздав благодарение Богу, велел немногие сохранившиеся грозды положити в точило и позвати нищих, затем взяв новое вино, ты разлил его по каплям во вся сосуды, бывшие в епископии, и Бог, исполняющий молитву милостивых, совершил преславное чудо: вино в точиле умножилося и нищие наполнили сосуды своя; о, святителю Божий! Како по молитве твоей умножилося вино для нужд церкви и для пользы бедных и убогих, тако ты, блаженне уменьши его ныне тамо, где оно приносит вред, избави от пристрастия к нему предающихся постыдной страсти винопития (имена), исцели их от тяжкаго недуга, свободи от бесовскаго искушения, утверди их, дай им, немощным, крепость и силу благоуспешно перенести сие искушение, возврати их к здравой, трезвой жизни, направи их на путь труда, вложи в них стремление к трезвости и духовней бодрости, помози им, угодниче Божий Вонифатие, когда жажда вина станет жечь их гортань, уничтожи их пагубное желание, освежи их уста небесною прохладою, просвети их очи, постави их ноги на скале веры и надежды, дабы, оставив свое душевное пристрастие, влекущее за собою отлучение от Небеснаго Царства, они утвердилися во благочестии, удостоилися непостыдной мирной кончины и в вечном свете безконечнаго царства славы достойно прославляли Господа нашего Иисуса Христа со Безначальным Его Отцем и с Пресвятым и Животворящим Духом во веки веков. Аминь.

Святителю Вонифатию молятся об избавлении от страсти пьянства и запоя.

О святый преподобный отче Илие! Руси Святой заступниче, могучий ратоборче, воине духовный и телесный ей явивыйся, в житии своем благу народа русскаго и прославлению Бога христианскаго верно послуживый, и по преставлении своем предстательства своего о нас не оставивый. Испроси, святе, у Всемилостиваго Господа Отечеству нашему царя, мир и благоденствие, Церкви благоустроение, людем православным от нечестивых избавление, воином русским в ратех победу и на врагов, замышляющих злая Церкви и Отечеству православному, одоление, всех же нас заступи. И еще просим тя, святче Божий, разум нам от Бога ниспосли, да познаем согрешения наша и силу духовную, да покаемся во грехах наших, и крепость телесную, да возмощи нам житие исправити и Русь Святую возродити, и в Царствие Небесное из нея преити, да тамо с тобою и всеми святыми сподобитися непрестанно восхваляти в Троице славимаго Бога, Отца и Сына и Святаго Духа во веки веков. Аминь.

Преподобному Илии Муромцу, Печерскому, в Ближних пещерах почивающему, молятся о покровительстве пограничной службе и целостности границ.

Предпразднество Рождества Христова.

Священномученика Игнатия Богоносца (107).

Праведного Иоанна Кронштадтского (1908).

Ленъковской (Новгород-Северской), именуемой «Спасительница утопающих» (XVII), и Пюхтицкой «У источника» (1894) икон Божией Матери.

Тропарь предпразднеству, глас 4

Готовися, Вифлееме, отверзися всем Едеме, красуйся Евфрафо, яко Древо Живота в вертепе процвете от Девы, рай бо Оная чрево явися мысленный, в немже Божественный сад, от негоже ядше, живи будем, не якоже Адам умрем. Христос раждается прежде падший возставити образ.

Кондак, глас 3

Дева днесь Превечное Слово в вертепе грядет родити неизреченно; ликуй, вселенная, услышавши, прослави со ангелы и пастырьми хотящаго явитися Отроча Младо, Превечнаго Бога.

О великий святителю Богоносный Игнатие! К тебе припадаем и молим тя, призри на ны грешныя, прибегающия к твоему заступлению! Умоли Господа, да простит нам вся согрешения наша; ты мученически душу твою за веру положил еси, даруй и нам мужество во всем подражати тебе. Ничто в жизни не возмогло отлучити тя от любве ко Господу, ни лестныя обещания, ни прещения, ни угрозы, ниже самыя муки: ты с радостию предстал пред зверьми на смерть лютую и, яко ангел, возлетел еси во обители Отца нашего Небеснаго; и молитва твоя много может пред Господем. Буди тый угодниче, предстателем у Господа за ны, недостойнии рабы твоя; помогай и всем православным христианом святыми твоими молитвами ко всемогущему Богу, да избавит ны от глада, труса, града, бездождия и смертоносных болезней, и да дарует нам здравие и спасение. Буди же нам помощник скорый во всякой скорби, наипаче в час кончины нашея явися нам светлым защитником и ходатаем и умоли Господа сподобитися всем нам, тебе ныне тепле молящимся, получити по христианской кончине Небесное Царствие, идеже вси святии вкупе с тобою вечно славят Отца и Сына и Святаго Духа. Аминь.

Тропарь священномученику Игнатию Богоносцу, глас 4

Апостольских нравов подражателю и престола их снаследниче, архиереев удобрение и мучеников славо, богодухновенне, на огнь, и меч, и звери дерзнул еси веры ради и, слово истины исправляя, до крове пострадал еси, священномучениче Игнатие, моли Христа Бога спастися душам нашим.

Кондак, глас 3

Светлых подвиг твоих светоносный день предпроповедует всем в вертепе Рожденнаго: Сего бо жаждая от любве насладитися, потщался еси от зверей снеден быти; сего ради и Богоносец нареклся еси, Игнатие всемудре.

Величание

Величаем тя, священномучениче Игнатие, и чтим святую память твою, ты бо молиши за нас Христа Бога нашего.

Молитвы праведному Иоанну Кронштадтскому

Господи, призри милостиво на раба Твоего (имярек), прелыценнаго лестию чрева и плотскаго веселия; даруй ему (имярек) познати сладость воздержания и поста, и проистекающих от него плодов Духа. Аминь.

Слава Тебе, Господи Иисусе Христе, Сыне Единородный Безначальнаго Отца, едине изцеляяй всяк недуг и всяку язю в людех, яко помиловал мя еси грешнаго и избавил еси мя от болезни моей, не попустив ей развиться и умертвить меня по грехам моим. Даруй мне отныне, Владыко, силу твердо творить волю Твою во спасение души моея окаянныя и во славу Твою со Безначальным Твоим Отцем и Единосущным Твоим Духом, ныне и присно и во веки веков. Аминь.

Тропарь праведному Иоанну, пресвитеру и чудотворцу Кронштадтскому, глас 1

Православныя веры поборниче, земли Российския печальниче, пастырем правило и образе верным, покаяния и жизни во Христе проповедниче, Божественных Таин благоговейный служителю и дерзновенный о людех молитвенниче, отче праведный Иоанне, целителю и предивный чудотворче, граду Кронштадту похвало и Церкве нашея украшение, моли Всеблагаго Бога умирити мир и спасти души наша.

Ин тропарь, глас 4

Со апостолы изыде вещание твое в концы вселенныя, с исповедники страдания за Христа претерпел еси, святителем уподобился еси Слова проповеданием, с преподобными во благодати Божией просиял еси. Сего ради вознесе Господь бездну смирения твоего превыше небес, и дарова нам имя твое во источник предивных чудес. Темже во Христе во веки живый, чудотворче, любовию милуй сущия в бедах, слыши чада твоя, верою тя призывающия, Иоанне праведне, возлюбленный пастырю наш.

Ин тропарь, глас тойже

Российския земли пастырь добрый показался еси, в служении пресвитерстем жизнь во Христе стяжав, Богомудре отче Иоанне. Благодать изобильную от Владыки Христа приял еси: недуги отгоняти, малодушныя утешати, в Тайне Пречистаго Тела и Крови верныя со Христом соединяти. Сего ради восхваляем тя, яко молитвенника о душах наших.

Кондак, глас 3

Днесь пастырь Кронштадтский предстоит престолу Божию и усердно молит о верных Христа Пастыреначальника, обетование давшаго: «Созижду Церковь Мою и врата адова не одолеют ее».

Ин кондак, глас 4

От младенства Богом избранный, и во отрочестве дар учения чудесно от Него приемый, и к пресвитерству в сонном видении преславно призван быв, пастырь дивный Церкве Христовы явился еси, отче Иоанне, благодати тезоимените. Моли Христа Бога всем нам с тобою в Царствии Божием быти.

Ин кондак, глас 6

Проповедником истины, богоносным отцем подражая, всего себе на служение Богу и ближним вдал еси, и сан священства нося, покоя не ведал еси, службы Божия в Храме присно совершая, и в домех верных молебныя пения воспевая, нуждающимся щедро благотворя, тако наименование благотворца и безсребреника стяжал еси, Иоанне. Темже и по успении твоем российския людие прославляют имя твое, и вечную память тебе возглашающе, поют Богу: аллилуия.

Величание

Величаем тя, святый праведный отче Иоанне, и чтим святую память твою, ты бо молиши за нас Христа Бога нашего.

Праведному Иоанну Кронштадтскому молятся об исцелении от различных недугов, в том числе и об исцелении от беснования, об избавлении от страсти пьянства и запоя (сохранилось много свидетельств об исцелении им алкоголиков), о помощи в трудном учении.

Заступнице усердная, Мати Господа Вышняго! Ты еси всем христианом помощь и заступление, паче же в бедах сущим. Призри ныне с высоты святыя Твоея и на ны, с верою покланяющияся Пречистому образу Твоему, и яви, молим Тя, скорую помощь Твою по морю плавающим и от ветров бурных тяжкия скорби терпящим.

Подвигни и вся православныя Христианы на спасение в водах утопающих, и воздаждь подвизающимся о сем богатыя милости и щедроты Твоя.

Се бо, на образ Твой взирающе, Тебе, яко милостивно сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и напаствуемых.

Ты по Бозе наша Надежда и Заступница, и на Тя уповающе, сами себе, и друг друга, и весь живот наш Тебе предаем во веки веков. Аминь.

Тропарь Божией Матери ради иконы Ее Леньковской (Новгород-Северской), именуемой «Спасительница утопающих», глас 4

К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

Кондак, глас 6

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.

Величание

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Пред иконой Пресвятой Богородицы «Спасительница утопающих» молятся о помощи от потопления на воде плавающих и от бури на море, обращаются те, которым приходится вручать себя во власть водной стихии.

О Пресвятая и Преблагословенная Мати Сладчайшаго Господа нашего Иисуса Христа! Припадаем и покланяемся Тебе пред светозарным образом Твоим и смиренно молим: прости, Всемилостивая, вся заблуждения наша и вся оскорбления, в ведении или в неведении Сыну Твоему и Спасителю нашему от юности обильно причиненная неисполнением заповедей Его святых, небрежением ко святыни, нерадением к молитве и нетерпением в несении креста нашего. Призри на жажду спасения и посильныя труды и пребуди с многогрешным, но оставшимся верным Сыну Твоему малым стадом Его по неложному слову Его, во святем Евангелии реченному: Не бойся, малое стадо, яко благоизволи Отец ваш дати вам царство.

О животворящий источниче нашего утешения! К Тебе возносим смиренное сие моление и просим Матернего Твоего о нас заступления пред престолом Отца нашего Небеснаго. Не лиши нас царства сего благодатнаго за премногия грехи наша, вемы бо, яко ничтоже внешнее и самолюбивое, гордое и тщеславное, ни славная достижения мирская, ни добродетели, с тайным самолюбованием совершаемыя, ни степени, ни чины, ни самое иноческое звание не возмогут возвести нас в Царствие Небесное, токмо сердце чистое и дух сокрушенный и смиренный, за многия молитвенныя труды Духом Святым даруемыя. Помози нам оставшияся дни жизни нашея в Духе и истине покланятися Сыну Твоему, Милосердая Богородице, и, стяжавше нелицемерную любовь к Богу и ближнему, исполнити сию первейшую заповедь Господню, единую приводящую в Царство Небесное. Аще и недостойни есмы, сподоби нас соделатися чадами Божиими по благодати и наследовати жизнь вечную со всеми, в покаянии Богу угодившими, и введи нас, Мати Божия, язвами Сына Твоего Иисуса Претихаго в небесный чертог Его, да вечно славим и воспеваем пречестное и великолепое имя Всесвятыя Троицы, Отца и Сына и Святаго Духа ныне и присно и во веки веков. Аминь.

Тропарь Божией Матери ради иконы Ее Пюхтицкой «У источника», глас 4

Утешение всех скорбящих, скорая Помощнице в туге сердечней к Тебе прибегающим, услыши нас, Владычице, и даждь нам на путь к жизни вечней душ и сердец от скверн очищение и, яко елень на источники водныя, к Царству Небесному неустанное стремление.

Кондак, глас 4

Пресвятая Богородице Дево, утоли жажду спасения страждущия души моея у Источника вод живых – Божественнаго Слова, Сына Твоего, Христа Бога нашего; призри на любящих и славящих Тя, Пречистая, и покрый нас покровом милосердия Твоего от всяких зол, тревог и бурь моря житейскаго.

Величание

Величаем Тя, Светозарная Дево, и почитаем осиявшее гору Пюхтицкую благодатное явление Твое.

Пред иконой Пресвятой Богородицы Пюхтицкой «У источника» молятся об исцелении телесных недугов и об открытии новых целебных источников.

Преставление святителя Петра, митрополита Московского и всея России чудотворца (1326).

Благоверной княгини Иулиании Вяземской, Новоторжской (1406).

Преставление блаженного Прокопия, Христа ради юродивого, Вятского (1627).

О великий святителю, преславный чудотворче, Российския Церкве первопрестольниче, града Москвы хранителю и о всех нас усердный молитвенниче, отче наш Петре! К тебе смиренно припадаем и молимся: простри руце твои ко Господу Богу и помолися за ны, грешныя и недостойныя рабы Его: да пробавит нам милость Свою и ниспослет нам вся благопотребная к временному житию и вечному спасению нашему дары благости Его, наипаче же да оградит нас миром, братолюбием и благочестием от всех искушений врага диавола и дарует нам быти верными чадами твоими, не по имени токмо, но и всем житием нашим. Ей, угодниче Божий! Услыши нас благоутробно и буди всем нам помощник и заступник во всяких бедах и напастех, не забуди нас и в час кончины нашея, егда наипаче твоего заступления потребуем: да, при помощи молитв твоих святых, сподобимся и мы, грешнии, кончину благую получитии Царствие Небесное унаследити, славяще дивнаго во святых Своих Бога нашего, Отца и Сына и Святаго Духа, во веки веков. Аминь.

Тропарь святителю Петру, митрополиту Московскому и всея России, чудотворцу, глас 4

Яже прежде безплодная земле, ныне веселися: се бо Христос светильника в тебе показа, яве сияюща в мире и исцелевающа недуги и болезни наша. Сего ради ликуй и веселися со дерзновением: святитель бо есть Вышняго, сия соделоваяй.

Ин тропарь, глас 8

Ликуй светло, благославнейший граде Москва, имеяй в себе архиерея Петра, яко зарю солнца, всю Россию чудодеянии озаряюща, той бо немощи врачует и недуги, яко тьму прогонит от вопиющих ему: радуйся, иерарше Бога Вышняго, тобою сия пастве твоей соделовающаго.

Ин тропарь, глас 4

Благоверно пожив в мире, житием чистым просветився, учением святительства приим паству, апостолом наследниче. Тем прием дар чудес от Бога, отче Петре, моли Христа Бога да спасет души наша.

Кондак, глас 2

Взбранному и дивному нашея земли чудотворцу, днесь любовию к тебе притекаем, песнь, богоносе, плетуще, яко имея дерзновение ко Господу, многообразных избави нас обстояний, да зовем ти: радуйся, утверждение граду нашему.

Ин кондак, глас 4

Явися днесь пресветлая память твоя, святителю преблаженне Петре, в мире светло сияющи и являющи всем Божественное сияние.

Величание

Величаем тя, святителю отче Петре, и чтим святую память твою, ты бо молиши за нас Христа Бога нашего.

О блаженная госпоже, преславная Христова мученице, Небесных Ангелов сожительнице, благоверная княгине Иулиание, добре за чистоту подвизавшаяся, ея же ради и Божественными дарами обогатившаяся, во временней жизни люте от злокозненнаго врага пострадавшая, утешение же некончаемое от Христа Бога получившая, благими делы и кротостию украсившаяся и кротких землю наследовавшая, благочестно в законе пожившая и вельми ныне чудесы просиявшая! Ты, яже чистоты ради твоея сердечныя, прияла в тя Свет Святаго Духа и была еси всех благих дел сокровище на земли и, сего ради благий конец мученичества улучивши, неизреченнаго света сподоблена еси в вечных кровех Небеснаго селения. Ты, яже со святыми соборы водворяешися и с мученик лики веселишися, помяни и нас, добродетельное твое житие и страдания твоя мученическая похваляющих и с духовною радостию почитающих твою память. Призри на ны, волнами житейскими обуреваемыя, да твоими молитвами, добре поживше, диавольских избежим сетей и с тобою вечных благ сподоблены будем. О всеблаженная страстотерпице, всех Владыце и Богу благая и верная рабо явившаяся! Днесь, собраннии в храме твоем, к мощем твоим припадающе, умиленно вопием и молим тя: моли с нами и о нас умоляемаго от своего благоутробия Бога, да милостивно услышит нас, просящих Его благостыню, и подаст нам вся, яже ко спасению и житию нужная прошения, и всем, на всяком месте, во всякой скорби и обстоянии требующим Его человеколюбия и помощи, великую Свою милость. Да благодатию Божиею и твоим теплым ходатайством здрави всегда душею и телом пребывающе, славим дивнаго во святых Своих Бога Израилева, не удаляющаго помощи Своея от нас всегда, ныне, и присно, и во веки веков. Аминь.

Тропарь благоверной княгине Иулиании Вяземской, Новоторжской, глас 2

Благочестно в законе поживши и благими делы украсившися, яко крепкий адамант явилася еси, целомудренная святая благоверная княгине Иулиание: тленную бо славу и добротство телесное презревши, злокозненнаго врага победила еси и целомудрия ради мученическую смерть прияла еси. Сего ради от Христа Бога нетленным и вечным венцем венчавшися, ныне с лики мученик ликуеши, и нам велия чудеса, приходящим ко гробу твоему, обильно источаеши. Темже ти вопием: молися Христу Богу о всех нас, с верою и любовию страдания твоя почитающих.

Кондак, глас тойже

Воспоем днесь Благодетеля всех Бога, прославльшаго в России Иулианию богомудрую, да молитвами ея подаст душам нашим грехов оставление и велию милость.

Величание

Величаем тя, святая благоверная княгине Иулиание, и чтим святую память твою, ты бо молиши за нас Христа Бога нашего.

Молитвы блаженному Прокопию, Вятскому чудотворцу

Тропарь блаженному Прокопию, Христа ради юродивому, Вятскому, глас 4

Иже на земли Христа ради волею в буйство преложися, и мира сего красоты отнюд возненавиде, и плотская играния увядив постом и жаждею и на земли леганием, от зимы студению и мразом, и от зноя солнечнаго и дождя и прочия тяготы никогда же уклонися под кров, и на теле своем не имея одеяния, Божиею помощию покрываем, и душу очистил еси добродетельми своими, яко злато в горниле, Прокопие премудре, с верою творящим память твою честно и усердно притекающим к мощем твоим, прославляюще твое святое успение, Христу Богу моляся, благоюроде, да избавит ны Господь от варварскаго нашествия и междоусобныя брани и мир мирови дарует и душам нашим велию милость.

Ин тропарь, глас тойже

Велию любовь ко Господу в себе имея, все претрудное житие твое во граде Хлынове, юродствуя, провел еси, блаженне Прокопие, зной и мраз, глад и жажду благодушно терпя, биение и поношение от людей безбожных радостно принимал еси, подвижниче добропобедный, любовию же и добром велиим за зло воздавая, мнозем предрекал еси их ожидающее и от недугов исцелял еси, беззлобне. Темже, наслаждаяся ныне в сонме святых, моли Господа помиловати град и люди, тя почитающия.

Ин тропарь, глас 8

Ангельски живя на земли Богоугодно, многия скорби и труды терпеливо неся, добродетельми и дарованиями от Бога украсився, предвещая грядущая и исцеляя болезни, безмолвно, непрестанно моляся, юродствуя, скрыв дарования своя, ныне наслаждаяся в селениих святых, святый блаженне Прокопие, моли Христа Бога спастися душам нашим.

Кондак, глас 2

Возбранному и дивному в праведницех мужу, волею во юродство претворившуся, мира сего красоты возненавидел еси, плотская мудрования увядил еси постом и жаждею, студению мраза, снега и зноя, и дождя, и от прочия воздушныя тяготы никогда же уклонися и очистил еси себе, яко злато в горниле, Прокопие блаженне, всей Вятской земли похвала и утверждение.

Ин кондак, глас 8

Многою любовию к Богу пламенея, любви и смирению людей безмолвно учил еси, деянием будущая являя, недуги и болезни целил еси. На путь спасения нас настави, от язв греховных исцели, Прокопие блаженне, о всех нас Христа Бога моли.

Величание

Ублажаем тя, святый праведный Прокопие, и чтим святую память твою, ты бо молиши за нас Христа Бога нашего.

Великомученицы Анастасии Узорешительницы, или Фармаколитрии (ок. 304).

О многострадальная и премудрая великомученице Анастасие! Ты душею на небеси у престола Господня предстоиши, на земли же, данною тебе благодатиею, различная совершаеши исцеления. Призри убо милостивно на предстоящия люди и молящияся пред пречистым образом твоим, просящия твоея помощи: простри ко Господу святыя молитвы твоя о нас, и испроси нам оставление согрешений наших: недужным исцеление, скорбящим и бедствующим скорую помощь; умоли Господа, да подаст всем нам христианскую кончину и добрый ответ на страшнем суде Своем, да сподобимся и мы купно с тобою славити Отца и Сына и Святаго Духа во веки веков. Аминь.

Тропарь великомученице Анастасии Узорешительнице (Фармаколитрии), глас 4

Победоноснаго Воскресения истинноименитая наречена еси, мученице Христова, победы на враги поставила еси мук терпением, Христа ради, Жениха твоего, Егоже возлюбила еси. Того моли спасти души наша.

Кондак, глас 2

Во искушениих и скорбех сущии, к твоему храму притекающе, приемлют честная дарования от живущия в тебе Божественныя благодати, Анастасие, ты бо присно миру точиши исцеления.

Величание

Величаем тя, страстотерпице Христова Анастасие, и чтим честное страдание твое, еже за Христа претерпела еси.

Великомученице Анастасии Узорешительнице молятся о помощи в трудных родах и об освобождении из плена и заточения.

Святителя Феоктиста, архиепископа Новгородского (1310).

Преподобного Нифонта, епископа Кипрского (IV).

О святителю Феоктисте, угодниче Господень преизрядный, теплый наш заступниче и молитвенниче! Буди в скорбех и болезнех нам послушатель и помощник: помози нам грешным и унылым, семо приходящим и раце мощей твоих поклоняющимся. В настоящем убо житии умоли Господа Бога даровати нам оставление всех наших грехов, елика согрешихом от юности нашея делом, словом, помышлением и всеми нашими чувствы: и во исходе душ наших помози нам окаянным. Умоли Господа Бога, всея твари Содетеля, избавити нас от воздушных мытарств и вечнаго мучения, да всегда прославляем Отца и Сына и Святаго Духа, и твое милостивое предстательство, ныне и присно и во веки веков. Аминь.

Тропарь святителю Феоктисту, архиепископу Новгородскому, глас 3

Божия Слова Премудрости изрядный служитель, ангельскаго жительства истинный подражатель, Божественныя чистоты рачитель, архиереом сопристольниче, преподобным сожительниче, пастырская красота, Великому Новуграду похвала, святителю пречестный Феоктисте, отче наш, Емуже, Слову Божию, в житии сем послужил еси, моли спастися душам нашим.

Кондак, глас 8

Архиерейское украшение, Великому Новуграду Богодухновенное удобрение, сущия бо в нем люди на пажитех живоноснаго закона Господня упасл еси, и сего ради в лице святых водворятися сподобися, и святую твою память многими леты сотвори неоскверненну, в нейже тя почитающе, радуйся, от души вопием ти, святителю отче Феоктисте, Великому Новуграду похвала и утверждение.

Величание

Величаем тя, святителю отче Феоктисте, и чтим святую память твою, ты бо молиши за нас Христа Бога нашего.

Молитва преподобному Нифонту Кипрскому

С умилением житие твое вспоминая, святителю отче Нифонте, милосердию и благости Божией покланяемся. Некогда великим грешником быв, ты великой святости достиг, премудрыми подвигами и трудами на вершину добродетелей вступив, прозорливыми очами души человеческия, из тела исходящия, ангелов Господних и таинства Божия зрел еси, такожде диавола и слуг его, всюду рыкающих и вводящих людей в грех. Много лет с диаволом боряхуся, ты помощию и благодатию Божиею его победил еси.

Сего ради молим тя, святый Нифонте, от всея души и помышления нашего: от сетей вражиих избавь нас и от коварства диавола, хотящего всех погубить. Помози и нам одолети силу сатанинскую, да в благочестии без соблазнов поживя, прославим Бога нашего. Не отринь моления нашего, внемли нам, и отгони лукавых и темных духов такожде и от скота нашего, и огради его, да не дерзнут бесы приблизитися к нему, но да всякое дыхание восхвалит Господа во веки веков. Аминь.

Преподобному Нифонту Кипрскому молятся о прогнании лукавых духов от людей и животных, о даре слова и о даре прозорливости, об изгнании бесов.

Навечерие Рождества Христова.

Священномученика Сергия пресвитера (1942).

Рождественский сочельник.

Строг ий пост.

Молитвы в навечерие Рождества Христова

Тропарь предпразднеству в навечерие Рождества Христова, глас 4

Написовашеся иногда со старцем Иосифом, яко от семене Давидова, в Вифлееме Мариам, чревоносящи безсеменное Рождение: наста же время рождества, иместо ни едино же бе обиталищу, но, якоже красная палата, вертеп Царице показашеся: Христос раждается прежде падший воскресити образ.

Кондак предпразднеству, глас 3

Дева днесь Превечное Слово в вертепе грядет родити неизреченно; ликуй, вселенная, услышавши, прослави со ангелы и пастырьми хотящаго явитися Отроча Младо, Превечнаго Бога.

О всечестный и преславный священномучениче Сергие, святости отеческия наследниче, веру православную во страданиях и до смерти исповедавше, богословия истиннаго действенный поборник и учитель явился еси. Темже велие дерзновение ко Господу имея, испроси и нам подати благодать и крепость во испытаниях, разумети премудрость велию писаний святоотеческих и божественныя службы премилость. Аминь.

О всечестнии и преславнии пастыри наша, праведный Алексие, старче Московский, и священномучениче Сергие! К вам, о чадолюбивыя предстатели и заступницы наша, со умилением припадаем и, величая труды, болезни и страдания ваша, молим: призрите на ны, унывающия, немощныя, и всесильными молитвами вашими вся злая от нас отвратите. Сподобите и нас подражати вере, терпению и любве вашея; испросите, о всеблаженнии, у Всещедраго Бога оживотворити благодатию души наша, да со упованием непреложным на милость Его течем на предлежащий подвиг спасения души и да сподобимся унаследовати Царствие Небесное и тамо вкупе в радости безконечней воспевати в Троице славимаго Бога во веки веков. Аминь.

Рождество Господа Бога и Спаса нашего Иисуса Христа.

Двунадесятый праздник От 25 декабря до 5 января (ст. ст.) – Святки (святые дни).

Нет поста в среду и пятницу.

Молитва из молебствия на день Рождества Христова

Боже великий и непостижимый, Отче Безначальный, Собезначальный Сыне, и Душе Соприсносущный, осуществуяй не сущая, спасаяй погибающия, животворяй мертвыя, творяй по воли Твоей в силе небесней и в селении земнем, и дивным Твоим промыслом управляяй всяческая! Приклони ухо Твое с высоты святыя Твоея, и приими от нас смиренных и недостойных рабов Твоих, имже велие Твое от бед и всегубительства спасение явил еси, сердцем и усты возносимая Тебе благодарственная сия моления, исповедания и славословия. Яко не по беззаконием нашим сотворил еси нам, Господи, ниже по грехом нашим воздал еси нам. Ты глаголал еси древле сыновом израилевым, яко, аще не послушают гласа Твоего хранити и творити вся заповеди Твоя, наведеши на них язык безстуден лицем, иже сокрушит их во градех их, дондеже разорятся стены их, и мы ведехом, яко прииде глагол страшный сей на ня и на отцы наша; обаче, прещения Твоего не убоявшеся и о милосердии Твоем вознерадивше, оставихом путь правды Твоея и ходихом в волях сердец наших, и не искусихом имети в разуме и сердце Тебе Бога разумов и сердец; еще же и отеческая предания ни во чтоже вменивше, прогневахом Тя от чуждих. Ихже ради, якоже древле сынов израилевых, тако и нас обят лютое обстояние, и о ихже ревновахом наставлениих, сих врагов имеяхом буиих и зверонравных. Но Ты, Господи Боже щедрый и милостивый, долгортерпеливый и многомилостивый и истинный, и правду храняй, и творяй милость в тысящи, отемляй беззакония и неправды и грехи, на время мало оставль нас, милостию велиею помиловал еси, и посетив жезлом неправды наша, якоже щедрит отец сыны, тако ущедрил еси нас. Призрел бо еси на скорбь нашу и на потребление царствующаго града, в немже от лет древних призвася имя Твое, и на моления наша, яже не на наша правды уповающее повергохом пред Тобою, но на щедроты Твоя многия, Господи, да от лица Христа Твоего исчезающе исчезнут яко дым врази Твои, любящии же Тебе возсияют, яко восток солнца в силе своей. Видехом, Господи, видехом, и вси языцы видеша в нас, яко Ты еси Бог и несть разве Тебе: Ты убиеши и жити сотвориши, поразиши и исцелиши, и несть, иже изьмет от руку Твоею. Темже утвердися сердце наше во Господе нашем, вознесеся рог наш в Бозе нашем, возвеселихомся о спасении Твоем. Благодарим Тя, Господи, яко наказуя наказал еси ны в мале, да не смерти во веки предаси нас. Даждь нам, Господи, память сего славнаго Твоего посещения тверду и непрестанну иметь в себе, яко да в Тебе утверждени сыновним страхом и верою и любовию, и Твоею крепостию ограждени, всегда, якоже днесь, поем и славословим имя святое Твое. Подаждь во благочестивей стране нашей пастырем святыню, правителем суд и правду, народу мир и тишину, законом силу и вере преспеяние. О Премилосердый Господи! Пробави милость Твою ведущим Тя, но и не ищущим Тебе явлен буди, еще и врагов наших сердца к Тебе обрати, и всем языком и племеном во единем истиннем Христе Твоем познан буди. Да от восток солнца до запад, всеми убо языки единем же сердцем, вси языцы восклицают Тебе гласом радования. Аминь.

Конец ознакомительного фрагмента.